OBOD YuRTNING BAXTIYoR QIZLARI

Har gal kollejimizning aʼlochi, isteʼdodli, oʻzining izlanuvchanligi bilan, qobiliyati va oʻtkir zehni ila nafaqat kollejimizning, balki, tumanimizning ravnaqiga hissa qoʻshayotgan intiluvchan yoshlari haqida oʻylaganimda bir qiz yodimga tushadi.

U hozirda Mangʻit iqtisodiyot kollejining 2-bosqich oʻquvchisi Dilbar Oʻrinboyevadir.

Har gal mana shu qiz bilan suhbatlashgan paytimda uning yonib turgan koʻzlariga qarab, uning koʻnglidagi masrurlikni, yoshlarga xos zavqu-shavqni kuzatganman. Bolaligidan sportga, shaxmatga mehr qoʻyib oʻsgan Dilbarxon Oʻrinboyeva hozirda mana shu sohada koʻplab yutuqlarga erishib kelmoqda.

U 2012-yilda "Umid nihollari” sport musobaqasida Qoraqalpogʻiston Respublikasi boʻyicha faxrli 1-oʻrinni, Oʻzbekiston Respublikasi bosqichida esa 4-oʻrinni egallagan boʻlsa, 2013-yilda "Kamolot shaxmat taxtasi” musobaqasida Qoraqalpogʻiston respublikasi bosqichida 1-oʻrinni egallab, keyingi bosqichga yoʻllanmani qoʻlga kiritdi va mana shu musobaqaning Oʻzbekiston Respublikasi bosqichida jamoa hisobida faxrli 3-oʻrinni egallashga muyassar boʻldi. "Kamolot shaxmat taxtasi-2014” musobaqasida ham faollik koʻrsatib, 2-oʻringa loyiq deb topildi. Tumanimizda mahallalararo oʻtkazilgan shaxmat musobaqasida ham gʻoliblikni qoʻlga kiritib oʻzi yashaydigan "Doʻstlik” mahallasining shaʼnini munosib himoya qildi.

Tinib-tinchimas, hayotdan zavq olib yashaydigan bu tengdoshimizning kelajakdagi orzulari bisyor.

– Kelajakdagi orzuim jahon olimpiadalarida qatnashish, Oʻzbekistonda sportning ravnaqiga hissa qoʻshish, - deydi u.

Soʻngi yillarda qizlar sportiga katta eʼtibor qaratilmoqda. Albatta, bu ham Oʻzbekistonda ayol-qizlarga boʻlgan eʼtiborning yorqin ifodasi. Dilbar Oʻrinboyevaga oʻxshagan tirishqoq yoshlarimiz berilayotgan mana shunday imkoniyatlardan oqilona foydalanmoqdalar.

"Mehnat insonni ulugʻlaydi” deydi dono halqimiz.

Haqiqatan, halol mehnat qilib, shu yurt, shu xalq dardi bilan yashayotgan inson borki, doimo shu elning ardogʻida yashaydi.

– Mana shunday ulugʻlikka talpinib yashaydigan insonlar oramizda koʻp. Men ulardan ibrat olaman va hayotimni sport bilan bogʻlaganimdan beixtiyor gʻururlanib ketaman, - deydi yana bir sportchi qiz Xolida Yoʻldosheva. Kollejimizning faxriga aylangan tengdoshlarimiz orasida bu qizning ham oʻziga xos oʻrni bor. Xolida Yoʻldosheva sportning eng nafis turi boʻlmish badiiy gimnastika turiga muntazam qatnashib kelmoqda.

– Gimnastika hayotimning bir boʻlagi. Bu sport turi ancha murakkab, ammo qiziqqan inson uchun aslo qiyinchilik tugʻdirmaydi, deydi u.

Gimnastikachi qizlarimizning oʻziga xos jozibali mashqlarini tomosha qilganimizda havaslanib ketamiz. Demak, gimnastika nafaqat salomatlik uchun foydali, balki, qomatimizning koʻrkam boʻlishida ham hissasi katta. Xolidaning gimnastika bilan shugʻullanayotganiga ham mana 7-yil boʻldi.

- Mana shu yetti yil ichida men oʻz-oʻzimni qaytadan kashf etdim, bir qancha yutuqlarga erishdim, - deydi suyunib u. U boshqa qizlarga oʻxshamaydi, uning sergʻayratligidan, nazokatli yurish-turishidan sportchi ekanligi yaqqol sezilib turadi. Ularning oilasi sportchilar oilasidir. Uning onasi Adolat opa gimnastikachi murabbiy, opalari esa shu sport turi boʻyicha oliygohda taʼlim olmoqdalar.

Xolidaxon yosh boʻlishiga qaramasdan bir qancha tanlovlar gʻolibi, hamda koʻplab shogirdlarning suyukli ustozidir.

Kelajakdagi orzularidan biri Ulyana Trofimova, Aziza Mamajonovalarga oʻxshagan mohir sportchi boʻlishdir.

Men Xolidaning orzulari ushalishigaishonaman. Chunki, uning maqsadi aniq, intilishlari kishining havasini keltirgulik.

Aziza MADRAHIMOVA.

(Foto - http://www.uza.uz)