Манғитда Ички ишлар вазирлигининг ашула ва рақс ансамбли томонидан хайрия концерти ўтказилди

Ўзбекистон Республикаси Ички ишлар вазирининг тегишли буйруғига асосан тасдиқланган режа бўйича айни кунларда мамлакатимиз бўйлаб вазирлик тасарруфидаги ашула ва рақс ансамблининг концерт дастурлари ўтказилмоқда.

18 апрель куни Амударё туманидаги Болалар ва ўсмирлар спорт мактабига қарашли спорт майдонида ҳам ана шундай хайрия концерти бўлиб ўтди.

Концерт дастурида асосан, ички ишлар органлари ходимлари, тизим фахрийлари, шунингдек, хизмат вазифасини бажариш вақтида ҳалок бўлган ёки ногирон бўлиб қолган ходимларнинг оила аъзолари иштирок этишди.

Тадбирда Ўзбекистонда хизмат кўрсатган артист, Ўзбекистон Республикаси Ички ишлар вазирлиги Маданият саройи раҳбари подполковник Учқун Тиллаев, ансамбль аъзолари – халқимиз севган сўз усталари Ўткир Мухаммадхўжаев, Зокир Очилдиев, хушовоз хонандалар Феруза Жуманиёзова, Улуғбек Холиқов, Суҳроббек Ҳамдамов ва Нурали Шукуруллаевлар иштирок этиб, ўзларининг чиқишлари билан томошабинлар кайфиятини кўтариб, завқ-шавқ улашди.

Ушбу ҳайрия концерт дастурини ташкиллаштиришдан асосий мақсад, ватанимиз тинчлигини ва осойишталигини таъминлаш йўлида ўзларининг ширин жонларидан, оромидан кечиб, хизмат вазифаларини бажариш чоғида вафот этган ички ишлар органлари ходимларининг оила аъзоларини қўллаб-қувватлаш, уларга меҳр улашиш, моддий ва маънавий ёрдам кўрсатишдан иборатдир.

Шуни ҳам айтиш жоизки, маданият ва санъат ёшларни ватанпарварлик руҳида тарбиялашда муҳим рол ўйнайди. Келажагимиз эгаларини Ватанга садоқат руҳида камолга етказишда, шунингдек, улар онгига миллий қадриятлар ва анъаналарга ҳурмат ҳиссини сингдиришда ҳам санъатнинг ўрни алоҳида.

Шу мақсадда ташкил қилинган Ички ишлар вазирлиги ашула ва рақс ансамбли ҳам кўп йиллардан буён фаолият юритиб, ҳар йили мамлакатимизнинг турли ҳудудларига гастроль сафарларини ташкил этиб келади. Олис ва чекка ҳудудларда ўтказилаётган концерт дастурларида ҳам минглаб юртдошларимиз иштирок этиб, ансамбль аъзоларининг ватанпарварлик руҳи йўғрилган ижод намуналаридан баҳраманд бўлмоқда. Айниқса, бадиий сўз усталарининг чиқишлари концерт дастури иштирокчиларининг олқишларига сазовор бўлмоқда.

Бу каби хайрия концертлари жамиятимизда маънавий қадриятларни янада мустаҳкамлаш ва ватанпарварлик туйғуларини кучайтиришда муҳим роль ўйнайди ҳамда санъат ва маданиятни янада оммалаштириш, ижтимоий масъулият ва юрт тақдирига дахлдорлик туйғуларини тарғиб қилиш орқали жамиятимизнинг турли қатламлари ўртасида ўзаро дўстлик ва биродарлик ришталарини янада мустаҳкамлашга хизмат қилади.

Концерт якунида хизмат вазифасини бажариш вақтида ҳалок бўлган ва ногирон бўлиб қолган ходимларнинг оила аъзоларига эсдалик совғалари топширилди ва уларнинг қаҳрамонликлари хотирланиб, юксак эътироф этилди.

Концерт дастури кўтаринки руҳда ўтди ва тамошабинларнинг олқиш ҳамда эътирофларига сазовор бўлди. Тадбир давомида санъаткорлар ва хонандалар томонидан тақдим этилган мусиқий чиқишлар, ижро қилинган куй ва қўшиқлар халқимизнинг бирдамлиги ва маънавиятини янада юксалтиришга хизмат қилгани билан ниҳоятда аҳамиятли бўлди.

Ўзбекистон Республикаси Ички ишлар вазирлиги қошидаги ашула ва рақс ансамблининг хайрия концертлари мамлакатимиз бўйлаб бошқа шаҳар ва қишлоқларда ҳам давом этади.

Умид Ўрозалиев, туман ИИБ бошлиғининг ўринбосари, подполковник