38-SONLI MAKTABNING IQTIDORLI OʻQUVChILARI MUNOSIB RAGʻBATLANTIRILDI

Amudaryo tumani maktabgacha va maktab taʼlimi boʻlimi tasarrufidagi 38-sonli maktabda oʻquvchi-yoshlarning intilishi va qiziqishlari asosida umumtaʼlim fanlarini chuqurlashtirib oʻqitiladigan iqtidorli oʻquvchilar sinflari tashkil etilgan. Mazkur sinflarda fanlarni chuqurlashtirib oʻqitish bilan birga oʻquvchilar erishayotgan yutuqlar oʻz vaqtida ragʻbatlantirib borilishiga ham alohida eʼtibor  qaratiladi. Tajribali fan oʻqituvchilari bilan boshlangʻich sinflar oʻqituvchilarning hamkorlikdagi faoliyatlari tufayli maktab oʻquvchilari turli koʻrik-tanlovlar, bilimlar bellashuvi va fanlar olimpiadalarida muvaffaqiyatli ishtirok etib kelishmoqda.

Maktabning 2-, 3-, 4-sinflar oʻquvchilari oʻrtasida oʻqish savodxonligi, ona tili, matematika fanlari boʻyicha oʻtkazilgan bilimlar bellashuvda iqtidorli va intiluvchan oʻquvchilar safi oshib borayotganini amalda namoyon boʻldi. Hali boshlangʻich sinflar oʻquvchilari boʻlgan bolajonlar ruhiyatini koʻtarish, ulardagi ilmga intilish tuygʻusini yanada mustahkamlash maqsadida turli musobaqalar, ayniqsa, zakovat oʻyinlari va bilimlar bellashuvi gʻoliblarini maʼnaviy ragʻbatlantirib borish esa maktab pedagogika jamoasi uchun doimiy anʼanaga aylangan.

Maktabda ana shunday maʼnaviy ragʻbatlantirish tadbirlaridan biri fevral oyining oxirgi haftasida ham boʻlib oʻtdi.

Bilimlar bellashuvi gʻoliblarini ragʻbatlantirishga bagʻishlangan tadbirni maktab direktori Bahrom Boltaboyev ochdi va bilimdon oʻquvchilar hamda ularning ustozlarini erishgan yutuqlari bilan samimiy tabrikladi. Shu bilan birga endi 8-9 yoshga qadam qoʻygan, bilimga chanqoq bolalar hamda ularni oʻz qiziqishlari doirasida aniq maqsad sari yoʻnaltirib, matematika fanininig moʻʼjizakor olamiga, ona tilining goʻzal va nafosatli, sirli dunyosiga olib kirib, ilm choʻqqilari sari yetaklayotgan, savodxonligini oshirayotgan fidoyi oʻqituvchilarga chin dildan minnatdorchilik bildirdi.

Shuni alohida taʼkidlash joizki, mazkur taʼlim muassasasida sinflararo va guruhlararo fanlar boʻyicha bilimlar bellashuvi musobaqalari maktab direktori Bahrom Boltaboyev hamda oʻquv ishlari boʻyicha direktor oʻrinbosari Sh.Tajiboyevlarning tashabbusi va qoʻllab-quvvatlovi bilan oʻtkazilib, bu bellashuvlarda boshlangʻich sinflar oʻquvchilari doimo faollik koʻrsatishadi. Bu galgi, bellashuvda ham 2-, 3-, 4-sinfarning  oʻquvchilari oʻqish savodxonligi, ona tili va matematika fanlaridan olgan bilim va koʻnikmalarini bellashuv shartlarini bajarish asnosida yanada mustahkamladilar.

Bilimlar bellashuvi bilimdonlarini taqdirlashga bagʻishlangan tadbirda oʻquvchilar ustozlariga yanada koʻproq va yaxshiroq oʻqishga vaʼda berdilar va biri-biridan shoʻx raqslar, kuy-qoʻshiqlar ijro etib, tadbirga yanada goʻzal joziba baxsh etdilar. Shu bilan birga oʻquvchilar tadbirning adabiy-musiqiy qismiga oʻzgacha ruh bagʻishlovchi fanlar boʻyicha bahslar ham olib bordilar.

Tadbir yakunida gʻolib oʻquvchilar maktab maʼmuriyati tomonidan munosib ragʻbatlantirildilar.

Robiya YOʻLDOShEVA.