Xotira va qadrlash kuni munosabati bilan 65-sonli maktabda voleybol musobaqalari oʻtkazildi

9-may – Xotira va qadrlash kuni munosabati bilan mamlakatimizning barcha joylaridagi taʼlim maskanlarida, mehnat jamoalarida xotira kechalari, maʼnaviy-maʼrifiy tadbirlar oʻtkazilib, oʻtganlar xotirasi yodga olinmoqda hamda nuroniylarga ehtirom koʻrsatilmoqda. Amudaryo tumanidagi 65-sonli maktabda ham tajribali oʻqituvchi, marhum Durdiboy Ataboyevning xotirasiga bagʻishlab sportning voleybol turi boʻyicha musobaqa tashkil etildi.

Tadbirni 65-sonli maktab drektori Shahnoza Xoʻjamurotova ochib, xotira kechasi hamda musobaqa ishtirokchilarini yaqinlashib kelayotgan bayram bilan qutladi. Ustoz Durdiboy Ataboyevning qizi Bogʻdagul Ataboyeva, doʻsti, kursdoshi va hamkasbi Yoʻldoshboy Oʻrazimbetovlar yigʻilganlarga marhumning hayot yoʻli, ibratli ishlari haqida oʻz xotiralarini soʻzlab berdilar.

Aytib oʻtish kerakki, Durdiboy Ataboyev 1939-yilda sobiq Qipchoq tumanining Koʻkchi mahallasida oddiy dehqon oilasida dunyoga kelgan. Uning ayni yoshlik davri Ikkinchi jahon urushining ogʻir va suronli yillariga toʻgʻri keladi.

U yoshlik chogʻida sportga qiziqishi tufayli 1959-yilda Nukus Davlat pedagogika institutning jismoniy tarbiya fakultetiga oʻqishga kirib, ushbu dargohning sport musobaqalarida faol ishtirok etdi. Keyinchalik oʻqishni oliy baholarga muvaffaqiyatli tamomlab, 1963-yilda tumanimizdagi sobiq Yoʻldosh Oxunboboyev nomli oʻrta maktabiga ishga kirdi. Oʻz faoliyati davomida oʻquvchilarga qunt bilan bilim berib, ularni sportga oshno qildi.

Durdiboy Ataboyev oʻzining serqirra faoliyati davomida tumanimizning 11-sonli va 18-sonli maktablarida dars berib, yuzlab sportsevar yoshlar hamda shogirdlar tayyorladi hamda ovul yoshlarining suyukli ustoziga aylandi.

Ushbu xotira kechasi yana shu jihati bilan ahamiyatliki, u maktab jamoasining hamjihatligi, avlodlar oʻrtasidagi aloqalarni mustahkamlashda ham vosita boʻldi. Zero, bu aloqalar nafaqat oʻqituvchilar va oʻquvchilar oʻrtasidagi munosabatlarni mustahkamlaydi, balki taʼlim sifatini oshirish va maktabdagi ijtimoiy-maʼnaviy muhitni yaxshilashda ham muhim rol oʻynaydi. Bu kabi tashabbuslar kelgusida maktab oʻqituvchilari va oʻquvchilari oʻrtasidagi muloqotni yanada kuchaytirish, ular oʻrtasida oʻzaro hurmat va qadrdonlik tuygʻularini rivojlantirish, shuningdek, yoshlarning ijtimoiy faolligini oshirish orqali jamiyat rivojiga ham hissa qoʻshadi.

Maktab maʼmuriyati va ishtirokchilar tadbir tashkilotchilari – 65-sonli maktabning jismoniy tarbiya fani oʻqituvchilari Sanjarbek Urazboyev, Rustam Boltaboyev, Oʻktam Boltaboyev hamda 24-sonli maktabning jismoniy tarbiya fani oʻqituvchisi Davlatyor Rajapovlarga minnatdorchilik bildirdilar.

Murosasiz va keskin bahslarga boy boʻlgan voleybol musobaqalari esa nafaqat ishtirokchilar, tomoshabinlarning ham sportga ishtiyoqini yanada oshirdi. Zero, sport insonning jismoniy va maʼnaviy kamolotida muhim rol oʻynaydi. U nafaqat sogʻlom turmush tarzini shakllantirishga, balki shaxsning ijtimoiylashuvi va maʼnaviy rivojlanishiga ham katta taʼsir koʻrsatadi.

Sport shuningdek, yoshlarni sogʻlom va barkamol qilib tarbiyalashda, ularning jismoniy va psixologik salomatligini mustahkamlashda ham katta rol oʻynaydi. Shu bilan birga, sport orqali inson oʻzining ichki imkoniyatlarini namoyon qilish va shaxsiy maqsadlariga erishish uchun kerakli motivatsiya va intilishni rivojlantirish imkoniyatiga ega boʻladi.

Ana shunday ulkan maʼnaviy va ijtimoiy ahamiyatga ega boʻlgan tadbir soʻngida gʻoliblarga va ishtirokchi jamoalarga diplom hamda esdalik sovgʻalari topshirildi.