Endilikda xalq deputatlari tuman Kengashi deputatlari va “Mahalla yettiligi” hamkorlikda faoliyat yuritadi

Maʼlumki, 2024-yil 4-aprel kuni Oʻzbekiston Respublikasi Oliy Majlisi Senati Kengashining “Mahallalardagi muammolarni hal etishda xalq deputatlari mahalliy Kengashlari deputatlari va senatorlarning “Mahalla yettiligi” bilan oʻzaro hamkorligini yoʻlga qoʻyish chora-tadbirlari toʻgʻrisida”gi qarori qabul qilingan edi. Mazkur qaror bilan xalq deputatlari mahalliy Kengashlari deputatlari va “Mahalla yettiligi”ning oʻzaro hamkorlik yoʻnalishlari tasdiqlandi.

20-aprel kuni Amudaryo tumani hokimligida ushbu qarordan kelib chiqadigan vazifalar ijrosiga bagʻishlangan yigʻilish oʻtkazildi. Yigʻilishda mazkur masala boʻyicha Amudaryo tumaniga biriktirilgan senator – Oʻzbekiston kasaba uyushmalari Federatsiyasining Qoraqalpogʻiston Kengashi raisi Uliqbek Jalmenov, tuman hokimi Sobir Xoʻjametov, Joʻqorgʻi Kengesning tumandan saylangan deputatlari, xalq deputatlari tuman Kengashi deputatlari, hokimlik va idora-tashkilotlar masʼullari qatnashdi.

Yigʻilishda taʼkidlanganidek, endilikda aholining ijtimoiy xizmatlardan xabardorligini oshirish, muammolarini hal etish, hududlarda sogʻlom ijtimoiy-maʼnaviy muhitni saqlash, tadbirkorlikni rivojlantirish, bandlikni taʼminlash, kambagʻallikni qisqartirish, xotin-qizlarni har tomonlama qoʻllab-quvvatlash va ragʻbatlantirish kabi masalalarda xalq deputatlari mahalliy Kengashlari deputatlari va “Mahalla yettiligi” oʻzaro hamkorlikda faoliyat yuritadi.

Bundan tashqari, ushbu hamkorlik yoshlarni qoʻllab-quvvatlash va ularning ijtimoiy faolligini oshirish, mahallada huquqbuzarliklarning oldini olish, jamoat tartibini saqlash, aholiga davlat tomonidan koʻrsatiladigan ijtimoiy xizmatlar sifatini oshirish, mahalliy byudjet daromadlari barqarorligini taʼminlash kabi masalalarni ham qamrab oladi.

Qaror bilan tuman va shahar Kengashi deputatlariga bir oy davomida oʻzi biriktirilgan mahalladagi “Mahalla yettiligi” tomonidan amalga oshirilgan ishlar holatini oʻrganish, bunda “Mahalla yettiligi” tomonidan koʻrsatiladigan ijtimoiy yordam va ajratiladigan subsidiyalarning manzilliligi va asosliligiga alohida eʼtibor qaratish, mahalla fuqarolarining qabulini tashkil etish, aniqlangan muammolarni imkon qadar joyida hal etish choralarini koʻrish topshirilgan.

Oʻrganish va aholi bilan muloqot natijalari boʻyicha aniqlangan kamchiliklar hamda bildirilgan takliflar umumlashtirilib, tuman Kengashi kotibiyatiga taqdim etiladi. Xalq deputatlari tuman Kengashi kotibiyati esa deputatlar tomonidan taqdim etilgan muammolarni tegishliligi boʻyicha doimiy komissiyalar oʻrtasida oʻrganish uchun taqsimlaydi. Tuman kengashining doimiy komissiyalari har oyda deputatlar hamda “Mahalla yettiligi” tomonidan koʻtarilgan muammolarni mutasaddi idoralar vakillari bilan birgalikda oʻrganib, sayyor tarzda muhokama qiladi va hal etish choralarini koʻradi. Oʻrganish natijalari boʻyicha oʻz yechimini topmagan muammolar esa Kengash sessiyasi muhokamasiga kiritadi.

Endilikda tuman va shahar Kengashlari har chorakda hududdan saylangan senator va Joʻqorgʻi Kenges yoki tegishli viloyat Kengashi deputatlari ishtirokida sessiya oʻtkazadi. Sessiyada “Mahalla yettiligi” faoliyati va ular bilan hamkorlik samaradorligini oshirish masalalari muhokama qilinadi. Shuningdek, Mahalla uyushmasi tuman va shahar boʻlimi rahbarlarining Mahallaning ijtimoiy-iqtisodiy muammolarini hal etish jamgʻarmasi daromadlari va xarajatlari ijrosi toʻgʻrisidagi hisoboti eshitiladi. Bundan tashqari, fuqarolar yigʻini raislarining faoliyatiga baho beriladi, oʻz faoliyatida jiddiy xato va kamchiliklarga yoʻl qoʻygan mahalla raisiga nisbatan ishonchsizlik bildiriladi.  

Yigʻilishda Oliy Majlis Senati Kengashining yuqoridagi qarorini amalga oshirish mexanizmlari, xalq deputatlari tuman Kengashi deputatlari va “Mahalla yettiligi”ning oʻzaro hamkorlikda faoliyat yuritishini taʼminlashda eʼtibor qaratish lozim boʻlgan jihatlarga batafsil toʻxtalib oʻtildi.

Aytish kerakki, “Mahalla yettiligi” – Kengash – Senat” uch boʻgʻinli hamkorlik mexanizmining amaliyotga tatbiq etilishi mahallalardagi ishlarni tizimli va samarali tashkil etishga, muammolar yuzasidan oʻz vaqtida va taʼsirchan deputatlik, Kengash va Senat nazorati oʻrnatilishiga xizmat qiladi.

Gʻ.Yeshniyozov, Xalq deputatlari Amudaryo tuman Kengashi raisining oʻrinbosari.