Qishloq xoʻjaligida dolzarb mavsum: gʻalla oʻrim-yigʻimiga sanoqli kunlar qoldi

Gʻalla – xalqimiz rizq-roʻzi va dasturxonimiz toʻkinligi manbai, nuroniylarimizning turmushimizda faravonllik hukm surishini soʻrab qilgan ezgu niyatlarining ijobatidir. Bobodehqonlarimizning ertayu-kech qilgan mehnatlari samarasi boʻlgan bugʻdoy oʻrimi mavsumiga ham sanoqli kunlar qoldi. Bu jarayon fermerlar, kombaynchilar va sohaga jalb qilingan xodimlar zimmasiga katta masʼuliyat yuklaydi. Joriy yil ham hosilni qisqa muddatda nest-nobut qilmasdan oʻrib-yigʻib olish uchun puxta hozirlik koʻrildi.

Amudaryo tumanida ushbu mavsumga tayyorgarlik ishlarining yakunini koʻzdan kechirish, zaruriy texnikalarning mavsumga shayligini tekshirish maqsadida hamda yuqori unumli gʻalla oʻrish kombaynlarining oʻrim-yigʻim ishlariga tayyorligi yuzasidan 2-sektor hududidagi Doʻstlik mahallasida koʻrgazmali seminar tashkil etildi.

Mazkur tadbirda tuman hokimi Sobir Xoʻjametov, sektor rahbarlari, tuman hokimining qishloq va suv xoʻjaligi masalalari boʻyicha oʻrinbosari Anvar Yuldashev, Oʻzagroinspektsiyaning Qoraqalpogʻsiton Respublikasi boshqarmasi boshligʻi Arslon Yusufov hamda soha mutaxassislari ishtirok etdi.

Tadbirda gʻalla oʻrim-yigʻimiga shay qilingan kombaynlar taqdimoti ham boʻlib oʻtdi.

Masʼullar oʻrim-yigʻimga tayyorgarlik ishlari, kombaynlarning taʼmirlanganligi, texnik sozligi, mavsumga shayligini koʻzdan kechirib, otryadlar aʼzolari, qishloq xoʻjaligi tizimidagi vakillar bilan shuhbatlashishdi.

Tuman hokimi Sobir Xoʻjametov gʻalla xalqimizning umumiy boyligi, dehqonlarimizning halol mehnati, dasturxonimiz toʻkinligini taʼminlovchi neʼmat ekanligini taʼkidlab, bir bashoq donni ham nest-nobut qilmasdan, uyushqoqlik bilan oʻrib-yigʻib olish yuzasidan qishloq xoʻjaligi vakillariga zarur topshiriqlar berdi.

Aytish joizki, Amudaryo tumanida joriy yilda fermer xoʻjaliklarining 4 ming 800 gektar yer maydonida gʻalla yetishtirildi. Shundan 588 gektar maydondagi gʻalla urugʻlik uchun moʻljallangan. Joriy yilgi mavsumda oʻrim-yigʻim ishlariga 18ta kombayn va 36 nafar texnika boshqaruvchi jalb qilingan. Tadbirda mutasaddilar tamonidan har bir kombaynchi moddiy ragʻbatlantirilib, ularga pul mukofoti va oziq-ovqat muhsulotlari topshirildi.

Maʼlumot oʻrnida aytish joizki, 2023-yilning noyabr va dekabr oylari iliq kelganligi kuzgi boshoqli don ekinlarining oʻsishi va rivojlanishiga ijobiy taʼsir koʻrsatdi. Buning natijasida erta va optimal muddatda ekilgan kuzgi boshoqli don ekinlari toʻliq tuplash davriga oʻtib, erta qishlovga kirdi. Yerdan moʻl hosil olish maqsadida mavsum davomida fermerlar tomonidan zaruriy agrotexnik tadbirlar oʻz vaqtida va sifatli ravishda oʻtkazildi.

Gʻalla maydonlari tabiiy oʻgʻitlar bilan toʻyintirilib, hosilga ziyon yetkazuvchi zararkunandalarga qarshi agrotexnik tadbirlari amalga oshirildi. Maxsus vositalar bilan yomgʻirlatib sugʻorish texnologiyasi qoʻllanilgani natijasida avvalgiga qaraganda suv resurslari ancha tejaldi hamda bugʻdoy doimiy ravishda namlik bikan taʼminlandi.

Tadbirda mutaxassislar tomonidan mavsumda ishtirok etuvchi har bir xodimga zarur koʻrsatmalar berilib, savollarga javob qaytarildi.

Seminar yakunida esa, kombaynlarning texnik holati sinab koʻrildi. Bir soʻz bilan aytganda, amudaryolik qishloq xoʻjaligi sohasida mehnat qilayotgan xodimlar, fermer va dehqonlar zaruriy texnikalar bilan gʻalla oʻrim-yigʻim mavsumi uchun shay holatga keltirilgan. Mazkur jarayon mutasaddi tashkilotlar tomonidan doimiy nazorat qilib boriladi.

Xalq manfaati, el-yurt faravonligi yoʻlida xizmat qilish – eng oliy baxt, buyuk saodatdir. Rizq-roʻzimiz va toʻkinchilik asosi boʻlmish yuksak gʻalla xirmonini bunyod qilish yoʻlida zahmat chekib, oʻrim-yigʻim ishlariga oʻzining munosib hissasini qoʻshishga shay turgan gʻallakorlarimiz va bu jarayonga yordam beruvchi texnik xodimlarning mashaqqatli ishlariga omad tilaymiz.

Shohzod Qurbonboyev