МТТЛАРДА БОЛАЛАРНИ СОҒЛОМ ОВҚАТЛАНТИРИШГА БАҒИШЛАНГАН СЕМИНАР ТАШКИЛ ЭТИЛДИ

Баркамол авлодни тарбиялаб, вояга етказиш йўлидаги илк қадам мактабгача таълим ташкилотларидан бошланади. Бу борада эса болалар саломатлигини таъминлаш ва соғлом овқатлантиришни ташкил этиш, айниқса, ёзги соғломлаштириш даврида тарбияланувчиларнинг хавфсизлигини таъминлаш масалалари муҳим аҳамиятга эга. Амударё туманида давлат-хусусий шерикчик асосида фаолият юритаётган “Ҳусния” нодавлат мактабгача таълим ташкилотида “Долзарб 90 кун” доирасида ўтказилган семинарда ҳам айнан шу масалалар атрофлича муҳокама этилди.

Семинарда Қорақалпоғистон Республикаси Мактабгача ва мактаб таълими Вазирлиги мутахассисилари, Қорақалпоғистон “Ошпазлар уюшмаси”, Амударё тумани Мактабгача ва мактаб таълими бўлими масъуллари, туман Санитария эпидемиологик-осойишталик ва жамоат саломатлиги бўлими шифокорлари, давлат хусусий-шерикчилик асосидаги ҳамда оилавий нодавлат мактабгача таълим ташкилотлари тарбиячилари, ошпазлари ва аутсорсинг асосида маҳсулот етказиб берувчи таъминотчи-тадбиркорлар иштирок этдилар.

Семинарни туман Мактабгача ва мактаб таълими бўлимининг давлат-хусусий шериклик асосидаги таълим ташкилотлари фаолиятини мувофиқлаштириш бўйича бош мутахассиси Абдурашид Насруллаев очди ва ушбу семинарни ўтказишдан мақсад, нодавлат мактабгача таълим ташкилотларида соғлом овқатлантиришни ташкил этишнинг аҳамияти, таълим-тарбия жараёнларини тўғри олиб бориш тўғрисида батафсил сўз юритди.

Шундан сўнг Қорақалпоғистон Республикаси Мактабгача ва мактаб таълими бўлими мутахассислари сўзга чиқиб, мактабгача таълим ташкилотларининг давлат ва нодавлат тармоқларини янада кенгайтириш, улар ўртасида соғлом рақобат муҳитини шакллантириш мақсадида Республика миқёсида амалга оширилаётган кенг қамровли ишлар хусусида семинар иштирокчиларига зарур маълумотлар тақдим этди.

Хусусан, нодавлат мактабгача таълим ташкилотларида боланинг индивидуал эҳтиёжларини ҳисобга олган ҳолда ривожланишига оид давлат талаблари асосида ҳамда давлат ўқув дастурига мувофиқ унинг ҳар томонлама ва баркамол ривожланиши учун қулай шарт-шароитлар яратиш, мактабгача ёшдаги болаларнинг ўқув-тарбиявий фаолиятини ташкил қилиш ҳамда мактабгача таълим ёшидаги барча тарбияланувчиларни соғлом, хавфсиз овқатлантириш баркамол авлод тарбиясидаги энг муҳим ва долзарб вазифа эканлиги алоҳида таъкидланди.

Озиқ-овқат маҳсулотлари ва таомларнинг санитария қоидалари, меъёрлари ва гигиена талабларига мослиги, соғлом овқатлантиришни ташкил этиш, тарбияланувчиларнинг соғлом ва баркамол ўсишини таъминлаш учун талабларга мувофиқ шароитлар яратиш нафақат муассасалар раҳбарларининг, балки ошпазларнинг, таъминотчи-тадбиркорларнинг ҳам зиммаларидаги масъулиятли вазифаси экани, бу борада асло сусткашликка йўл қўйиб бўлмаслиги алоҳида қайд қилинди.

Семинарда сўзга чиққанлар болага бериладиган таомларнинг сифати, ёш тоифаларига кўра қувватлилик даражаси, санитария-гигиена талабларига мослиги юзасидан ўз фикрларини билдирдилар. Хусусан, болалар тартибсиз овқатлантирилганда улардаги овқатланиш рефлекси сўниб, иштаҳаси пасайиши, бунинг оқибатида овқат ҳазм қилиш аъзоларининг фаолияти бузилиши, шунинг учун болаларни ўз вақтида овқатлантириш унинг соғлом ўсиб-улғайишида муҳим аҳамиятга эгалиги, хавфсиз овқатлантиришнинг барча қоидаларига амал қилингандагина уларнинг ривожланишида муаммо бўлмаслиги алоҳида қайд этилди.

Айниқса, мактабгача таълим ташкилотида таомнома шакллантирилишида кунлик рационда болаларнинг асосий озиқ-овқат моддаларга бўлган эҳтиёжи ва ёшига мос энергия қуввати билан тўлиқ таъминланиши, уларнинг тарбияланиш шароити ва соғлиғи, шунингдек, овқатланишнинг маҳаллий иқлим шароитидан келиб чиқиб, миллий хусусиятлари ҳисобга олиниши лозимлиги иштирокчиларда катта қизиқиш уйғотди.

Семинар жараёнида тумандаги 5-сонли таянч давлат мактабгача таълим ташкилоти методисти, тренер-ментор Гулчеҳра Юлдашева томонидан мактабгача таълим ташкилотларида ёзги соғломлаштириш даврини ташкиллаштириш бўйича вазирлик томонидан ишлаб чиқилган услубий тавсиялар юзасидан тушунтириш ишлари ҳам олиб борилди.

Семинар якунида муҳокама этилган масалалар юзасидан тушган барча саволларга масъуллар томонидан батафсил жавоблар, зарур тушунча ва тавсиялар берилди.

Равшан Баҳромов.