MAKTABLARNING AMALIYoTChI-PSIXOLOGLARI UChUN OʻQUV-SEMINAR TAShKIL ETILDI
Amudaryo tumani Maktabgacha va maktab taʼlimi boʻlimiga qarashli umumtaʼlim maktablari psixologlari ishtirokida “Kasblar mamlakatiga sayohat” mavzusida seminar-trening tashkil qilindi.
22-yanvar kuni oʻquvchilarni kasb-hunarga yoʻnaltirish maqsadida joriy yil davomida oʻtkaziladigan tadbirlar media rejasiga asosan tashkil etilgan mazkur seminar-treningda tuman hududidagi barcha umumtaʼlim maktablarning amaliyotchi-psixologlari ishtirok etishdi. Seminarda shahar va shahar atrofi hududidagi maktab psixologlari trenerlik qilishdi.
Seminar-trening boshlanishida tuman Maktabgacha va maktab taʼlimi boʻlimi metodisti Nurbek Seytboyev oʻquvchilarni kasb-hunarga yoʻnaltirishda amaliyotchi-psixologlarning oʻrni, maktablarda amalga oshirilishi kerak boʻlgan chora-tadbirlar haqida soʻz yuritdi. Shuningdek, oʻquvchi-yoshlarni kasbga-hunarga yoʻnaltirish boʻyicha 2024-yil davomida oʻtkaziladigan trening tadbirlar xususida batafsil maʼlumotlar berdi.
Bu kabi seminar-treninglar barcha umumtaʼlim maktablarining psixologlarini qamrab olgan holda 4 ta hududda oʻtkazilishi rejalashtirilgan. Seminar-treninglar “Kasblar mamlakatiga sayohat”, “Hayotiy qadriyatlar va kasb tanlash”, “Barcha kasblar kerak, barcha kasblar muhim”, “Mening xarakterim, kamchilik va yutuqlarim” mavzularida oʻtkaziladi.
Ushbu seminar-trening mashgʻulotlari davomida trenerlar maktablar psixologlariga oʻquvchi-yoshlarni zamonaviy mehnat bozori ehtiyojlaridan kelib chiqib kasb-hunarga yoʻnaltirish, bu borada psixologik qoʻllab-quvvatlashning zamonaviy shakl va uslublarini joriy etish, ularga ongli va mustaqil ravishda kasb tanlashlariga metodik yordam berish, koʻmaklashish boʻyicha yoʻl-yoʻriqlar, tavsiyalar berishdi.
Oʻquv-seminar ishtirokchilari trenerlarning “Kasblar olamiga sayohat” mavzusidagi maʼruzasini katta eʼtibor bilan tinglashdi. Ayniqsa, trenerlarning kasblar haqidagi taqdimoti koʻpchilikning asosiy diqqat markazida boʻldi. Shuningdek, “Men tanlagan kasb” hamda “Kasblar zanjiri” trening mashgʻulotlarida qatnashchilar faol ishtirok etdilar.
Seminar-trening davomida ishtirokchilar guruhlarga boʻlinib, oʻzaro bellashdilar. “Pozitivlar” va “Aktivlar” jamoalari aʼzolarining shartlar boʻyicha bergan javoblari va har bir mashgʻulotdagi ishtiroki hakamlar hayʼati tomonidan baholab borildi.
Mashgʻulotlar qiziqarli oʻtishi uchun rolli oʻyinlardan ham foydalanildi. Shuningdek, mashgʻulotlar davomida sakkizta stantsiya tashkil qilinib, har bir stantsiyada har bir kasbga urgʻu berib oʻtildi va ularga taʼrif, tavsif berildi.
Undan tashqari, “Juftingni top”, “Kim chaqqon” kabi qiziqarli oʻyin mashgʻulotlari davomida ham psixologlar oʻz mahoratini, chaqqonligini koʻrsatishga harakat qilishdi.
Hakamlar ishtirokchilarning har bir harakati, diqqat-eʼtibori, tafakkuri kengligini eʼtiborga olib, baholab bordilar. Mashgʻulotlar yakunida “Pozitivlar” jamoasi 46 ball, “Aktivlar” jamoasi esa 47 ball toʻpladi.
Oʻtkazilgan seminarda amaliyotchi psixologlar oʻquvchi-yoshlarni kasb-hunarga yoʻnaltirish borasidagi oʻz fikr-mulohazalarini, takliflarini bildirib, tajriba almashdilar va kelgusidagi vazifalarni ham belgilab oldilar.
O.Xudoyberganova
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
