Умумий ўрта таълим мактабларининг 5-8-синф ўқувчилари ўртасида информатика йўналиши бўйича фан олимпиадасининг туман босқичи ўтказилди

Вазирлар Маҳкамасининг “Иқтидорли ўқувчилар ўртасида фан олимпиадаларини ўтказиш тизимини такомиллаштириш ҳамда хорижий тилларни ўқитиш бўйича энг яхши мактабни аниқлаш тизимини жорий этиш тўғрисида”ги қарори ҳамда Ўзбекистон Республикаси Мактабгача ва мактаб таълими вазирлигининг 2024 йил 7 мартдаги буйруғига асосан умумий ўрта таълим мактабларининг 5-8-синф ўқувчилари ўртасида информатика йўналиши бўйича фан олимпиадасининг Амударё туман босқичи ўтказилди.

6 апрель куни туман Мактабгача ва мактаб таълими бўлимига қарашли 82-сонли умумий ўрта таълим мактаби биносида бўлиб ўтган мазкур олимпиадага тумандаги 85 та умумий ўрта таълим мактабларининг 5-8-синфларида таҳсил олаётган 250 нафарга яқин иқтидорли ўқувчилар қатнашдилар.

Фан олимпиадасининг туман босқичи очилиш маросимида Қорақалпоғистон Республикаси Мактабгача ва мактаб таълими вазирлиги тасарруфидаги Республика таълим маркази буйруғи асосида бириктирилган методист Сирож Юлдашов, туман Мактабгача ва мактаб таълими бўлими бошлиғи Ялғашбой Шамуратов, бўлимнинг Мактаблар фаолиятини мувофиқлаштириш шўъбаси раҳбари Ибрагим Раджапов, бўлим методистлари Хабибулла Давлетяров ва Райҳон Якубова ҳамда олимпиада аудитория раҳбарлари, кузатувчилар, ҳакамлар иштирок этишди.

Очилиш маросимида туман Мактабгача ва мактаб таълими бўлими бошлиғи Ялғашбой Шамуратов 5-8-синф ўқувчилари ўртасида информатика йўналиши бўйича фан олимпиадасининг мақсад ва вазифалари ҳақида сўз юритди. Бўлим методисти Райҳон Якубова эса олимпиадани ўтказиш тартиб ва қоидалари ҳақида батафсил маълумотлар берди.

Шундан сўнг аудитория раҳбарлари, кузатувчилар иштирокчиларни белгиланган хоналарга жойлаштириб, Ўзбекистон Республикаси Мактабгача ва мактаб таълими вазирлиги томонидан тақдим қилинган топшириқларни тарқатди ва жараён бошланди.

Иштирокчиларнинг билимларини синаш учун низом асосида 90 дақиқа вақт ажратилди. Саволлар 5-8-синф ўқувчиларининг мантиқий, танқидий, креатив фикрлаш қобилиятларини аниқлашга қаратилган бўлиб, математика фанидан 30 саволдан иборат топшириқлар ва ностандарт масалаларни ўз ичига олади.

Белгиланган вақтдан кейин аудитория раҳбари томонидан иштирокчиларнинг жавоб варақалари шифрланган ҳолда ҳакамларга тақдим қилиниб, улар томонидан текширилиб, натижалар аниқланди.

Натижаларга кўра фан олимпиадасининг информатика йўналишида 5-синфлар ўртасида 19-, 40-, 64-сонли мактабларнинг, 6-синф ўқувчилари орасида 18-, 22-, 33-сонли мактабларнинг, 7-синфлардан 29-, 6-, 71-сонли мактабларнинг ҳамда 8-синф ўқувчилари орасида 9-, 16-, 40-сонли мактабларнинг ўқувчилари совринли ўринларни эгаллаб, учинчи босқич – Қорақалпоғистон Республика босқичида иштирок этиш учун йўлланма олдилар. Совринли ўринларни эгаллаган ўқувчилар туман Мактабгача ва мактаб таълими бўлими томонидан диплом билан тақдирланди.

Бу каби фан олимпиадаларининг ўтказилиши таълим муассалари ўқувчилари орасидан математика, информатика фанлари бўйича билимли, ушбу фанларга қизиқувчи, интилувчан ва ижодкор ёшларни аниқлаш ҳамда улардаги ижодий қобилиятларни рўёбга чиқаришга кўмаклашиб, иқтидорли ўқувчиларни қўллаб-қувватлаш ва рағбатлантиришга хизмат қилади.

Ғ.Ешниёзов