MAKTABDA KITOBLAR MUTOLAASINING AHAMIYaTI TARGʻIB ETILDI

Kitob beminnat doʻst, maslahatchi, maslakdosh. Bu soʻzlar shunchaki aytilmaydi, balki zamiridagi olam-olam maʼnoni anglash mushkul emas. Chindan-da kitob mutolaasi kishi shuurini oʻtkirlaydi, dunyoga ziyrak, masʼum koʻz bilan qarashga oʻrgatadi. Shu tariqa hayotni, oʻzligingni anglaysan va el koriga yaraydigan inson boʻlging, kimlargadir kerakligingni his qilib yashaging keladi. Yaxshi kitobdan olingan taassurotlar yuragingni shirin orzularga toʻldiradi.

Muhtaram Prezidentimizning kitob mutolaasini ommalashtirishga, ayniqsa, oʻsmirlar, yoshlar orasida kitob oʻqish ahamiyatini keng targʻib etishga, kitobxon yoshlarni ragʻbatlantirishga ulkan eʼtibor berayotgani bejiz emas. Chunki bugungiday globallashuv jarayoni shiddat bilan kechayotgan, dunyoning turli hududlarida urush-nizolar, qarama qarshiliklar tobora kuchayayotgan bir davrda mustaqil fikrlaydigan, sogʻlom dunyoqarash va mustahkam irodaga ega yoshlarni tarbiyalash, ular ongida sogʻlom dunyoqarash, milliy va umuminsoniy qadriyatlarga hurmat hissini tarbiyalash dolzarb vazifa hisoblanadi. Bunda albatta, kitob mutolaasi asosiy vositalardan biridir.

“Taraqqiyot koʻzgusi” gazetasi tahririyati amalga oshirayotgan “Bilimli va maʼnaviyatli yoshlar bilan – Uchinchi Renessans sari” grant loyihasida ham badiiy kitoblar targʻibotiga alohida oʻrin berilgan.

Yaqinda tumanimizning Doʻrman ovuli hududida faoliyat yuritayotgan 84-sonli maktabda oʻtkazilgan “Bolalar va oʻsmirlar kitob haftaligi”da ham oʻquvchi yoshlarga “Taraqqiyot koʻzgusi” gazetasi tahririyati qoshida tashkil etilgan kutubxona kitoblari namoyish etildi. Loyiha koordinatori Oygul Rajabova dastlab oʻquvchilarga kitob oʻqish ahamiyati xususida, ularning kitob oʻqishlari, maʼnaviyatli, bilimli va yetuk insonlar boʻlib voyaga yetishlari uchun davlatimiz tomonidan yaratilayotgan sharoitlar xususida batafsil toʻxtaldi.

Gazetaning maxsus muxbiri Mahmudjon Shomurodov, mazkur maktab direktori Erkin Qurbonboyevlar ham oʻquvchilarga kitob oʻqish ahamiyati haqida gapirdilar. Oʻquvchilar namoyish etilgan kitoblarni qiziqib tomosha qildilar va kutubxonaga kelib, aʼzo boʻlish istagini bildirdilar.

Aytish joizki ushbu maktab oʻquvchilari orasida azaldan kitobxonlik keng ommalashgan. “Kitobxon oila” respublika tanlovida gʻolib boʻlib, Yurtboshimizning sovgʻasi – “Spark” avtomobilini olishga erishgan sobiq oʻquvchisi haqida oʻqituvchilar faxrlanib gapirishadi.

Grant loyihasi rejasida kitobxonlik targʻibotiga alohida eʼtibor qaratilgani bejiz emas. Bu dunyo miqyosida dolzarb masalalardan hisoblanadi. Shu boisdan ham har yili buyuk bolalar adibi Xans Kristian Andersen tugʻilgan oy – aprel oyida Xalqaro bolalar kitobi kuni nishonlanadi. Sana munosabati bilan tashkillashtiriladigan tadbirlarda bolalarga kitoblar sovgʻa qilinadi, ularning kitobxonlik darajasi sinovdan oʻtkaziladi, kitob oʻqishga ragʻbatlantiriladi. Ushbu sana mamlakatimizda ham keng nishonlanib, eng sara bolalar kitoblari targʻib etiladi.

Grant loyihasi doirasida oʻtkazilgan tadbir oʻquvchilarda ulkan taassurotlar qoldirdi va yoshlarni kitoblar mutolaasiga ragʻbatlantirdi.

Sevara ISMOILOVA.