Ёшларни касбга йўналтириш мақсадида тадбирлар ташкил этилди

Жорий ўқув йилининг якунланиши арафасида Амударё муҳандислик технологиялари техникумида аҳолини иш билан таъминлаш, ёшларни касбга йўналтириш, таълим ва меҳнат бозори ўртасида самарали ҳамкорликни таъминлаш мақсадида қатор муҳим тадбирлар ташкил этилди. “Очиқ эшиклар куни” тадбири ҳамда туман Камбағалликни қисқартириш ва бандликка кўмаклашиш бўлими ҳамкорлигида ўтказилган “Карьера куни” ҳамда бўш иш ўринлари меҳнат ярмаркаси шулар жумласидандир.

Тадбирда Бош прокуратура ҳузуридаги Мажбурий ижро бюроси Амударё туман бўлими давлат ижрочиси, 3-даражали юрист Қуаниш Қурбаналиев, туман Мактабгача ва мактаб таълими бўлими бошлиғи Ялғаш Шомуродов, туман Камбағалликни қисқартириш ва бандликка кўмаклашиш бўлими бошлиғи Маъмуржон Темирбоев, техникум директори Шухрат Матирзаев, Амударё тумани ИИБ ҳузуридаги Пробация бўлими бошлиғи Руслан Искандаров ҳамда бошқа ҳамкор ташкилотлар ва тижорат банклари вакиллари фаол иштирок этди.

Меҳнат ярмаркасида тумандаги 34 та корхона ва ташкилот 176 та бўш иш ўрни билан қатнашди. Унда 148 нафар фуқаро, жумладан, ишсизлар, пробация ҳисобига олинганлар, алимент тўловчилар, ногиронлиги бўлган шахслар, мактаб ва техникум битирувчилари иштирок этди. Ярмарка якунида 21 нафар фуқаро доимий ишга жойлаштирилди, шундан 2 нафари пробация ҳисобидагилардир. Шунингдек, 7 нафар ишсиз фуқаро касб-ҳунарга ўқишга йўналтирилди.

“Очиқ эшиклар куни” тадбири доирасида 9–11-синф битирувчилари ва уларнинг ота-оналари техникумдаги таълим йўналишлари, амалий устахоналар, таълим жараёни ва яратилган шароитлар билан яқиндан танишиш имконига эга бўлдилар. Шунингдек, уларга махсус буклетлар тарқатилди.

Айни пайтда техникум 936 ўринга мўлжалланган бўлиб, 100 ўринли ётоқхона ва 100 ўринли ошхона фаолият кўрсатмоқда. Ҳозирда 1-курсда 4 та, 2-курсда эса 10 та йўналиш бўйича жами 448 нафар ўқувчи кундузги, сиртқи ва дуал таълим шаклларида таҳсил олмоқда. Уларнинг 156 нафари давлат гранти, 292 нафари эса тўлов-шартнома асосида таълим олмоқда.

Таълим муассасасида 7 нафар раҳбар ходим, 6 нафар умумтаълим ва 26 нафар махсус фан ўқитувчилари, 4 нафар ишлаб чиқариш таълими усталари ҳамда 22 нафар техник ходим фаолият олиб бормоқда. Ўқувчиларнинг назарий билимларини амалий кўникмалар билан бойитиш мақсадида 12 та мутахассисликка мос замонавий ўқув хоналари ва лабораториялар ташкил этилган.

Жумладан, автомобил тузилиши, йўл ҳаракати қоидалари, автотренажёр, агрономия, ветеринария, электр ва газ пайвандлаш, чилангарлик, электромонтаж, тикувчилик, трактор тузилиши, қишлоқ хўжалик машиналари ва компьютер хоналари замонавий ускуналар билан жиҳозланган. Шу билан бирга, ўқувчиларнинг бўш вақтларини мазмунли ўтказишлари учун 8 та касбий, 6 та спорт ва 5 та фан тўгараклари мунтазам фаолият юритмоқда.

Техникум таълим мазмунини такомиллаштириш мақсадида қатор олий таълим муассасалари билан ҳамкорлик йўлга қўйган. Қорақалпоқ давлат университети, Қорақалпоғистон қишлоқ хўжалиги ва агротехнология институти ҳамда Самарқанд давлат ветеринария медицинаси университети Нукус филиали билан тузилган шартномалар асосида профессор-ўқитувчилар томонидан маҳорат дарслари ўтказилиб, методик ёрдамлар кўрсатилмоқда.

Амударё муҳандислик-технологиялар техникумида таълимни ишлаб чиқариш билан узвий боғлаш, битирувчиларни иш билан таъминлаш, ўрта бўғин мутахассисларига бўлган эҳтиёжни ўрганиш ишлари тизимли амалга оширилмоқда. Бу борада туман ҳокимлиги ва Камбағалликни қисқартириш ва бандликка кўмаклашиш бўлими билан ҳамкорликда 10 та йирик ташкилот ва корхоналар билан шартномалар имзоланган. Улар қаторида Амударё туман электр тармоқлари корхонаси, қишлоқ хўжалиги бўлими, табиатни муҳофаза қилиш қўмитаси, туман Фермерлари кенгаши, молия бўлими ва “Tamara TEXTIL” МЧЖ каби ташкилотлар бор.

2025–2026 ўқув йили учун техникумда ўқувчиларни қабул қилиш бўйича аниқ йўналишлар ва қабул режалари тасдиқланган. Қабул кундузги, сиртқи ва дуал таълим шаклларида амалга оширилади.

9-синф битирувчилари учун 11 та йўналиш бўйича 450 та ўрин ажратилган. Улар қаторида агробизнес ва маркетинг, экология, графика ва дизайн, дастурий таъминот созловчиси, электромонтёр, автомобиль таъмири, тикувчилик, агрокимё ва ошпазлик каби касблар ва йўналишлар бор.

11-синф битирувчилари учун эса кундузги таълимда 14 та йўналиш бўйича 420 та ўрин, сиртқи таълимда 5 та йўналишда 150 та ўрин, дуал таълимда эса 3 та йўналишда 90 та ўрин ажратилган. Улар орасида дастурий инжиниринг, экология, электр станциялари, озиқ-овқат технологияси, металлургия, ветеринария, мактабгача таълим тарбиячиси каби соҳалар мавжуд.

Амударё туманидаги Мухандислик технологиялари техникумида ўтказилган “Очиқ эшиклар куни” ва “Карьера куни” тадбирлари ёшларнинг таълимга бўлган қизиқишини ошириш, уларни касбга йўналтириш ва иш билан таъминлаш борасида муҳим аҳамият касб этди.

Шоҳзод Қурбонбоев.