Ogʻzibirlik va hashar orqali yoʻllar obod boʻlyapti

Mamlakatimizda mahalla institutini kuchaytirish, aholi bilan muloqotni yanada samarali tashkil etish, odamlarning turmush sharoitini yaxshilashga qaratilgan islohotlar keng koʻlamda amalga oshirilmoqda. Bu islohotlarning hayotdagi amaliy natijasini mahalladagi hamjihatlik, jamoatchilikning faolligi orqali yaqqol koʻrish mumkin.

Amudaryo tumanining Oʻzbekiston mahallasi aholisi uchun endilikda mahalladan katta yoʻlga chiqish avvalgidek mushkullik tugʻdirmaydi. Chunki xalqimizga xos fazilatlar – birdamlik, ogʻzibirlik va oʻzaro hamjihatlik tufayli mavjud muammolar bosqichma-bosqich bartaraf etilyapti.

Soʻnggi yillarda mahallada amalga oshirilayotgan ishlar koʻlami kengaymoqda. Joriy yilning 28-mart kuni mazkur mahalla fuqarolar yigʻini maʼmuriy binosida boʻlib oʻtgan yigʻilishda 2,5 kilometr uzunlikdagi Boychechak koʻchasidagi ichki yoʻlni hashar yoʻli bilan taʼmirlash masalasi muhokama etildi. Yigʻilishda fermer xoʻjaliklari, tadbirkorlar va mahallaning faol fuqarolari faol ishtirok etishdi hamda jamoaviy mehnat orqali yoʻl taʼmirini amalga oshirishga kelishildi. Bu xalq tashabbusi asosida amalga oshirilayotgan muhim ishlardan biri boʻldi.

Shundan soʻng mazkur masala tuman hokimligi masʼullariga tegishli tartibda maʼlum qilindi. Talab etiladigan texnika va uskunalar jalb qilindi, ishlar tizimli ravishda yoʻlga qoʻyildi. Mahalla aholisi, fermerlar va tadbirkorlar mehnat jarayoniga jipslikda kirishib, hamjihatlikda harakat qilishdi. Bu hamkorlik soʻzda emas, balki amaldagi jamoaviy harakatning yorqin namunasi boʻldi.

Tuman hokimi Sobir Xoʻjametov aholi bilan ochiq muloqot qilish, ularning kayfiyati va fikr-mulohazalari bilan yaqindan tanishish, shuningdek, amalga oshirilayotgan ishlar samaradorligini koʻzdan kechirish maqsadida Oʻzbekiston mahallasiga tashrif buyurdi.

Uchrashuvda mahalla faollari, ziyolilar, shu jumladan xalq ardogʻidagi shoirlar Tursunboy Abdullayev va Ahmad Nafasovlar ishtirok etishdi. Aholi bilan samimiy va doʻstona ruhda oʻtgan muloqot davomida tuman hokimi xalq bilan dildan suhbatlashdi, amalga oshirilayotgan ishlar bilan yaqindan tanishdi hamda hashar yoʻli bilan amalga oshirilayotgan xayrli tashabbuslarni yuksak baholadi.

Yurt taraqqiyotida xalqning birdamligi va mehnatsevarligi muhim ahamiyat kasb etishi alohida taʼkidlandi. El ardogʻidagi shoir Ahmad Nafasov tomonidan mamlakatdagi taraqqiyot, xalqning mehnatsevarligi va hamjihatligidan ilhomlanib oʻqilgan sheʼrlar yigʻilganlarga katta taassurot qoldirdi.

Ushbu xayrli ishlar tashkil etilishida tuman hokimligi masʼullari, tuman Obodonlashtirish boshqarmasi hamda xalq deputatlari tuman Kengashi deputati Bahrom Shermonovning ham alohida hissasi boʻldi.

Xayrli ishlar yoʻl taʼmiri bilan cheklanib qolinmay, endi mazkur ichki yoʻl yoqasidan piyodalar uchun maxsus yoʻlak qurish rejalashtirilgan. Ayniqsa, bolalar va keksalarning xavfsiz harakatlanishi uchun bunday yoʻlak katta ahamiyat kasb etadi.

Oʻzbekiston mahallasida amalga oshirilgan mazkur ishlar orqali xalqning tashabbuskorligi, ogʻzibirligi va mehnatsevarligi yana bir bor oʻz isbotini topdi. Birdamlik bor joyda hech qanday muammo yechimsiz qolmaydi. Bu kabi ishlar jamiyatda ijtimoiy barqarorlikni taʼminlashda muhim omil boʻlib xizmat qiladi.

Birdamlik asosida amalga oshirilgan mazkur loyiha har bir fuqaro uchun oʻrnak boʻladi, degan umiddamiz. Chunki bu yerda faqatgina yoʻl taʼmirlanmadi — insonlar qalbidagi yoʻllar ham kengaydi, ishonch, mehr va hamjihatlik tuygʻulari yanada mustahkamlandi. Bu esa xalqimizning buyuk fazilatlaridan guvohlik beradigan hayotiy saboqdir.

Shohzod Qurbonboyev.