AL-XORAZMIY OLIMPIADASINING TUMAN BOSQIChI GʻOLIBLARI ANIQLANDI

Amudaryo tumanida umumiy oʻrta taʼlim maktablarining 7-8-sinf oʻquvchilari oʻrtasida Al-Xorazmiy nomidagi aniq va tabiiy fanlar (Science) olimpiadasining tuman bosqichi boʻlib oʻtdi.

27-yanvar kuni 76-sonli umumiy oʻrta taʼlim maktabi binosida boʻlib oʻtgan mazkur olimpiadaga tumanimizdagi 85 ta umumiy oʻrta taʼlim maktablarining jami 300 nafarga yaqin 7-8-sinf oʻquvchilari qatnashdilar.

Olimpiadaning ochilish marosimida Qoraqalpogʻiston Respublikasi Maktabgacha va maktab taʼlimi vazirligidan Fan olimpiadasi boʻyicha Iqtidorli bolalar bilan ishlash sektor boshligʻi Zohida Usenova, Fan olimpiadasi boʻyicha Iqtidorli bolalar bilan ishlash sektor metodisti Fazilat Zarifova, tuman Maktabgacha va maktab taʼlimi boʻlimi boshligʻi Yalgʻashboy Shomurodov, Maktablar faoliyatini muvofiqlashtirish shoʻʼbasi rahbari Ibragim Rajabov, metodistlar Habibulla Davletyarov, Rayhon Yakubova hamda olimpiada auditoriya rahbarlari, kuzatuvchilar, hakamlar ishtirok etdilar.

Ochilish marosimida Zohida Usenova Al-Xorazmiy nomidagi aniq va tabiiy fanlar olimpiadasi maqsad va vazifalari haqida maʼlumotlar berib oʻtdi. Shuningdek, tuman Maktabgacha va maktab taʼlimi boʻlimi mudiri Yalgʻashboy Shomurodov olimpiadani oʻtkazish tartib-qoidalarini tushuntirdi.

Taʼkidlanganidek, Vazirlar Mahkamasining 2021-yil 9-sentyabrdagi “Iqtidorli oʻquvchilar oʻrtasida fan olimpiadalarini oʻtkazish tizimini joriy qilish va xorijiy tillarni oʻqitish boʻyicha eng yaxshi maktabni aniqlash toʻgʻrisida”gi 562-sonli qarorida umumiy oʻrta taʼlim maktablari oʻquvchilari oʻrtasida mahalliy va xalqaro fan olimpiadalarini tashkil etish, oʻquvchilarning xalqaro olimpiadalardagi ishtirokini taʼminlash belgilangan. Qarorda keltirilgan topshiriqlar ijrosini taʼminlash va oʻquvchilarni quyi sinflardan boshlab, fan olimpiadalariga tayyorlab borish maqsadida 7-8-sinf oʻquvchilari oʻrtasida Al-Xorazmiy nomidagi aniq va tabiiy fanlar olimpiadasini oʻtkazish yoʻlga qoʻyilgan.

Shundan soʻng, auditoriya rahbarlari, kuzatuvchilar ishtirokida belgilangan xonalarda Qoraqalpogʻiston Respublikasi Maktab va maktabgacha taʼlim boshqarmasi tomonidan taqdim qilingan topshiriqlarni berish jarayoni boshlandi. Olimpiadada oʻz bilimini sinovdan oʻtkazish maqsadida tashrif buyurgan oʻquvchilarga matematika fanidan 36 ta savoldan iborat boʻlgan, shuningdek, tabiiy fanlardan kimyo, biologiya, fizika fanlaridan har biridan 12 tadan 36 savoldan iborat boʻlgan topshiriq va javoblar varaqasi topshirildi.

Olimpiada topshiriqlarini yechish uchun ishtirokchilarga nizom talabi boʻyicha 2 soat vaqt berildi. Belgilangan vaqtdan keyin auditoriya rahbari tomonidan ishtirokchilar javob varaqalari raqamlashtirilgan holda hakamlarga taqdim qilindi.

Natijalarga koʻra matematika yoʻnalishidan 22-, 40-, 56-, 31-sonli maktab oʻquvchilari, tabiiy fanlar yoʻnalishidan 39-, 16-, 40-, 11-sonli maktab oʻquvchilari sovrinli oʻrinlarni egallab, Al-Xorazmiy nomidagi aniq va tabiiy fanlar olimpiadasining Qoraqalpogʻiston Respublika bosqichida ishtirok etish uchun yoʻllanma oldilar.

Sovrinli oʻrinlarni egallagan oʻquvchilar tuman Maktabgacha va maktab taʼlimi boʻlimi tomonidan tayyorlangan diplom bilan taqdirlandilar.

Bu kabi olimpiadalar oʻquvchilar orasidan matematika, fizika, kimyo va biologiya fanlari boʻyicha bilimli, ushbu fanga qiziquvchi, intiluvchan va ijodkor yoshlarni aniqlash hamda ulardagi ijodiy qobiliyatlarni roʻyobga chiqarishda muhim ahamiyat kasb etadi.

Ozoda Xudoyberganova.