Gʻoʻza qator oralariga ishlov berish boʻyicha koʻrgazmali seminar oʻtkazildi

18-aprel kuni Amudaryo tumanining Doʻrman ovulidagi “Pirnazarov Toʻraboy” fermer xoʻjaligi dalasida gʻoʻza qator oralariga ishlov berish hamda gʻoʻza tarbiyasidagi boshqa agrotexnik tadbirlar boʻyicha koʻrgazmali seminar oʻtkazildi.

Seminarda Qoraqalpogʻiston Republikasi Vazirlar Kengashi Raisi Farhod Ermonov, Joʻqorgʻi Kenges qoʻmitasi masʼul xodimi Anvar Jumanazarov, tuman hokimi Sobir Xoʻjametov, qishloq xoʻjaligi sohasi masʼullari va fermerlar ishtirok etishdi.

Ishtirokchilar dastlab fermer xoʻjaligi dalasida gʻoʻza qator oralariga dastlabki ishlov berish jarayoni bilan yaqindan tanishdilar. Qayd etilganidek, gʻoʻza qator oralariga ishlov berish jarayoni tuproqning mexanik va biologik xususiyatlarini yaxshilaydi. Tuproqning yumshatilishi, tuproqda mikroorganizmlarning faoliyatini yaxshilaydi, bu esa tuproqning oziq moddalari bilan boyishiga yordam beradi.

Seminarda soʻzga chiqqanlar tomonidan taʼkidlanganidek, gʻoʻza tarbiyasida qator oralariga ishlov berish va kultivatsiya, yaganalash jarayonlari oʻta muhim tadbirlar sirasiga kiradi. Qator oralariga dastlabki ishlov berish, yaʼni gʻoʻza qatorlari orasini haydash yoki yumshatish, tuproqning havo va suv oʻtkazish xususiyatlarini yaxshilaydi, bu esa oʻsimlik ildizlarining nafas olishini va oziqlanishini yaxshilaydi.

Kultivatsiya gʻoʻza qatorlari atrofidagi begona oʻtlarni yoʻqotish orqali gʻoʻzaga koʻproq yorugʻlik va oziq moddalar yetib borishiga ham yordam beradi. Yaganalash esa gʻoʻzaning har bir metrga toʻgʻri keladigan nihollari sonini optimallashtirish orqali gʻoʻza oʻsimliklarining bir-biriga teng sharoitda oʻsishini taʼminlaydi. Bu ishlovlarning barchasi gʻoʻza dalalarining umumiy holatini yaxshilashga va hosildorlikni oshirishga xizmat qiladi.

Aytish joizki, joriy yilda Amudaryo tumani boʻyicha jami 13900 gektar maydonga chigit ekilgan. Ayni kunlarda chigitlar nish urib, unib chiqmoqda va dalalardan tekis nihol olinmoqda.

Seminarda soʻzga chiqqan masʼullar va mutaxassislar gʻoʻza qator oralariga dastlabki ishlov berish paxta yetishtirishning muhim bosqichlaridan biri hisoblanishini alohida qayd etishdi.

Bu jarayon oʻsimliklarning toʻgʻri va sogʻlom oʻsishi uchun zarur boʻlgan sharoitlarni yaratishga yordam beradi. Shuningdek, bu ishlov begona oʻtlarning oʻsishini cheklaydi va tuproqning qatqaloq qavatini yoʻqotishga yordam beradi, natijada oʻsimliklar oʻsishi va rivojlanishi uchun qulay muhit vujudga keladi. Ushbu jarayonda tuproqning fizik va biologik xususiyatlari yaxshilanadi, bu esa oʻsimliklarning suv va oziq moddalardan samarali foydalanishiga imkon beradi. Ishlov berish jarayonidan keyin tuproqning yuqori qavati yumshab, oʻsimlik ildizlarining kengayishi va chuqurroqqa oʻsishiga imkon yaratiladi.

Gʻoʻza qator oralariga ishlov berish oʻsimliklarning kasalliklarga chalinish xavfini ham kamaytiradi va ildiz chirish kasalliklarining oldini olishda muhim omil sanaladi.

Masʼullar ushbu agrotexnik jarayonni sifatli amalga oshirish orqali suvdan samarali foydalanishga ham zamin yaratish lozimligini alohida qayd etdilar. Zero, tuproqning yumshatilishi suvning tuproqqa kirib borishini va undan teng tarqalishini taʼminlaydi, bu esa suvning bekorga sarflanishining oldini oladi. Bundan tashqari, tuproqning yumshatilishi suvning bugʻlanib ketishini kamaytiradi, bu esa suv resurslarini tejashga yordam beradi.

Seminarda qishloq xoʻjaligi sohasi mutaxassislari ayni kunlarda gʻoʻza tarbiyasida dolzarb hisoblanadigan agrotexnik tadbirlarni oʻz vaqtida va sifatli amalga oshirish boʻyicha tavsiyalar berib, ishtirokchilarning savollariga batafsil javoblar qaytardi.

Gʻ.Yeshniyozov