“Xorijiy tillarni oʻqitish boʻyicha eng yaxshi maktab” tanlovining tuman bosqichi boʻlib oʻtdi

Maʼlumki, yoshlar orasida chet tillarini oʻrganishni yanada kengaytirish maqsadida Oʻzbekiston Respublikasi Prezidentining “Oʻzbekiston Respublikasida xorijiy tillarni oʻrganishni ommalashtirish faoliyatini sifat jihatidan yangi bosqichga olib chiqish chora-tadbirlari toʻgʻrisida”gi qarori hamda Oʻzbekiston Respublikasi Vazirlar Mahkamasining “Iqtidorli oʻquvchilar oʻrtasida fan olimpiadalarini oʻtkazish tizimini takomillashtirish hamda xorijiy tillarni oʻqitish boʻyicha eng yaxshi maktabni aniqlash tizimini joriy etish toʻgʻrisida”gi qarorlari imzolangan boʻlib, mazkur hujjatlar yoshlarimizga chet tillarini oʻrgatish borasidagi ishlarni yangi bosqichga koʻtarishda muhim dasturulamal boʻlib xizmat qilmoqda.

Mazkur hujjatlar ijrosini taʼminlash maqsadida imzolangan Qoraqalpogʻiston Respublikasi Maktabgacha va maktab taʼlimi vazirligining “Oʻzbekiston Respublikasi Prezidentining sovrini uchun “Xorijiy tillarni oʻqitish boʻyicha eng yaxshi maktab” tanlovini oʻtkazish toʻgʻrisida”gi buyrugʻiga asosan 26-fevral kuni Amudaryo tumanidagi 40-sonli umumtaʼlim maktabida “Xorijiy tillarni oʻqitish boʻyicha eng yaxshi maktab” tanlovining tuman bosqichi boʻlib oʻtdi.

Tanlovni oʻtkazish uchun belgilangan 40-sonli maktab binosi tanlov uchun zarur boʻlgan inventarlar va kompyuter texnikalari bilan taʼminlandi.

Koʻrik-tanlovda Qoraqalpogʻiston Respublikasi Maktabgacha va maktab taʼlimi vazirligi Maktablar faoliyatini muvofiqlashtirish shoʻʼbasi metodisti Jumamurat Rametullayev, tuman Maktabgacha va maktab taʼlimi boʻlimi mudiri Yalgʻash Shamuratov, maktablar faoliyatini muvofiqlashtirish shoʻʼbasi rahbari Ibragim Rajabov, mazkur shoʻʼba metodisti Habibulla Davletyarovlar tashkiliy-nazorat ishlarida ishtirok etdilar. Shuningdek, koʻrik tanlovga tumandagi 35 ta umumtaʼlim maktablarining 7-, 8-, 9-sinflarida tahsil olayotgan 5 nafardan iborat jamoalari tarkibida jami 175 nafar oʻquvchilar ishtirok etdilar.

Mazkur koʻrik-tanlovni oʻtkazish toʻgʻrisidagi nizomga muvofiq 35 ta umumtaʼlim maktablarning terma jamoalari ishtirokchilarining xorijiy tilni bilish darajasi test topshiriqlari orqali sinovdan oʻtkazildi.

Test sinovlarida bitta maktab terma jamoasiga kiritilgan oʻquvchilarning yonma-yon oʻtirishlariga yoʻl qoʻyilmadi. Test sinovlaridagi topshiriqlar xalqaro taʼlim standartlari asosida tayyorlangan jami 30 ta topshiriqlardan iborat boʻldi.

Test topshiriqlaridagi savollar oddiydan murakkabga tomon oʻzgarib borib, topshiriqlarning 1-boʻlimida oʻquvchilarning xorijiy til, yaʼni ingliz tili boʻyicha grammatik bilimini baholovchi 10 ta test savollari taqdim etildi. 2-boʻlimida oʻquvchilarning ingliz tili boʻyicha lugʻat boyligini baholovchi 10 ta test savollari berildi. 3-bosqichda esa oʻquvchilarning ingliz tili boʻyicha oʻqib tushunish koʻnimasini baholovchi 10 ta test topshiriqlari taqdim etildi.

Maʼlumot oʻrnida keltirish joizki, “Xorijiy tillarni oʻqitish boʻyicha eng yaxshi maktab” tanlovida xorijiy tillarga ixtisoslashgan yoki xususiy maktablar ishtirok etmaydi. Bunday maktablarning tanlovda ishtirok etish holati aniqlanganda ular tanlovdan chetlatiladi.

Belgilangan vaqt mobaynida test sinovlari yakuniga yetgach, baholash ishlari tuman tashkiliy qoʻmitasi tomonidan tuzilgan hakamlar tomonidan amalga oshirildi. Baholash jarayonlarida maktab terma jamoasidagi har bir oʻquvchining bahosi alohida tekshirildi. Jamoadagi 5 nafar oʻquvchilarning toʻplagan ballari umumlashtirib, 5 ga boʻlingan holda oʻrtacha ball chiqarildi hamda natijalar eʼlon qilindi.

Koʻrik-tanlovning birinchi, yaʼni tuman bosqichi jami 100 ballik mezonga koʻra aniqlangan yakuniy natijalariga koʻra 1-sonli umumtaʼlim maktabi terma jamoasi 57,9 ball bilan 3-oʻrinni egalladi, 32-sonli maktab terma jamoasi 59,5 ballni qoʻlga kiritib, faxrli 2-oʻrinni egalladi. Umumiy ballari 65,2 ballni tashkil etgan 40-sonli umumtaʼlim maktabi terma jamoasi esa faxrli 1-oʻrinni va gʻoliblikni qoʻlga kiritdi hamda tumanimizda xorijiy tillarni oʻqitish boʻyicha eng yaxshi maktab deb topildi.

Gʻoliblarga, yaʼni 3-oʻrinni egallagan 1-sonli maktabga 50 mln soʻm, 2-oʻrinni egallagan 32-sonli maktabga 70 mln soʻm hamda 1-oʻrinni egallagan 40-sonli maktabga 100 mln soʻm pul mukofotlari beriladi.

Charos Arslonova, tuman hokimligining Axborot xizmati rahbari.