Mangʻitda Ichki ishlar vazirligining ashula va raqs ansambli tomonidan xayriya kontserti oʻtkazildi
Oʻzbekiston Respublikasi Ichki ishlar vazirining tegishli buyrugʻiga asosan tasdiqlangan reja boʻyicha ayni kunlarda mamlakatimiz boʻylab vazirlik tasarrufidagi ashula va raqs ansamblining kontsert dasturlari oʻtkazilmoqda.
18-aprel kuni Amudaryo tumanidagi Bolalar va oʻsmirlar sport maktabiga qarashli sport maydonida ham ana shunday xayriya kontserti boʻlib oʻtdi.
Kontsert dasturida asosan, ichki ishlar organlari xodimlari, tizim faxriylari, shuningdek, xizmat vazifasini bajarish vaqtida halok boʻlgan yoki nogiron boʻlib qolgan xodimlarning oila aʼzolari ishtirok etishdi.
Tadbirda Oʻzbekistonda xizmat koʻrsatgan artist, Oʻzbekiston Respublikasi Ichki ishlar vazirligi Madaniyat saroyi rahbari podpolkovnik Uchqun Tillayev, ansambl aʼzolari – xalqimiz sevgan soʻz ustalari Oʻtkir Muxammadxoʻjayev, Zokir Ochildiyev, xushovoz xonandalar Feruza Jumaniyozova, Ulugʻbek Xoliqov, Suhrobbek Hamdamov va Nurali Shukurullayevlar ishtirok etib, oʻzlarining chiqishlari bilan tomoshabinlar kayfiyatini koʻtarib, zavq-shavq ulashdi.
Ushbu hayriya kontsert dasturini tashkillashtirishdan asosiy maqsad, vatanimiz tinchligini va osoyishtaligini taʼminlash yoʻlida oʻzlarining shirin jonlaridan, oromidan kechib, xizmat vazifalarini bajarish chogʻida vafot etgan ichki ishlar organlari xodimlarining oila aʼzolarini qoʻllab-quvvatlash, ularga mehr ulashish, moddiy va maʼnaviy yordam koʻrsatishdan iboratdir.
Shuni ham aytish joizki, madaniyat va sanʼat yoshlarni vatanparvarlik ruhida tarbiyalashda muhim rol oʻynaydi. Kelajagimiz egalarini Vatanga sadoqat ruhida kamolga yetkazishda, shuningdek, ular ongiga milliy qadriyatlar va anʼanalarga hurmat hissini singdirishda ham sanʼatning oʻrni alohida.
Shu maqsadda tashkil qilingan Ichki ishlar vazirligi ashula va raqs ansambli ham koʻp yillardan buyon faoliyat yuritib, har yili mamlakatimizning turli hududlariga gastrol safarlarini tashkil etib keladi. Olis va chekka hududlarda oʻtkazilayotgan kontsert dasturlarida ham minglab yurtdoshlarimiz ishtirok etib, ansambl aʼzolarining vatanparvarlik ruhi yoʻgʻrilgan ijod namunalaridan bahramand boʻlmoqda. Ayniqsa, badiiy soʻz ustalarining chiqishlari kontsert dasturi ishtirokchilarining olqishlariga sazovor boʻlmoqda.
Bu kabi xayriya kontsertlari jamiyatimizda maʼnaviy qadriyatlarni yanada mustahkamlash va vatanparvarlik tuygʻularini kuchaytirishda muhim rol oʻynaydi hamda sanʼat va madaniyatni yanada ommalashtirish, ijtimoiy masʼuliyat va yurt taqdiriga daxldorlik tuygʻularini targʻib qilish orqali jamiyatimizning turli qatlamlari oʻrtasida oʻzaro doʻstlik va birodarlik rishtalarini yanada mustahkamlashga xizmat qiladi.
Kontsert yakunida xizmat vazifasini bajarish vaqtida halok boʻlgan va nogiron boʻlib qolgan xodimlarning oila aʼzolariga esdalik sovgʻalari topshirildi va ularning qahramonliklari xotirlanib, yuksak eʼtirof etildi.
Kontsert dasturi koʻtarinki ruhda oʻtdi va tamoshabinlarning olqish hamda eʼtiroflariga sazovor boʻldi. Tadbir davomida sanʼatkorlar va xonandalar tomonidan taqdim etilgan musiqiy chiqishlar, ijro qilingan kuy va qoʻshiqlar xalqimizning birdamligi va maʼnaviyatini yanada yuksaltirishga xizmat qilgani bilan nihoyatda ahamiyatli boʻldi.
Oʻzbekiston Respublikasi Ichki ishlar vazirligi qoshidagi ashula va raqs ansamblining xayriya kontsertlari mamlakatimiz boʻylab boshqa shahar va qishloqlarda ham davom etadi.
Umid Oʻrozaliyev, tuman IIB boshligʻining oʻrinbosari, podpolkovnik
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
