“Хорижий тилларни ўқитиш бўйича энг яхши мактаб” танловининг туман босқичи бўлиб ўтди

Маълумки, ёшлар орасида чет тилларини ўрганишни янада кенгайтириш мақсадида Ўзбекистон Республикаси Президентининг “Ўзбекистон Республикасида хорижий тилларни ўрганишни оммалаштириш фаолиятини сифат жиҳатидан янги босқичга олиб чиқиш чора-тадбирлари тўғрисида”ги қарори ҳамда Ўзбекистон Республикаси Вазирлар Маҳкамасининг “Иқтидорли ўқувчилар ўртасида фан олимпиадаларини ўтказиш тизимини такомиллаштириш ҳамда хорижий тилларни ўқитиш бўйича энг яхши мактабни аниқлаш тизимини жорий этиш тўғрисида”ги қарорлари имзоланган бўлиб, мазкур ҳужжатлар ёшларимизга чет тилларини ўргатиш борасидаги ишларни янги босқичга кўтаришда муҳим дастуруламал бўлиб хизмат қилмоқда.

Мазкур ҳужжатлар ижросини таъминлаш мақсадида имзоланган Қорақалпоғистон Республикаси Мактабгача ва мактаб таълими вазирлигининг “Ўзбекистон Республикаси Президентининг соврини учун “Хорижий тилларни ўқитиш бўйича энг яхши мактаб” танловини ўтказиш тўғрисида”ги буйруғига асосан 26 феврал куни Амударё туманидаги 40-сонли умумтаълим мактабида “Хорижий тилларни ўқитиш бўйича энг яхши мактаб” танловининг туман босқичи бўлиб ўтди.

Танловни ўтказиш учун белгиланган 40-сонли мактаб биноси танлов учун зарур бўлган инвентарлар ва компьютер техникалари билан таъминланди.

Кўрик-танловда Қорақалпоғистон Республикаси Мактабгача ва мактаб таълими вазирлиги Мактаблар фаолиятини мувофиқлаштириш шўъбаси методисти Жумамурат Раметуллаев, туман Мактабгача ва мактаб таълими бўлими мудири Ялғаш Шамуратов, мактаблар фаолиятини мувофиқлаштириш шўъбаси раҳбари Ибрагим Ражабов, мазкур шўъба методисти Ҳабибулла Давлетяровлар ташкилий-назорат ишларида иштирок этдилар. Шунингдек, кўрик танловга тумандаги 35 та умумтаълим мактабларининг 7-, 8-, 9-синфларида таҳсил олаётган 5 нафардан иборат жамоалари таркибида жами 175 нафар ўқувчилар иштирок этдилар.

Мазкур кўрик-танловни ўтказиш тўғрисидаги низомга мувофиқ 35 та умумтаълим мактабларнинг терма жамоалари иштирокчиларининг хорижий тилни билиш даражаси тест топшириқлари орқали синовдан ўтказилди.

Тест синовларида битта мактаб терма жамоасига киритилган ўқувчиларнинг ёнма-ён ўтиришларига йўл қўйилмади. Тест синовларидаги топшириқлар халқаро таълим стандартлари асосида тайёрланган жами 30 та топшириқлардан иборат бўлди.

Тест топшириқларидаги саволлар оддийдан мураккабга томон ўзгариб бориб, топшириқларнинг 1-бўлимида ўқувчиларнинг хорижий тил, яъни инглиз тили бўйича грамматик билимини баҳоловчи 10 та тест саволлари тақдим этилди. 2-бўлимида ўқувчиларнинг инглиз тили бўйича луғат бойлигини баҳоловчи 10 та тест саволлари берилди. 3-босқичда эса ўқувчиларнинг инглиз тили бўйича ўқиб тушуниш кўнимасини баҳоловчи 10 та тест топшириқлари тақдим этилди.

Маълумот ўрнида келтириш жоизки, “Хорижий тилларни ўқитиш бўйича энг яхши мактаб” танловида хорижий тилларга ихтисослашган ёки хусусий мактаблар иштирок этмайди. Бундай мактабларнинг танловда иштирок этиш ҳолати аниқланганда улар танловдан четлатилади.

Белгиланган вақт мобайнида тест синовлари якунига етгач, баҳолаш ишлари туман ташкилий қўмитаси томонидан тузилган ҳакамлар томонидан амалга оширилди. Баҳолаш жараёнларида мактаб терма жамоасидаги ҳар бир ўқувчининг баҳоси алоҳида текширилди. Жамоадаги 5 нафар ўқувчиларнинг тўплаган баллари умумлаштириб, 5 га бўлинган ҳолда ўртача балл чиқарилди ҳамда натижалар эълон қилинди.

Кўрик-танловнинг биринчи, яъни туман босқичи жами 100 баллик мезонга кўра аниқланган якуний натижаларига кўра 1-сонли умумтаълим мактаби терма жамоаси 57,9 балл билан 3-ўринни эгаллади, 32-сонли мактаб терма жамоаси 59,5 баллни қўлга киритиб, фахрли 2-ўринни эгаллади. Умумий баллари 65,2 баллни ташкил этган 40-сонли умумтаълим мактаби терма жамоаси эса фахрли 1-ўринни ва ғолибликни қўлга киритди ҳамда туманимизда хорижий тилларни ўқитиш бўйича энг яхши мактаб деб топилди.

Ғолибларга, яъни 3-ўринни эгаллаган 1-сонли мактабга 50 млн сўм, 2-ўринни эгаллаган 32-сонли мактабга 70 млн сўм ҳамда 1-ўринни эгаллаган 40-сонли мактабга 100 млн сўм пул мукофотлари берилади.

Чарос Арслонова, туман ҳокимлигининг Ахборот хизмати раҳбари.