Har bir mahallaga 500 million soʻm: Qoraqalpogʻiston mahallalarini qoʻllab-quvvatlash jamgʻarmasi tomonidan ajratilgan mablagʻlar evaziga qanday ishlar amalga oshirildi?

2023-yilning 30-mart kuni hududlarning ijtimoiy-iqtisodiy rivoji bilan tanishish maqsadida Qoraqalpogʻistonga tashrif buyurgan mamlakatimiz Prezidenti Shavkat Mirziyoyev aholi farovonligini yanada oshirishga qaratilgan 3 ta yangi tashabbusni ilgari surgan edi.

Qoraqalpogʻiston sanoatini rivojlantirish, qayta tiklanuvchi energiya manbalarini joriy etish, aholi bandligini taʼminlash, kambagʻallikni qisqartirish doirasida hududdagi 452 ta mahallaning har biriga toʻgʻridan-toʻgʻri 500 million soʻmdan qoʻshimcha mablagʻ ajratililishi belgilandi. Buning uchun alohida Qoraqalpogʻiston mahallalarini qoʻllab-quvvatlash jamgʻarmasi tashkil qilinib, unga 2023-yilda 250 milliard soʻm ajratildi.

Amudaryo tumanidagi ovul va mahallalarda yurtboshimiz tomonidan qaratilgan yuksak eʼtibor va ishonchni oqlash, yaratilgan imkoniyatdan samarali foydalanish maqsadida tizimli ishlar amalga oshirilmoqda. Ajratilgan mablagʻ ovul va mahallalarda insonlarning yashash sharoitlarini yaxshilashga, mavjud kamchiliklarni bartaraf qilishga yoʻnaltirilmoqda.

Xususan, Farovon mahallasi hududidagi Xalqobod koʻchasidagi isteʼmolchilarga xizmat koʻrsatadigan transfarmator oʻrnatildi, elektr liniyalari tortildi va tayanch ustunlari oʻrnatildi. Shu orqali elektr energiyasi bilan bogʻliq muammaolar hal qilindi. Shuningdek, Kimyogarlar-4 koʻchasidan Kimyogarlar-16 koʻchasigacha yoʻllarga tosh yotqizildi. Bu orqali piyodalar va haydovchilar uchun yoʻllarda harakatlanish yanada osonlashdi. Qolaversa, Kimyogarlar koʻchasiga bolalar maydonchasi qurildi. Farovon MFY binosiga quyosh paneli oʻrnatildi hamda mahalla hududidagi yoʻl chetiga piyodalar yoʻlakchasi qurildi.

Ajratilgan mablagʻ hisobidan Doʻstlik mahallasida ham xayrli va samarali ishlar amalga oshirildi. Jumladan, Doʻstlik MFY maʼmuriy binosiga quyosh paneli oʻrnatildi. Mahalla hududidagi Shoʻrchi, Gurlan berk koʻchalariga tosh yotqizildi. Shoʻrchi koʻchasiga ichimlik suvi tarmoqlari tortildi hamda Doʻstlik koʻchasiga kuzatuv kameralari oʻrnatildi.

Bu boradagi tizimli ishlar Yangiobod mahallasida ham amalga oshirildi. Xususan, mazkur mahalla fuqarolar yigʻini binosiga ham quyosh paneli oʻrnatildi va shu orqali bino elektr energiyasi bilan taʼminlandi. Shuningdek, Yangiobod mahallasi hududidagi Abdulla Avloniy koʻchasiga yangidan elektr liniyalari tortildi, tayanch ustunlari oʻrnatildi. Bu orqali hududdagi fuqarolar uzoq yillardan beri qiynab kelayotgan elektr energiyasi taʼminoti bilan bogʻliq muammolar oʻz yechimini topdi.

Yangiobod mahallasi hududidan oʻtuvchi kollektorga oʻrnatilgan koʻprikdan, yaʼni mahallaning Farovon mahallasi bilan chegarasidan 40-sonli umumtaʼlim maktabigacha piyodalar yoʻlakchasi qurildi. Ushbu piyodalar yoʻlakchasining qurilishi mahalla aholisi, ayniqsa, maktab oʻquvchilarining yoʻllarda harakatlanishlarida xavsizlikni taʼminlashga xizmat qilmoqda.

Mahallaning Amudaryo koʻchasiga bolalar maydonchasining qurilishi esa bolajonlarning boʻsh vaqtini maroqli oʻtkazishlariga zamin yaratdi.

Bir soʻz bilan aytganda, Qoraqalpogʻiston Respublikasi Vazirlar Kengashi huzurida Mahallalarni qoʻllab-quvvatlash jamgʻarmasi tomonidan ajratilayotgan mablagʻlar mahallalar infratuzilmalarini takomillashtirish, aholining turmush sharoitlarini yanada yaxshilash, mahallalarni ijtimoiy-iqtisodiy rivojlantirishga qaratilgan dasturlar ijrosini hamda mavjud muammolarning samarali va tezkor hal etilishini moliyaviy va moddiy jihatdan taʼminlashda muhim vosita boʻlmoqda.

Charos Arslonova, tuman hokimligining Axborot xizmati.