Xalq deputatlari Amudaryo tuman Kengashining 73-sessiyasi toʻgʻrisida axborot

2024-yil 22-may kuni tuman hokimligining majlislar zalida Xalq deputatlari Amudaryo tuman Kengashining 73-sessiyasi boʻlib oʻtdi.

Sessiya majlisida sektorlar rahbarlari, hokim oʻrinbosarlari, hokimlik masʼul xodimlari, boʻlimlar, tashkilotlar rahbarlari hamda ommaviy axborot vositalari vakillari ishtirok etdi.

Sessiyani xalq deputatlari tuman Kengashi raisining oʻrinbosari Gʻulomjon Yeshniyozov ochdi va olib bordi. Sessiya kotibligiga 12-Arnaboʻyi saylov okrugidan deputat Mansur Urazbayev saylandi.

Sessiya kun tartibidagi birinchi, yaʼni “2024-yilning 1-choragida sektor rahbarlari tomonidan amalga oshirilgan ishlar toʻgʻrisida”gi masala yuzasidan Amudaryo tumanini kompleks ijtimoiy-iqtisodiy rivojlantirish boʻyicha sektorlar rahbarlarining hisobotlari tinglandi.

Ushbu masala boʻyicha Amudaryo tumani hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari
Kamiljan Aytbayev hisobotida taʼkidlanganidek, har bir mahallaga biriktirilgan banklar va hokim yordamchilari tomonidan tanlab olingan kam daromadli 86 ta xonadonlarga koʻmak berilib, xonadonlarga tomorqadan olayotgan daromadini 50-60 mln soʻmga chiqarish boʻyicha tizimli ishlar amalga oshirilgan va davom ettirilmoqda.

Amudaryo tumani prokurori, 2-sektor rahbari Aziz Roʻzmetov kun tartibidagi masala boʻyicha maʼruzasida joriy yilning oʻtgan 4 oyi davomida jami 501 nafar fuqarolar ishga joylashtirilganini, aholi bandligini taʼminlash boʻyicha amaliy ishlar davom etayotganini taʼkidlab oʻtdi.

Ushbu masala yuzasidan tuman Ichki ishlar boʻlimi boshligʻi, 3-sektor rahbari Jamaladdin Yusupov ham hisobot berdi. Hisobotda sektor hududidagi 12 ta mahalalarda aholiga 7 mingta joʻja arzonlashtirilgan narxlarda tarqatilgani, 10 ming 502ta xonadonlardagi 1 ming 786 gektar tomorqa yerlariga toʻliq ekin ekilib, yerlardan samarali foydalanilayotgani qayd etildi.

Amudaryo tumani soliq inspektsiyasi boshligʻi, 4-sektor rahbari Jahongir Rahimov oʻz hisobotida hokim yordamchilari va tijorat banklarining hamkorlikdagi faoliyati tufayli aholi daromadlarini oshirish va tadbirkorlikni rivojlantirish maqsadida 99 nafar fuqaroga umumiy qiymati 2,1 mlrd soʻm boʻlgan imtiyozli kreditlar ajratilgani qayd etildi.

Sessiya kun tartibidagi navbatdagi masala yuzasidan Oʻzbekiston Respublikasi Prezidentining Amudaryo tumanidagi Xalq qabulxonasi mudiri Anvar Orazbayev axborot berdi. Axborotda mahallalarda tadbirkorlikni rivojlantirish, aholi bandligini taʼminlash va kambagʻallikni qisqartirish boʻyicha kelib tushayotgan murojaatlarni tahlil qilgan holda, hokim yordamchilari faoliyatining natijadorligini oʻrganish yakunlari boʻyicha deputatlarga maʼlumotlar berildi.

Sessiyada tuman Iqtisodiyot va moliya boʻlimi bosh hisobchisi Abay Sagʻinbayev mahalliy byudjetning 2024-yil 1-chorakdagi ijrosi xususida hisobot berdi. Qayd etilganidek, 1-chorak davomida mahalliy byudjetning daromadlar qismi aniqlangan reja prognozi salkam 13,95 mlrd soʻm qilib belgilangan boʻlib, haqiqatda 14,5 mlrd soʻmga, yaʼni 104,2 foizga bajarilgan. Yilning 1-choragi davomida byudjet hisobidan salkam 57,8 mlrd soʻmlik mablagʻlar sarflangan.

Kun tartibidagi navbatdagi masala yuzasidan Davlat kadastrlari palatasi Amudaryo tumani filiali boshligʻi Sherzod Sultanov hisobot berdi. Maʼlumki, Oʻzbekiston Respublikasi Prezidentining 2023-yil 28-iyul kungi PF-119-sonli farmoni bilan Qoraqalpogʻiston Respublikasi hududida fuqarolarning huquq belgilovchi hujjatlarsiz qurilgan uy-joylari joylashgan yer uchastkasiga ijara huquqini, unda joylashgan bino va inshootlarga mulk huquqini eʼtirof etish toʻgʻrisidagi takliflar qoʻllab-quvvatlangan.

Ushbu farmonga koʻra agar fuqaro uy-joydan 2018-yil 1-maygacha boʻlgan davrdan boshlab oʻziniki kabi halol, oshkora va uzluksiz foydalangan, ushbu holat kosmik suratlarni qayta ishlash orqali hamda soʻnggi besh yil uchun yer soligʻi va mol-mulk soligʻi toʻlanganligi bilan tasdiqlangan boʻlsa yer uchastkasiga ijara huquqi hamda bino va inshootlarga mulk huquqini eʼtirof etish uchun asos boʻladi.

Davlat kadastrlari palatasining tuman filiali tomonidan tuzilgan ishchi guruh tomonidan 4795 nafar jismoniy shaxslar tomonidan qurilgan uy-joylarning kadastr hujjatlari yoʻqligi aniqlanib, shundan 3725ta uy-joylarga nisbatan ijobiy xulosalar berilgan. Sessiyada mazkur farmon talablariga javob beradigan va soliq organlaridan qarzdorligi boʻlmagan, belgilangan bir martalik yigʻimni toʻlagan fuqarolarga tegishli boʻlgan yer uchastkalariga ijara huquqi hamda bino va inshootlarga mulk huquqini eʼtirof etish boʻyicha Kengash qarori qabul qilindi.

Sessiya kun tartibidagi soʻnggi masala yuzasidan tuman Fermer, dehqon xoʻjaliklari va tomorqa yer egalari kengashi raisi Ilhom Palvanov hisobot berdi. Ushbu masala boʻyicha qabul qilingan Kengash qarori bilan yoshlarning bandligini taʼminlash maqsadida tumanning turli hududlaridagi umumiy maydoni 22,3 gektar boʻlgan ekin maydonlarini e-auksion elektron savdo platformasiga chiqarishga ruxsat berildi.

Sessiya kun tartibiga kiritilgan barcha masalalar atroflicha koʻrib chiqilib, faol muhokamalardan keyin barcha masalalar boʻyicha tegishli qarorlar qabul qilindi.