Dala oʻquv seminarida Xitoydan keltirilgan yangi navdagi chigit boʻyicha maʼlumotlar berildi
Maʼlumki, davlatimiz rahbari tashabbusi bilan keyingi yillarda qishloq xoʻjaligida keng koʻlamli islohotlar amalga oshirilmoqda. Ayniqsa, paxtachilik sohasida mutlaqo yangi tizim yaratilib, chigit ekishdan tortib, uni parvarish qilish, hosilni yigʻib olish va qayta ishlashgacha boʻlgan barcha jarayolarga bozor tamoyillari joriy qilindi. Natijada fermer yerdan moʻl hosil olib, daromadini yanada oshirishga, klaster esa yetishtirilgan hosilni qayta ishlab, qoʻshimcha qiymat yaratishga ustuvor ahamiyat qaratmoqda.
Paxtaning hosildorligi va undan olinadigan mahsulotlarning sifati asosan urugʻlik chigitning naviga bogʻliq. Chigit yuqori sifatli, oliy navli, tuproq va iqlim sharoitlariga mos, sogʻlom, kasallik hamda zararkunandalarga chidamli boʻlishi lozim.
Davlatimiz rahbari tashabbusi bilan Xitoydan olib kelingan chigitni yurtimiz dalalariga ekish tashabbusi ham aynan shu maqsadga qaratilgani bilan ahamiyatlidir.
Qoraqalpogʻistonda tajriba-sinov tariqasida yerga qadalayotgan mazkur yangi navdagi chigitning parvarishi boʻyicha xorijiy va mahalliy olimlar tomonidan ilgʻor va zamonaviy qishloq xoʻjaligi agrotexnologiyalari ishlab chiqilib, amaliyotga joriy qilinmoqda.
Shu mavzuda Amudaryo tumanida oʻtkazilgan navbatdagi dala oʻquv seminarida tuman hokimi Sobir Xoʻjametov, qishloq xoʻjaligi sohasi masʼullari, fermerlar ishtirok etishdi. Respublikadagi yetakchi ilmiy idoralar va xorijdan tashrif buyurgan mutaxassislar Xitoydan keltirilgan yangi navning ahamiyati, uni ekish va parvarishlashda eʼtiborga olish lozim boʻlgan jihatlarga toʻxtalib oʻtdilar.
Mutaxassislar yangi chigit navining tuproq va iqlim sharoitimizga moslashib, yuqori hosil berishi uchun ekish jarayonida oʻziga xos jihatlarga eʼtibor qaratish, vegetatsiya davrida alohida nazoratga olish va hosil yetilganidan keyin uning aprobatsiyasini toʻgʻri va oʻz muddatida oʻtkazish borasida oʻz takliflarini berib oʻtdi. Ushbu tavsiya va koʻrsatmalarga amal qilinsa, hosildorlik bir necha baravar yuqori boʻlishi taʼkidlandi.
Eng asosiysi, ushbu amaliy ishlar, qishloq xoʻjaligida qilinayotgan har bir islohot dehqon va fermerning, qishloq ahlining hayot tarzini va iqtisodini yanada yaxshilash, xalq farovonligini oshirishga xizmat qilishi qayd etildi.
Darhaqiqat, aholini sifatli oziq-ovqat mahsulotlari bilan taʼminlashda qishloq xoʻjaligi ekinlaridan moʻl hosil olish katta ahamiyat kasb etadi. Yetishtirilayotgan qishloq xoʻjaligi mahsulotlarining hajmi oshishi esa oziq-ovqat xavfsizligiga erishishda hal qiluvchi omildir.
Mamlakatimiz agrar sohada amalga oshirilayotgan islohotlar, davlatimiz rahbari tomonidan soha mutasaddilari oldiga qoʻyilayotgan vazifalardan kutilayotgan natija ham ana shu yuksak maqsadlarni roʻyobga chiqarishga qaratilgandir.
Oʻtkazilgan dala oʻquv seminarida Toshkent shahridagi yetakchi ilmiy idoralar va xorijdan tashrif buyurgan mutaxassislar amudaryolik fermerlarga Xitoy xalq respublikasidan keltirilgan yangi navdagi chigitni ekish, chigit unib chiqqanidan keyin dastlabki ishlov berish, qator oralarini yumshatish, vegetatsiya davrida suvga boʻlgan ehtiyojini taʼminlash, zararkunanda xasharotlarga qarshi ishlov berish, hosil toʻplash jarayonida agrotexnik tadbirlarni amalga oshirish, defoliatsiya va yigʻib-terib olish jarayonida eʼtibor qaratish lozim boʻlgan jihatlar haqida batafsil maʼlumotlar berdilar va ishtirokchilarning savollariga ilmiy asoslangan javoblar qaytardilar.
Gʻ.Yeshniyozov
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
