Дала ўқув семинарида Хитойдан келтирилган янги навдаги чигит бўйича маълумотлар берилди
Маълумки, давлатимиз раҳбари ташаббуси билан кейинги йилларда қишлоқ хўжалигида кенг кўламли ислоҳотлар амалга оширилмоқда. Айниқса, пахтачилик соҳасида мутлақо янги тизим яратилиб, чигит экишдан тортиб, уни парвариш қилиш, ҳосилни йиғиб олиш ва қайта ишлашгача бўлган барча жараёларга бозор тамойиллари жорий қилинди. Натижада фермер ердан мўл ҳосил олиб, даромадини янада оширишга, кластер эса етиштирилган ҳосилни қайта ишлаб, қўшимча қиймат яратишга устувор аҳамият қаратмоқда.
Пахтанинг ҳосилдорлиги ва ундан олинадиган маҳсулотларнинг сифати асосан уруғлик чигитнинг навига боғлиқ. Чигит юқори сифатли, олий навли, тупроқ ва иқлим шароитларига мос, соғлом, касаллик ҳамда зараркунандаларга чидамли бўлиши лозим.
Давлатимиз раҳбари ташаббуси билан Хитойдан олиб келинган чигитни юртимиз далаларига экиш ташаббуси ҳам айнан шу мақсадга қаратилгани билан аҳамиятлидир.
Қорақалпоғистонда тажриба-синов тариқасида ерга қадалаётган мазкур янги навдаги чигитнинг парвариши бўйича хорижий ва маҳаллий олимлар томонидан илғор ва замонавий қишлоқ хўжалиги агротехнологиялари ишлаб чиқилиб, амалиётга жорий қилинмоқда.
Шу мавзуда Амударё туманида ўтказилган навбатдаги дала ўқув семинарида туман ҳокими Собир Хўжаметов, қишлоқ хўжалиги соҳаси масъуллари, фермерлар иштирок этишди. Республикадаги етакчи илмий идоралар ва хориждан ташриф буюрган мутахассислар Хитойдан келтирилган янги навнинг аҳамияти, уни экиш ва парваришлашда эътиборга олиш лозим бўлган жиҳатларга тўхталиб ўтдилар.
Мутахассислар янги чигит навининг тупроқ ва иқлим шароитимизга мослашиб, юқори ҳосил бериши учун экиш жараёнида ўзига хос жиҳатларга эътибор қаратиш, вегетация даврида алоҳида назоратга олиш ва ҳосил етилганидан кейин унинг апробациясини тўғри ва ўз муддатида ўтказиш борасида ўз таклифларини бериб ўтди. Ушбу тавсия ва кўрсатмаларга амал қилинса, ҳосилдорлик бир неча баравар юқори бўлиши таъкидланди.
Энг асосийси, ушбу амалий ишлар, қишлоқ хўжалигида қилинаётган ҳар бир ислоҳот деҳқон ва фермернинг, қишлоқ аҳлининг ҳаёт тарзини ва иқтисодини янада яхшилаш, халқ фаровонлигини оширишга хизмат қилиши қайд этилди.
Дарҳақиқат, аҳолини сифатли озиқ-овқат маҳсулотлари билан таъминлашда қишлоқ хўжалиги экинларидан мўл ҳосил олиш катта аҳамият касб этади. Етиштирилаётган қишлоқ хўжалиги маҳсулотларининг ҳажми ошиши эса озиқ-овқат хавфсизлигига эришишда ҳал қилувчи омилдир.
Мамлакатимиз аграр соҳада амалга оширилаётган ислоҳотлар, давлатимиз раҳбари томонидан соҳа мутасаддилари олдига қўйилаётган вазифалардан кутилаётган натижа ҳам ана шу юксак мақсадларни рўёбга чиқаришга қаратилгандир.
Ўтказилган дала ўқув семинарида Тошкент шаҳридаги етакчи илмий идоралар ва хориждан ташриф буюрган мутахассислар амударёлик фермерларга Хитой халқ республикасидан келтирилган янги навдаги чигитни экиш, чигит униб чиққанидан кейин дастлабки ишлов бериш, қатор ораларини юмшатиш, вегетация даврида сувга бўлган эҳтиёжини таъминлаш, зараркунанда хашаротларга қарши ишлов бериш, ҳосил тўплаш жараёнида агротехник тадбирларни амалга ошириш, дефолиация ва йиғиб-териб олиш жараёнида эътибор қаратиш лозим бўлган жиҳатлар ҳақида батафсил маълумотлар бердилар ва иштирокчиларнинг саволларига илмий асосланган жавоблар қайтардилар.
Ғ.Ешниёзов
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
