Umumiy oʻrta taʼlim maktablarining 5-8-sinf oʻquvchilari oʻrtasida informatika yoʻnalishi boʻyicha fan olimpiadasining tuman bosqichi oʻtkazildi

Vazirlar Mahkamasining “Iqtidorli oʻquvchilar oʻrtasida fan olimpiadalarini oʻtkazish tizimini takomillashtirish hamda xorijiy tillarni oʻqitish boʻyicha eng yaxshi maktabni aniqlash tizimini joriy etish toʻgʻrisida”gi qarori hamda Oʻzbekiston Respublikasi Maktabgacha va maktab taʼlimi vazirligining 2024-yil 7-martdagi buyrugʻiga asosan umumiy oʻrta taʼlim maktablarining 5-8-sinf oʻquvchilari oʻrtasida informatika yoʻnalishi boʻyicha fan olimpiadasining Amudaryo tuman bosqichi oʻtkazildi.

6-aprel kuni tuman Maktabgacha va maktab taʼlimi boʻlimiga qarashli 82-sonli umumiy oʻrta taʼlim maktabi binosida boʻlib oʻtgan mazkur olimpiadaga tumandagi 85 ta umumiy oʻrta taʼlim maktablarining 5-8-sinflarida tahsil olayotgan 250 nafarga yaqin iqtidorli oʻquvchilar qatnashdilar.

Fan olimpiadasining tuman bosqichi ochilish marosimida Qoraqalpogʻiston Respublikasi Maktabgacha va maktab taʼlimi vazirligi tasarrufidagi Respublika taʼlim markazi buyrugʻi asosida biriktirilgan metodist Siroj Yuldashov, tuman Maktabgacha va maktab taʼlimi boʻlimi boshligʻi Yalgʻashboy Shamuratov, boʻlimning Maktablar faoliyatini muvofiqlashtirish shoʻʼbasi rahbari Ibragim Radjapov, boʻlim metodistlari Xabibulla Davletyarov va Rayhon Yakubova hamda olimpiada auditoriya rahbarlari, kuzatuvchilar, hakamlar ishtirok etishdi.

Ochilish marosimida tuman Maktabgacha va maktab taʼlimi boʻlimi boshligʻi Yalgʻashboy Shamuratov 5-8-sinf oʻquvchilari oʻrtasida informatika yoʻnalishi boʻyicha fan olimpiadasining maqsad va vazifalari haqida soʻz yuritdi. Boʻlim metodisti Rayhon Yakubova esa olimpiadani oʻtkazish tartib va qoidalari haqida batafsil maʼlumotlar berdi.

Shundan soʻng auditoriya rahbarlari, kuzatuvchilar ishtirokchilarni belgilangan xonalarga joylashtirib, Oʻzbekiston Respublikasi Maktabgacha va maktab taʼlimi vazirligi tomonidan taqdim qilingan topshiriqlarni tarqatdi va jarayon boshlandi.

Ishtirokchilarning bilimlarini sinash uchun nizom asosida 90 daqiqa vaqt ajratildi. Savollar 5-8-sinf oʻquvchilarining mantiqiy, tanqidiy, kreativ fikrlash qobiliyatlarini aniqlashga qaratilgan boʻlib, matematika fanidan 30 savoldan iborat topshiriqlar va nostandart masalalarni oʻz ichiga oladi.

Belgilangan vaqtdan keyin auditoriya rahbari tomonidan ishtirokchilarning javob varaqalari shifrlangan holda hakamlarga taqdim qilinib, ular tomonidan tekshirilib, natijalar aniqlandi.

Natijalarga koʻra fan olimpiadasining informatika yoʻnalishida 5-sinflar oʻrtasida 19-, 40-, 64-sonli maktablarning, 6-sinf oʻquvchilari orasida 18-, 22-, 33-sonli maktablarning, 7-sinflardan 29-, 6-, 71-sonli maktablarning hamda 8-sinf oʻquvchilari orasida 9-, 16-, 40-sonli maktablarning oʻquvchilari sovrinli oʻrinlarni egallab, uchinchi bosqich – Qoraqalpogʻiston Respublika bosqichida ishtirok etish uchun yoʻllanma oldilar. Sovrinli oʻrinlarni egallagan oʻquvchilar tuman Maktabgacha va maktab taʼlimi boʻlimi tomonidan diplom bilan taqdirlandi.

Bu kabi fan olimpiadalarining oʻtkazilishi taʼlim muassalari oʻquvchilari orasidan matematika, informatika fanlari boʻyicha bilimli, ushbu fanlarga qiziquvchi, intiluvchan va ijodkor yoshlarni aniqlash hamda ulardagi ijodiy qobiliyatlarni roʻyobga chiqarishga koʻmaklashib, iqtidorli oʻquvchilarni qoʻllab-quvvatlash va ragʻbatlantirishga xizmat qiladi.

Gʻ.Yeshniyozov