Gʻallani oziqlantirish boʻyicha seminar boʻlib oʻtdi

Kunlar isishi bilan qishloq xoʻjaligi yer maydonlarida, aholi tomorqalarida bahorgi ekishga tayyorgarlik ishlari boshlab yuboriladi. Amudaryo tumanida qishloq xoʻjaligi mahsulotlarini yetishtirish, ekish, parvarishlashga alohida eʼtibor qaratilib, bu borada fermerlar, qishloq xoʻjaligi masʼullari ishtirokida oʻzaro bilim va tajriba almashish maqsadida oʻquv-seminarlar tashkil etilmoqda.

Joriy yilning 9-mart sanasida tumanimizdagi Oq oltin ovulidagi “Yakubova Gavhar” fermer xoʻjaligi yer maydonida gʻallani oziqantirish mavzusida seminar boʻlib oʻtdi. Seminarda tuman hokimi Sobir Xoʻjametov, tumandagi sektorlar rahbarlari, fermerlar, qishloq xoʻjaligi soha masʼullari, yoshlar hamda respublika miqyosidagi agrar soha boʻyicha professorlar, ilmiy xodimlar ishtirok etdilar.

Seminarda tuman hokimi Sobir Xoʻjametov soʻzga chiqib, keyingi yillarda mamlakatimizda qishloq xoʻjaligini isloh qilish, xususan, sohada davlat boshqaruvi tizimini takomillashtirish, bozor munosabatlarini keng joriy qilish, qishloq xoʻjaligi mahsulotlarini yetishtiruvchi, qayta ishlovchi va sotuvchi subʼektlar oʻrtasidagi munosabatlarning huquqiy asosini mustahkamlash, sohaga investitsiyalarni jalb qilish, yangi texnologiyalarni joriy etish hamda qishloq xoʻjaligi mahsulotlari ishlab chiqaruvchilarni zamonaviy texnikalar bilan taʼminlash borasida tizimli ishlar amalga oshirilayotganligini taʼkidladi.

Shuningdek, Qoraqalpogʻiston Respublikasida xizmat koʻrsatgan qishloq xoʻjaligi xodimi, fan doktori, professor Zohidjon Ziyodullayev seminar ishtirokchilariga, fermerlar hamda qishloq xoʻjaligi soha masʼullariga kechki, rivojlanishdan orqada qolgan, kuzda oziqlantirilmagan gʻalla maydonlarida azotli oʻgʻitlar bilan oziqlantirish hamda sugʻorish ishlarini amalga oshirish lozimligini, gʻalladan yaxshi hosil olish borasidan oʻtkazilishi lozim boʻlgan agrotexnik tadbirlar haqida maʼlumotlar berib oʻtdi.

Maʼlumotlarda keltirilishicha, gʻallaga beriladigan oʻgʻit va suv oʻsimlik ildiz sistemasining rivojlanishini kuchaytiradi va tuplash boʻgʻinining kattalashishiga hamda tuplash boʻgʻinida shakar moddalarining koʻpayishiga sabab boʻladi. Bu sharoitda gʻalla oʻsimligi oʻsish oʻrniga vegetativ organlarini, yaʼni tuplash boʻgʻinini kattartiradi va erta bahorda katta tuplash boʻgʻinlaridan yirik naychalar hamda poyalarni shakllantiradi. Katta naycha va poyalardan yirik boshoqlar hosil boʻlishini taʼminlaydi. Oziqlantirilmagan va sugʻorilmagan, tuproqda namlik yetarli boʻlmagan gʻalla maydonlaridagi nihollar sovuqqa, boshqa omillarga beriluvchan hamda kasallik va zararkunandalarga tez chalinuvchan boʻlib qoladi. Erta bahordan tuplanmasdan naychalash fazasiga oʻtib ketishi gʻallaning hosildorligi pasayib ketishiga sabab boʻladi.

Seminarda, Shoʻmanay tumani “ECO TEKS CLUSTER” masʼuliyati cheklangan jamiyati rahbari Fahriddin Hakimov soʻzga chiqib, bahorning ilk oylarida gʻallani oziqlantirish borasidagi fikr-mulohazalari bilan boʻlishdi.

Qayd etilishicha, mart oyi gʻalla parvarishida gʻalla hosiliga hosil qoʻshish oyi boʻlib, oʻz vaqtida oʻtkaziladigan agrotexnik tadbirlar natijasida gʻalladan yuqori hosil olish va ulkan xirmon bunyod etishga asos boʻladi. Birinchi bahorgi oziqlantirish ishlari oʻtkazilgan gʻalla maydonlariga yoqqan yomgʻir, gʻalla rivojiga juda katta foyda berishi, bunday sharoitda gʻalla maydonlarida amalga oshirilishi lozim boʻlgan eng muhim agrotexnik tadbirlaridan biri boʻlgan gʻallani azotli mineral oʻgʻitlar bilan ikkinchi bahorgi oziqlantirish ishlarini qisqa muddatlarda yakunlash choralarini koʻrish lozimligi xususida soʻz yurtildi.

Shuningdek, seminarda tumanimizdagi qishloq xoʻjaligi soha masʼullari tomonidan mavzu yuzasidan savollar berildi, agrar sohaning turli yoʻnalishlari boʻyicha oʻzaro fikrlar almashildi.

Charos Arslonova, tuman hokimligining Axborot xizmati rahbari.