Физика ва кимё фани ўқитувчилари ўртасида Республика олимпиадасининг туман босқичи ўтказилди
Маълумки, ўсиб келаётган ёш авлоднинг юксак салоҳиятли ва билимли бўлиб улғайишида ўқитувчиларнинг ўрни алоҳида. Негаки, устоз ўз соҳаси бўйича чуқур билимга ва тажрибага эга бўлсагина шогирдини ҳам муайян соҳанинг билимдони қилиб тарбиялай олади. Шу билан бирга, ўқитувчининг билим ва салоҳияти ошиб, ўзаро фикр алмашув ҳамда соғлом рақобат муҳитида малака ва тажрибаси янада сайқалланади. Бу эса педагогнинг дарс жараёнларининг сифати ошишига хизмат қилади.
Шу мақсадда яқинда Амударё тумани Мактабгача ва мактаб таълими бўлимига қарашли 1-сонли умумий ўрта таълим мактабида физика ва кимё фани ўқитувчилари ўртасида Республика олимпиадасининг туман босқичи ўтказилди. Олимпиада Ўзбекистон Республикаси Президентининг “Иқтидорли ёшлар билан ишлаш тизимини янада такомиллаштириш чора-тадбирлари тўғрисида”ги, “Кимё ва биология йўналишларида узлуксиз таълим сифатини ва илм-фан натижадорлигини ошириш чора-тадбирлари тўғрисида”ги ҳамда “Физика соҳасидаги таълим сифатини ошириш ва илмий тадқиқотларни ривожлантириш чора-тадбирлари тўғрисида”ги Қарорларида белгиланган вазифалар ижросини таъминлаш мақсадида Ўзбекистон Республикаси Мактабгача ва мактаб таълими вазирлигининг тегишли буйруғига асосан ўтказилди.
Мазкур ўқитувчилар олимпиадасида туманимиздаги ихтисослаштирилган мактабдан ҳамда 86 та умумий ўрта таълим мактабларидан келган 155 нафар физика ва кимё фани ўқитувчилари иштирок этдилар.
Олимпиада очилиш маросимида Қорақалпоғистон Республикаси Мактабгача ва мактаб таълими вазирлигидан Фан олимпиадаси бўйича Иқтидорли болалар билан ишлаш сектори методисти Фазилат Зарифова, Амударё туман Ихтисослаштирилган мактаби директори Отабек Йўлдашов, Туман Мактабгача ва мактаб таълими бўлими бошлиғи Ялғашбой Шамуратов, Мактаблар фаолиятини мувофиқлаштириш шуъбаси методистлари Хабибулла Давлетяров ва Райҳон Якубова ҳамда Амударё туман Ихтисослаштирилган мактаби назоратчилари, олимпиаданинг аудитория раҳбарлари, кузатувчилар иштирок этдилар.
Тадбирда сўзга чиққан масъуллар физика ва кимё фани ўқитувчилари ўртасида ўтказилаётган Республика олимпиадасининг мақсад ва вазифалари ҳақида айтиб ўтдилар.
Адолатли ва шаффоф кечган беллашув давомида иштирокчи ўқитувчилар ўз фанидан 40 та саволдан иборат тест топшириқларини бажардилар.
Донолардан бири шундай деган эди: “Билим шундайки, у яланғоч бўлганингда ҳам ўзинг билан қолади, уни ҳаммомга кирганингда сув ҳам йўқота олмайди”. Ҳақиқатан, илм то умримизнинг охиригача бизга ҳамроҳ бўлади. Тафаккур осмонида қуёш бўлиб, ҳар қадамда йўлимизни ёритади. Фан олимпиадаларининг аҳамияти эса, олинган билимларни синовдан ўтказиб, энг кучлиларни саралаб беришида.
Олимпиада натижалари тез орада Фан олимпиадалар маркази томонидан эълон қилинади ҳамда туман босқичида ғолиб бўлган ўқитувчилар Қорақалпоғистон Республикаси босқичида иштирок этиш ҳуқуқига эга бўладилар. Ҳудудий босқич эса 26-27 февраль кунлари ўтказилиши режалаштирилган.
Азиза Мадраҳимова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
