Xalq deputatlari Amudaryo tuman Kengashining 76-sessiyasi toʻgʻrisida axborot

2024-yil 19-iyul kuni Amudaryo tumani hokimligining majlislar zalida xalq deputatlari tuman Kengashining 76-sessiyasi boʻlib oʻtdi.

Sessiyada deputatlar, tuman hokim oʻrinbosarlari, hokimlik masʼul xodimlari, boʻlimlar, tashkilotlar rahbarlari hamda ommaviy axborot vositalari vakillari ishtirok etdi.

Sessiyani Kengash raisining oʻrinbosari Gʻulomjon Yeshniyozov ochdi va olib bordi. Sessiya kotibligiga 9-Amir Temur saylov okrugidan deputat Oybek Yusupov saylandi.

Sessiya kun tartibidagi dastlabki masala yuzasidan tuman ichki ishlar boʻlimi boshligʻining oʻrinbosari Sharap Joldasbayev hisobot berdi. Hisobotda qayd etilganidek, 2024-yilning birinchi yarmida tuman boʻyicha umumiy jinoyatchilik oʻtgan yilning shu davri bilan solishtirganda 79dan 96ga, yoki 21,5 foizga, jinoyat-qidiruv yoʻnalishida esa 61dan 64ga, yoki 4,9 foizga oshgan. Hisobotda tuman hududida jinoyatchilik va huquqbuzarliklarning oldini olish hamda ularning profilaktikasini tashkil etish boʻyicha amalga oshirilayotgan va kelgusida bajarilishi rejalashtirilgan ishlar haqida batafsil maʼlumotlar berildi.

Kun tartibidagi navbatdagi masala yuzasidan Oʻzbekiston mahallalari uyushmasining Amudaryo tumani boʻlimi boshligʻi Alisher Yuldashev hisobot berdi. Hisobotda “Mahalla yettiligi”ning faoliyatini yanada jonlantirish, aholi bandligini taʼminlash, tadbirkorlikni rivojlantirish, hududlarda aholi uchun munosib ijtimoiy infratuzilmani yaratish, milliy qadriyatlar, urf-odatlar va anʼanalarni targʻib qilish, mahallalarda sogʻlom ijtimoiy-maʼnaviy muhitni saqlash borasida amalga oshirilayotgan ishlar haqida batafsil maʼlumotlar berildi.

Sessiyada Oʻzbekiston Respublikasi Prezidentining Amudaryo tumanidagi Xalq qabulxonasi mudiri Anvar Orazbayev axborot berdi. Axborotda deputatlarga tadbirkorlikni rivojlantirish, aholi bandligini taʼminlash va kambagʻallikni qisqartirish boʻyicha kelib tushayotgan murojaatlarni tahlil qilgan holda, hokim yordamchilari faoliyatining natijadorligini oʻrganish yakunlari haqida maʼlumot berildi. Shuningdek, Xalq qabulxonasi tomonidan sektorlar, davlat organlari va boshqa tashkilotlarning uyma-uy yurish, murojaatlar bilan ishlash, ijtimoiy va boshqa obʼektlarda aniqlangan muammolarni hal qilish borasidagi faoliyatini tizimli oʻrganish, koʻrib chiqilishi majburiy boʻlgan taqdimnomalar kiritish, sektorlar faoliyatini baholashda ishtirok etish boʻyicha 2024-yilning ikkinchi choragi davomida amalga oshirilgan ishlar tahlil qilindi.

Sessiya kun tartibidagi soʻnggi masala yuzasidan Davlat kadastrlari palatasi tuman filiali boshligʻi Sherzod Sultanov hisobot berdi va Oʻzbekiston Respublikasi Prezidentining 2023-yil 28-iyul kungi farmonida keltirilgan talablarga javob beradigan hamda soliq organlaridan qarzdorligi boʻlmagan, belgilangan bir martalik yigʻimni toʻlagan jami 410 nafar fuqarolarga tegishli boʻlgan yer uchastkalariga ijara huquqi hamda bino va inshootlarga mulk huquqini eʼtirof etish boʻyicha taklif kiritdi.

Hisobotlar va axborotlar tinglanib, deputatlarning barcha masalalar boʻyicha fikr va mulohazalari inobatga olingan holda faol muhokamalardan keyin kun tartibidagi barcha masalalar boʻyicha xalq deputatlari Amudaryo tuman Kengashining tegishli qarorlari qabul qilindi.