“A1TECH" IT akademiyasining Amudaryo tumani filiali oʻz faoliyatini boshladi

Bugungi kunda mamlakatimizda davlatimiz rahbari tashabbusi bilan axborot-kommunikatsiya texnologiyalari sohasini rivojlantirishni yangi bosqichga olib chiqish borasida tizimli ishlar qilinmoqda. IT sohasini rivojlantirish va davlat boshqaruvini raqamlashtirish maqsadida hududlarda IT-xizmatlarini rivojlantirish uchun qoʻshimcha sharoitlar yaratilmoqda.

Prezident tashabbusi bilan IT kompaniyalarining hududlardagi boʻsh turgan binolarga bir yil muddatga bepul joylashtirilishi, iqtidorli dasturchilarga bir yil ichida boʻlib toʻlash sharti bilan kompyuter va texnikalar berilishi, 50dan ortiq IT mutaxassisini ishli qilgan kompaniyalarning bir yil davomidagi ish haqi xarajatining 15 foizgacha qismi qoplab berilishi axborot texnologiyalari sohasini rivojlantirishning davlat siyosatidagi ustuvor yoʻnalishlaridan biri ekanligini koʻrsatadi.

Bu borada Amudaryo tumanida ham qator amaliy ishlar qilinmoqda. Axborot-kommunikatsiya texnologiyalarini rivojlantirish, sohaga qiziquvchi yoshlarni qoʻllab-quvvatlash, ularning qiziqishlari va qobiliyatlarini yuzaga chiqarish ishlariga joriy yilning 4-iyun sanasidan ish boshlagan “A1TECH” IT akademiyasi Amudaryo tumani filiali jamoasi ham munosib hissa qoʻshishni niyat qilishgan.

Bugungi kunda muassasaning tuman filialida 30 nafardan ortiq yoshlar IT sohasi boʻyicha chuqur bilim va koʻnikmalarga ega boʻlmoqdalar. Yoshlarga “Java” dasturlash tili, “Android” operatsion tizimi, dasturlash interfeysi va ichki tuzilishi hamda kompyuter savodxonligi yoʻnalishlashlari boʻyicha bilim berilmoqda. Har bir yoʻnalish uchun 2 tadan guruh tashkil etilgan boʻlib, guruhlarga 12 nafardan yoshlar qamrab olinishi rejalashtirilgan.

Maʼlumot oʻrnida aytish joizki, “A1TECH Group” 2009-yilda “A1TECH KIBER KOMPUTERS” MChJ negizida tashkil etilgan. Tashkilot asosan dasturiy taʼminot yaratish va ularni tasarruf etish bilan shugʻullanib kelmoqda. Bundan tashqari, “A1TECH Group” oʻtgan yillar davomida koʻplab veb saytlarni yaratgan. 2014-yildan buyon tashkilot “MUSTAFO SOFTWARE” MChJ nomidan faoliyat yuritmoqda hamda shu qisqa vaqt davomida bir qancha dasturiy taʼminotlarni yaratgan va amaliyotga joriy qilgan. Shuningdek, tashkilot jamoasi biznesni raqamli oʻzgartirish uchun moʻljallangan va uning oʻsishi hamda rivojlanishiga hissa qoʻshadigan IT platformalarini ishlab chiqmoqda.

IT akademiyasining tuman filialida yosh boʻlishiga qaramay, chuqur bilim va salohiyatga ega boʻlgan dasturchilar bilim bermoqdalar. Xususan, “MUSTAFO SOFTWARE” MChJ rahbari Sanʼatbek Masharipov Muhammad al-Xorazmiy nomidagi Toshkent axborot texnologiyalari universiteti Urganch filiali “Dasturiy injiniring” kafedrasi mudiri boʻlib, oʻtgan yillar davomida koʻplab sohalarning ish jarayonlarini avtomatlashtirish va yangi startap loyihalarni ishlab chiqish bilan shugʻullanib kelmoqda.

Jumladan, kafe va restoranlarning ish jarayonlarni osonlashtiruvchi “A1Kafe”, ulgurji savdo bilan shugʻullanuvchi tashkilotlar va ularning savdo agentlari ish jarayonlarini yengillashtiruvchi “A1DEALER”, kasalxona va klinikalar uchun “Hospital management system”, mahsulotlarni boʻlib toʻlash sharti bilan ishlovchi doʻkonlar uchun dasturiy taʼminotlarni ishlab chiqqan. Hozirgi kunda sunʼiy intellekt tizimlari yoʻnalishida ham ilmiy izlanishlar olib bormoqda.

Axborot-kommunikatsiya texnologiyalari sohasiga qiziquvchi, shu yoʻnalishda bilim olishni xohlovchi yoshlarni "A1TECH" IT akademiyasining Amudaryo tuman filialiga oʻqishga taklif etamiz.

Charos Arslonova, tuman hokimligining Axborot xizmati rahbari.