“Yosh gvardiyachilar” sinfida oʻquvchilar harbiy vatanparvarlik ruhida tarbiyalanadi

Maʼlumki, joriy yilning 5-fevral kuni davlatimiz rahbarining ijtimoiy sohalardagi ustuvor vazifalar muhokamasi yuzasidan oʻtkazilgan videoselektor yigʻilishida maktabdagi tarbiya va manaviyat masalasiga alohida urgʻu berilib, darslardagi davomat qoniqarsiz ekanligi tanqid qilingan edi.

Shundan keyin, oʻquvchi yoshlarni harbiy vatanparvarlik ruhida tarbiyalashga qaratilgan chora tadbirlar doirasida Maktabgacha va maktab taʼlimi vazirligining “Umumiy oʻrta taʼlim maktablarida “Yosh gavrdiyachilar” ixtisoslashtirilgan sinflari faoliyatini tashkil etish chora-tadbirlari toʻgʻrisida”gi qoʻshma qarori tayyorlandi.

Qarorga asosan Amudaryo tumanidagi 11-sonli umumtaʼlim maktabida ham “Yosh gvradiyachilar” ixtisoslashtirilgan sinfi tashkil etildi va mazkur sinfning ochilish marosimi boʻlib oʻtdi.

Mazkur tadbirda Oʻzbekiston Respublikasi maktabgacha va maktab taʼlimi vazirining birinchi oʻrinbosari Usmon Sharifxodjayev, Qoraqalpogʻiston Respublikasi Maktabgacha va maktab taʼlimi vaziri Gulistan Qojabayeva, Milliy gvardiyaning Qoraqalpogʻiston Respublikasi boʻyicha boshqarma boshligʻi polkovnik Muxtor Yusupov hamda tumanimizning sohaga masʼul mutasaddilari ishtirok etdi.

Tadbir avvalida Oʻzbekiston va Qoraqalpogʻiston Respublikalarining davlat madhiyalari yangradi. Oʻquvchilar maktab oldida harbiylarga monand saflanishdi. Ularning koʻzlarida ona Vatanga boʻlgan otashin muhabbat, yurt tinchligi va xalq osoyishtaligini saqlashga daxldorlik tuygʻulari aks etgan.

Shundan soʻng Oʻzbekiston Respublikasi Maktabgacha va maktab taʼlimi vazirining birinchi oʻrinbosari Usmon Sharifxodjayev va Milliy gvardiyaning Qoraqalpogʻiston Respublikasi boʻyicha boshqarmasi boshligʻi polkovnik Muxtor Yusupovlar soʻzga chiqib, oʻquvchilarni va maktab jamoasini “Yosh gvardiyachilar” ixtisoslashtirilgan sinfi tashkil etilganligi bilan samimiy tabrikladi. Bunday xayrli ishlar va insonparvar islohotlar mamlakatimizdagi tinch va odilona siyosatning natijasi ekanligi taʼkidlandi. Maktab taʼlimi tizimda Oʻzbekiston Respublikasi Milliy gvardiyasi bilan hamkorlikda amalga oshirilayotgan oʻzgarishlar sabab maktablarda davomat koʻrsatkichlari ancha yaxshilanayotgani qayd etildi.

Tadbir davomida yangi tashkil etilgan “Yosh gvardiyachilar” ixtisoslashtirilgan sinfi oʻquvchilari Vatanga sodiq farzandlar boʻlishga qasamyod qilishdi. Tadbir ishtirokchilari va mehmonlar ularni qarsaklar bilan olqishladi. Oʻzbekiston Respublikasi Maktabgacha va maktab taʼlimi vazirining birinchi oʻrinbosari Usmon Sharifxodjayev tomonidan yosh gvardiyachilarga Oʻzbekiston Respublikasi Milliy gvardiyasi bayrogʻi tantanali ravishda topshirildi.

Harbiy orkestr jamoalarining oʻquvchilar ishtirokida ijro etgan tantanavor marshi tadbirga bayramona kayfiyat bagʻishladi.

Maktab oʻquvchilari tamonidan tayyorlangan qoʻl jangi usullari boʻyicha koʻrgazmali chiqishlarda yoshlarning jismonan sogʻlom, ruhan tetik ekanliklari yana bir bora namoyon boʻldi. Koʻrgazmali chiqish yakunida oʻquvchilar Oʻzbekiston va Qoraqalpogʻiston Respublikalarining davlat bayroqlarini boshi uzra baland koʻtarishdi.

Tadbir davomida mehmonlar maktabga tashrif buyurib, marosim uchun maxsus tayyorlangan ramziy lentani kesishdi. Mutasaddilar sinfxonalarga kirib, maktabda oʻquvchilarning taʼlim olishlari uchun yaratilgan sharoitlar bilan yaqindan tanishdilar. “Yosh gvardiyachilar” ixtisoslashtirilgan sinfi oʻquvchilari bilan samimiy suhbatlashib, ularga kelgusi oʻqishlarida omad tiladilar. Boʻlgʻusi gvardiyachilar nafaqat harbiy bilimlarni, balki maktabda ham barcha umumtalim fanlarini yaxshi oʻzlashtirishi lozimligini bildirib, zarur tavsilar berishdi.

Kindik qonimiz tomgan ona Vatanga boʻlgan muhabbat qalbimizga bolalikdan singdirilar ekan, farzandlarimiz yurtga sadoqatli, vatanparvar insonlar boʻlib ulgʻayishiga ishonamiz. Yangi tashkil etilayotgan “Yosh gvardiyachilar” ixtisoslashtirilgan sinfi ham ayni maqsadlarimizga xizmat qilishi bilan ahamiyatlidir.

Shohzod Qurbonboyev