AGROSANOAT MAJMUI XODIMLARI KASABA UYuShMASI AʼZOLARI IShTIROKIDA SEMINAR TAShKIL ETILDI
Amudaryo tumanida Agrosanoat majmui xodimlari kasaba uyushmasi aʼzolari ishtirokida ijtimoiy-iqtisodiy masalalar, mehnat muhofazasi va xavfsizligi ishlarini yangicha tashkil etish boʻyicha seminar oʻtkazildi.
24-yanvar kuni boʻlib oʻtgan mazkur seminarda Oʻzbekiston Agrosanoat majmui xodimlari kasaba uyushmasi Respublika Kengashi raisining birinchi oʻrinbosari Toʻxta Bozorov, Oʻzbekiston Kasaba uyushmalari federatsiyasining Qoraqalpogʻiston Kengashi raisi oʻrinbosari Muradboy Daniyarov, Oʻzbekiston kasaba uyushmalari federatsiyasining mehnatni muhofaza qilish boʻlimi yetakchi mutaxassisi Sultanmurod Orazimbetov, Amudaryo tumani hokimining birinchi oʻrinbosari Komiljon Aytboyev, tuman Fermer, dehqon xoʻjaliklari va tomorqa yer egalari Kengashi raisi Ilhom Polvonovlar qatnashishdi. Shuningdek, Agrosanoat majmui xodimlari kasaba uyushmasi tuman Kengashi raisi Jasur Qurboniyozov hamda uyushma aʼzolari qatnashishdi.
Seminarda Oʻzbekiston Agrosanoat majmui xodimlari kasaba uyushmasi Respublika Kengashi raisining birinchi oʻrinbosari Toʻxta Bozorov “Mehnatkashlarni ijtimoiy-iqtisodiy qoʻllab-quvvatlash, tarmoqqa tegishli korxona, tashkilotlar va agroklasterlar bilan hamkorlikni yanada rivojlantirish istiqbollari toʻgʻrisida”gi mavzusidagi maʼruzasi tinglandi. U oʻz maʼruzasida kasaba uyushmalariga aʼzo boʻlish tartibi, mehnatkashlarni ijtimoiy tomonidan qoʻllab-quvvatlashda uyushmalarning oʻrni va ahamiyati xususida soʻz yuritdi.
Oʻzbekiston Kasaba uyushmalari federatsiyasining Qoraqalpogʻiston Kengashi raisi oʻrinbosari Muradboy Daniyarov “Mehnatkashlarni ijtimoiy-iqtisodiy qoʻllab-quvvatlashda jamoa shartnomalari oʻrni” haqida maʼruza qildi. Seminar ishtirokchilariga ish beruvchi korxonalar bilan jamoa shartnomasini tuzish tartibi, ahamiyati haqida batafsil tushunchalar berildi.
Jamoa shartnomasi — korxonada ish beruvchi bilan xodimlar oʻrtasidagi mehnatga oid, ijtimoiy-iqtisodiy va kasbga oid munosabatlarni tartibga soluvchi normativ hujjat ekanligi taʼkidlanib, unda korxonaning iqtisodiy imkoniyatlarini hisobga olgan holda qonunlar va boshqa normativ hujjatlar bilan belgilangan normalar va qoidalarda koʻrsatilganiga qaraganda imtiyozliroq mehnat shartlari va ijtimoiy-iqtisodiy shartlar, yaʼni qoʻshimcha taʼtillar, pensiyalarga tayinlanadigan ustamalar, muddatdan ilgari pensiyaga chiqish, transport va xizmat safari xarajatlari uchun kompensatsiyalar, xodimlarni ishlab chiqarishda hamda ularning bolalarini maktabda va maktabgacha tarbiya muassasalarida tekin yoki qisman haq toʻlanadigan tarzda ovqatlantirish, boshqa qoʻshimcha imtiyoz va kompensatsiyalar ham kiritilishi mumkinligi tushuntirildi.
Oʻzbekiston kasaba uyushmalari federatsiyasining mehnatni muhofaza qilish boʻlimi yetakchi mutaxassisi Sultanmurod Orazimbetov esa “Korxona, tashkilot, fermer xoʻjaligi va agroklasterlarda mehnat muhofazasi, xavfsizligi ishlarini tashkil etish toʻgʻrisida” maʼruza qildi va keng tushunchalar berib oʻtdi. Korxonalarda mehnat muhofazasi boʻyicha ishlarni tashkil qilish va uning huquqiy-meʼyoriy asoslari haqida batafsil soʻz yuritdi. “Mehnatni muhofaza qilish toʻgʻrisida”gi qonunning 14-moddasi korxonalarda mehnatni muhofaza qilish xizmatlarini tashkil etishga bagʻishlangani, Qonunning shu moddasiga binoan Vazirliklar, idoralar, boshqa xoʻjalik organlari kasaba uyushmalari Markaziy qoʻmita bilan kelishib oʻzlari tasdiqlaydigan Nizomga muvofiq mehnat muhofazasi ishlarini muvofiqlashtirib borishini bayon etdi.
Seminar davomida kasaba uyushmasining afzalliklari, xodimlarni ijtimoiy himoya qilish, ularning sogʻligini tiklash kabi koʻplab imtiyozlar haqida maʼlumot va tushuntirishlar berildi. Seminar ishtirokchilarning faolligi bilan jonli tarzda oʻtdi va ular oʻzlarini qiziqtirgan koʻplab savollarga maʼruzachilardan javoblar olishdi.
O.Xudoyberganova
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
