“BALLI, QIZLAR” KOʻRIK-TANLOVIDA 22-SONLI MTTNING JAJJI QIZALOQLARI OʻZ IQTIDORLARINI KOʻRSATIShDI

Bahor kelishi bilan turli tantanalar, tadbirlar boshlanadi va har bir kun bayramga aylanadi. Ona diyor uzra koʻklam nasimlari esib turgan kunlarda bayramlar bayramlarga ulanadi va el-yurt shodiyonalarga burkanadi. Amudaryo tumanida ham barcha ovul va mahallalarda, muassasa va tashkilotlarda biri-biridan fayzli, chiroyli bayram tadbirlari davom etmoqda.

7-mart kuni Qilichboy ovulidagi 22-sonli maktabgacha taʼlim tashkilotida ham goʻzallik va nafosat bayrami boʻlgan 8-mart – Xalqaro xotin-qizlar kuni munosabati bilan tarbiyalanuvchilar oʻrtasida “Balli, qizlar!” koʻrik-tanlovi tashkil etildi. Ushbu tadbirga tarbiyalanuvchilarning ota-onalari, hudud fuqarolar yigʻini masʼullari va boshqa mehmonlar tashrif buyurishdi. Tadbirni tashkilot rahbari Nilufar Yusupova ochib berdi va onalarni, tashkilot xodimalari, tarbiyalanayotgan jajji qizaloqlarni bayram bilan tabrikladi.

Bayram bilan tabriklab soʻzga chiqqanlar ushbu maktabgacha taʼlim tashkilotida taʼlim-tarbiya sifatini oshirish maqsadida muhim chora-tadbirlar yoʻlga qoʻyilganini taʼkidlab oʻtishdi. Tashkilot binosi 1975-80-yillarda 80-oʻringa moʻljallab qurilgani, soʻnggi davrlarda aholi soni ortib borayotgani tufayli 120 nafar kichkintoylarga tarbiya berilayotgani sababli qoʻshimcha binoga ehtiyoj sezilgani, shunga koʻra 2018-yilda “Obod qishloq” dasturi doirasida 60-oʻringa moʻljallangan qoʻshimcha bino qurilib, eski binosi ham qayta taʼmirlanganini tilga olishdi.

Shundan soʻng, tadbirning asosiy qismi boshlandi va tanlov ishtirokchilari boʻlgan jajji qizaloqlar tanishtirildi. Tanlovda tashkilot tarbiyalanuvchilari boʻlgan Dilobar Adamboyeva, Osiyo Mamarajabova, Maftunaxon Shavkatova, Munisaxon Sherifboyeva, Ruxshonaxon Oʻrolova, Bonuxon Mahmudovalar 4 shart boʻyicha oʻz iqtidorlarini namoyish etildi.

Qizaloqlar birinchi shartga koʻra oʻzlarini sheʼriy usullar bilan tanishtirishdi. Hakamlar ushbu shartni baholagunga qadar guruh qizlari ishtirokidagi “Tomchi” qoʻshigʻiga raqs ijro etib, tomoshabinlarga xushkayfiyat ulashildi. “Zukkolar va donolar” deb nomlangan ikkinchi shart davomida qizaloqlar berilgan savollarga toʻgʻri va aniq javob berishdi.

Shart oraligʻida bolajonlar onalarni madh etuvchi sheʼrlani ifodali yod aytib berishdi. “Men kichik pazanda” deb nomlangan uchinchi shartga koʻra esa qizaloqlar onalariga yordamchi ekanligini koʻrsatib, chiroyli somsalar tugishdi. Hakamlar barcha shartlarni baholangunga qadar bolajonlar ijrosida yana sheʼrlar, “Oʻzbek doʻppisi” nomli qoʻshiq va raqslar namoyish etildi.

Eng soʻnggi “Erkin mavzu” deb nomlangan shart boʻyicha ishtirokchi qizaloqlar birgalikda “Ona qizim” qoʻshigʻiga guruh raqs ijro etib, tomoshabinlarga zavq ulashishdi. Latofatli, epchil, chaqqon, zukko, saranjomu-sarishta va kattalarga koʻmakchi boʻlib ulgʻayayotgan qizaloqlarning chiqishlari barchaga juda manzur boʻldi.

Bolajonlarni erkin fikrlashga, goʻzallikni his qilish, oʻzlarini erkin tutish kabilarga oʻrgatish va ularni ragʻbatlantirish maqsadida oʻtkazilgan “Balli, qizlar koʻrik-tanlovi yakunida hakamlar hayʼati qaroriga koʻra, barcha ishtirokchi qizlarga nominatsiyalar boʻyicha gʻoliblik berildi. “Jajji goʻzal”, “Eng zukko qiz”, “Eng oqila qiz”, “Eng iboli qiz”, “Eng malohatli qiz” va “Eng bilimdon qiz” nominatsiyalari boʻyicha gʻolib boʻlgan qizaloqlarga faxriy yorliq va sovgʻalar topshirildi.

Bayram munosabati bilan 22-sonli maktabgacha taʼlim tashkilotida boʻlib oʻtgan “Balli, qizlar” koʻrik-tanlovi hammada katta taassurot qoldirdi va bayramona kayfiyat ulashdi.

O.Xudoyberganova.