Aliment oluvchi oilalarning yashash sharoitlari oʻrganildi

15-fevral kuni Qoraqalpogʻiston Respublikasi Prokuraturasi, Amudaryo tuman hokimligi, tuman prokuraturasi, Majburiy ijro byurosi tuman boʻlimi masʼullari hamkorlikda aliment oluvchi oilalar holidan xabar oldilar. Ishchi guruh ehtiyojmand oilalarning yashash sharoitlari, ularning muammo va qiyinchiliklarini yaqindan oʻrgandilar.

Ishchi guruh tarkibidagi Qoraqalpogʻiston Respublikasi Prokuraturasi xodimi Alisher Rahimov, tuman prokurori Aziz Roʻzmetov, tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Nodir Kamolov, Majburiy ijro byurosi tuman boʻlimi boshligʻi Quvanish Esenbekov hamda qator mutaxassislar aliment oluvchi oilalar aʼzolari bilan yaqindan suhbat qurdilar. Oʻzaro suhbatlar chogʻida oilalarning kundalik ehtiyojlari oʻrganildi hamda ularga yordamlar koʻrsatildi.

Maʼlumot oʻrnida aytish kerakki, tumanimizda oilalarning mustahkamligini taʼminlash, ajrimlarning oldini olish borasida masʼullar tomonidan samarali ishlar qilinmoqda. Shuningdek, Majburiy ijro byurosi tuman boʻlimi tomonidan alimentlarni oʻz vaqtida undirish borasida qator amaliy ishlar qilinmoqda.

Majburiy ijro byurosi tuman boʻlimi ish yurituvida aliment undirish bilan bogʻliq jami 978 ta ijro hujjatlari mavjud boʻlib, shundan 327 ta qarzdor ishsizlik xisobidan Oʻzbekiston Respublikasidagi oʻrtacha oylik ish haqi miqdoridan aliment pullarini toʻlab kelmoqda.

Shuningdek, 651 ta qarzdorning aliment pullari Oʻzbekiston Respublikasi “Sud hujjatlari va boshqa organlar hujjatlarini ijro etish toʻgʻrisida”gi Qonunning 64-moddasiga muvofiq ish haqlaridan undirilmoqda.

Byuroning Qoraqalpogʻiston Respublikaasi boshqarmasi boshligʻi tomonidan alimentdan qarzdorligi boʻlganlarni ishga joylashtirish boʻyicha 2024-yilning yanvar-iyun oylari uchun reja-grafik tasdiklangan boʻlib, mazkur reja grafik asosida, Amudaryo tuman prokuraturasi, tuman xokimligi, bandlikka koʻmaklashish markazi bilan hamkorlikda xar oyda aliment toʻlovchi ishsiz qarzdorlarni ish bilan taʼminlash joriy yilning yanvar, fevral oylarida ikki marotaba mehnat yaramarkasi oʻtkazilgan. Mazkur mehnat yarmarkalarida jami 36 nafar ishsizlar doimiy ish oʻrni bilan taʼminlangan, shundan, 4 nafari aliment toʻlovchi fuqarolar hisoblanadi.

Qolaversa, 10 mln. soʻmdan ortiq aliment qarzdorligi boʻlgan 147 ta qarzdorlarning ham sharoitlari oʻrganilgan. Fevral oyi holatiga 139,7 mln soʻm qarzorligi boʻlgan 16 ta xonadonlar oʻrganilib, shundan, 3 tasiga 11,1 mln soʻm pul mablagʻlari undirib berilgan.

Ishchi guruh vakillari aliment oluvchi oilalarning yashash sharoitlarini oʻrganish mobaynida ularning koʻplab kundalik ehtiyojlari mavjudligini aniqladilar. Ishchi guruh aʼzolari tomonidan oilalarga oziq-ovqat mahsulotlari, farzandlariga kiyim-kechak va oʻquv qurollari berildi hamda 2 ta oila yarashtirildi.

Charos Arslonova, tuman hokimligining Axborot xizmati rahbari.