Оғзибирлик ва ҳашар орқали йўллар обод бўляпти

Мамлакатимизда маҳалла институтини кучайтириш, аҳоли билан мулоқотни янада самарали ташкил этиш, одамларнинг турмуш шароитини яхшилашга қаратилган ислоҳотлар кенг кўламда амалга оширилмоқда. Бу ислоҳотларнинг ҳаётдаги амалий натижасини маҳалладаги ҳамжиҳатлик, жамоатчиликнинг фаоллиги орқали яққол кўриш мумкин.

Амударё туманининг Ўзбекистон маҳалласи аҳолиси учун эндиликда маҳалладан катта йўлга чиқиш аввалгидек мушкуллик туғдирмайди. Чунки халқимизга хос фазилатлар – бирдамлик, оғзибирлик ва ўзаро ҳамжиҳатлик туфайли мавжуд муаммолар босқичма-босқич бартараф этиляпти.

Сўнгги йилларда маҳаллада амалга оширилаётган ишлар кўлами кенгаймоқда. Жорий йилнинг 28 март куни мазкур маҳалла фуқаролар йиғини маъмурий биносида бўлиб ўтган йиғилишда 2,5 километр узунликдаги Бойчечак кўчасидаги ички йўлни ҳашар йўли билан таъмирлаш масаласи муҳокама этилди. Йиғилишда фермер хўжаликлари, тадбиркорлар ва маҳалланинг фаол фуқаролари фаол иштирок этишди ҳамда жамоавий меҳнат орқали йўл таъмирини амалга оширишга келишилди. Бу халқ ташаббуси асосида амалга оширилаётган муҳим ишлардан бири бўлди.

Шундан сўнг мазкур масала туман ҳокимлиги масъулларига тегишли тартибда маълум қилинди. Талаб этиладиган техника ва ускуналар жалб қилинди, ишлар тизимли равишда йўлга қўйилди. Маҳалла аҳолиси, фермерлар ва тадбиркорлар меҳнат жараёнига жипсликда киришиб, ҳамжиҳатликда ҳаракат қилишди. Бу ҳамкорлик сўзда эмас, балки амалдаги жамоавий ҳаракатнинг ёрқин намунаси бўлди.

Туман ҳокими Собир Хўжаметов аҳоли билан очиқ мулоқот қилиш, уларнинг кайфияти ва фикр-мулоҳазалари билан яқиндан танишиш, шунингдек, амалга оширилаётган ишлар самарадорлигини кўздан кечириш мақсадида Ўзбекистон маҳалласига ташриф буюрди.

Учрашувда маҳалла фаоллари, зиёлилар, шу жумладан халқ ардоғидаги шоирлар Турсунбой Абдуллаев ва Аҳмад Нафасовлар иштирок этишди. Аҳоли билан самимий ва дўстона руҳда ўтган мулоқот давомида туман ҳокими халқ билан дилдан суҳбатлашди, амалга оширилаётган ишлар билан яқиндан танишди ҳамда ҳашар йўли билан амалга оширилаётган хайрли ташаббусларни юксак баҳолади.

Юрт тараққиётида халқнинг бирдамлиги ва меҳнатсеварлиги муҳим аҳамият касб этиши алоҳида таъкидланди. Эл ардоғидаги шоир Аҳмад Нафасов томонидан мамлакатдаги тараққиёт, халқнинг меҳнатсеварлиги ва ҳамжиҳатлигидан илҳомланиб ўқилган шеърлар йиғилганларга катта таассурот қолдирди.

Ушбу хайрли ишлар ташкил этилишида туман ҳокимлиги масъуллари, туман Ободонлаштириш бошқармаси ҳамда халқ депутатлари туман Кенгаши депутати Баҳром Шермоновнинг ҳам алоҳида ҳиссаси бўлди.

Хайрли ишлар йўл таъмири билан чекланиб қолинмай, энди мазкур ички йўл ёқасидан пиёдалар учун махсус йўлак қуриш режалаштирилган. Айниқса, болалар ва кексаларнинг хавфсиз ҳаракатланиши учун бундай йўлак катта аҳамият касб этади.

Ўзбекистон маҳалласида амалга оширилган мазкур ишлар орқали халқнинг ташаббускорлиги, оғзибирлиги ва меҳнатсеварлиги яна бир бор ўз исботини топди. Бирдамлик бор жойда ҳеч қандай муаммо ечимсиз қолмайди. Бу каби ишлар жамиятда ижтимоий барқарорликни таъминлашда муҳим омил бўлиб хизмат қилади.

Бирдамлик асосида амалга оширилган мазкур лойиҳа ҳар бир фуқаро учун ўрнак бўлади, деган умиддамиз. Чунки бу ерда фақатгина йўл таъмирланмади — инсонлар қалбидаги йўллар ҳам кенгайди, ишонч, меҳр ва ҳамжиҳатлик туйғулари янада мустаҳкамланди. Бу эса халқимизнинг буюк фазилатларидан гувоҳлик берадиган ҳаётий сабоқдир.

Шоҳзод Қурбонбоев.