БИЛИМЛАР КУНИ ЭЗГУ ТАШАББУСЛАР БИЛАН БОШЛАНДИ
2 сентябрь — “Билимлар куни” Амударё туманида юқори кайфиятда, кўтаринки руҳда ўтказилди. Янги ўқув йилининг илк кунида нафақат мактаб ҳовлиларида болаларнинг шўх кулгуси, қўлларида китоб ва дафтарлар билан сабоқ даргоҳига ошиқаётган қувноқ қадамлари, балки меҳр ва ғамхўрлик рамзи бўлган эзгу ташаббуслар ҳам намоён бўлди.
Айниқса, туман ҳокими ташаббуси билан ташкил этилган хайрли иш — эҳтиёжманд оилаларнинг 200 нафар фарзандига мактаб формаси туҳфа этилиши, бу кунни болажонлар учун янада унутилмас қилди. Кичкинтойларнинг юзида порлаган табассум, ота-оналарнинг кўзидаги миннатдорлик ёшлар таълимига қаратилаётган ғамхўрликнинг ёрқин ифодаси бўлди.
Тадбирда туман ҳокимининг ўринбосари, Оила ва хотин-қизлар бўлими бошлиғи Гўзал Сабурова ҳамда туман ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Нодирбек Камолов, шунингдек, туман Мактабгача ва мактаб таълими бўлими бошлиғи Ялғаш Шомуратовлар иштирок этиб, ўқувчиларга мактаб формасини тантанали равишда топширдилар.
Сўзга чиққан масъуллар янги ўқув йилини бошлаётган азиз болажонларни самимий табриклаб, уларнинг билим олиши, илм-фан сирларини пухта эгаллаши, юксак марраларни забт этиши ва катта орзулар сари дадил интилишларида омад ва зафарлар тиладилар.
Бу эзгу ташаббус ёшларда билим олишга бўлган меҳрни янада ошириш, уларни қўллаб-қувватлаш, орзулари сари интилишларига кўмак бериш йўлидаги муҳим қадамлардан биридир. Зеро, ҳар бир бола мактаб формасини кияр экан, ўзини келажак сари дадил қадам ташлаётган, жамият эътиборида бўлган инсон сифатида ҳис қилади.
Байрамлар арафасида меҳр-муҳаббат улашиш, инсонларнинг қалбини қувончга тўлдириш — энг савобли ва энг эзгу амаллардан биридир. Айниқса, эҳтиёжманд инсонларни шод этиш, уларнинг эртанги кунига ишонч бағишлаш — бу нафақат моддий ёрдам, балки меҳр, ғамхўрлик ва юксак инсоний қадриятларнинг ёрқин ифодасидир.
Шубҳасиз, бугун ўзига яраша кичик кўринадиган, аммо келажак учун улкан маънавий аҳамият касб этадиган бу ташаббус — эртанги кунимиз эгалари бўлган ёшларнинг қалбида ишонч, орзу ва интилишлар учқунини уйғотади. Илмли, тарбияли ва комил инсонларни вояга етказиш эса нафақат оила, балки бутун жамиятнинг шарафли ва масъулиятли бурчидир.
“Билимлар куни” байрами мана шундай эзгу ташаббуслар, самимий табриклар, ота-оналарнинг шукронаси ва фарзандларнинг беғубор кулгулари билан бошланди. Ишонамизки, туманимиздаги барча мактаб ўқувчилари янги ўқув йилида юртимиз тараққиётига муносиб ҳисса қўшадиган, илм-фан чўққиларини забт этадиган маърифатли авлод вакиллари сифатида улғаядилар.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
