МАКТАБЛАРНИНГ АМАЛИЁТЧИ-ПСИХОЛОГЛАРИ УЧУН ЎҚУВ-СEМИНАР ТАШКИЛ ЭТИЛДИ
Амударё тумани Мактабгача ва мактаб таълими бўлимига қарашли умумтаълим мактаблари психологлари иштирокида “Касблар мамлакатига саёҳат” мавзусида семинар-тренинг ташкил қилинди.
22 январь куни ўқувчиларни касб-ҳунарга йўналтириш мақсадида жорий йил давомида ўтказиладиган тадбирлар медиа режасига асосан ташкил этилган мазкур семинар-тренингда туман ҳудудидаги барча умумтаълим мактабларнинг амалиётчи-психологлари иштирок этишди. Семинарда шаҳар ва шаҳар атрофи ҳудудидаги мактаб психологлари тренерлик қилишди.
Семинар-тренинг бошланишида туман Мактабгача ва мактаб таълими бўлими методисти Нурбек Сейтбоев ўқувчиларни касб-ҳунарга йўналтиришда амалиётчи-психологларнинг ўрни, мактабларда амалга оширилиши керак бўлган чора-тадбирлар ҳақида сўз юритди. Шунингдек, ўқувчи-ёшларни касбга-ҳунарга йўналтириш бўйича 2024 йил давомида ўтказиладиган тренинг тадбирлар хусусида батафсил маълумотлар берди.
Бу каби семинар-тренинглар барча умумтаълим мактабларининг психологларини қамраб олган ҳолда 4 та ҳудудда ўтказилиши режалаштирилган. Семинар-тренинглар “Касблар мамлакатига саёҳат”, “Ҳаётий қадриятлар ва касб танлаш”, “Барча касблар керак, барча касблар муҳим”, “Менинг характерим, камчилик ва ютуқларим” мавзуларида ўтказилади.
Ушбу семинар-тренинг машғулотлари давомида тренерлар мактаблар психологларига ўқувчи-ёшларни замонавий меҳнат бозори эҳтиёжларидан келиб чиқиб касб-ҳунарга йўналтириш, бу борада психологик қўллаб-қувватлашнинг замонавий шакл ва услубларини жорий этиш, уларга онгли ва мустақил равишда касб танлашларига методик ёрдам бериш, кўмаклашиш бўйича йўл-йўриқлар, тавсиялар беришди.
Ўқув-семинар иштирокчилари тренерларнинг “Касблар оламига саёҳат” мавзусидаги маърузасини катта эътибор билан тинглашди. Айниқса, тренерларнинг касблар ҳақидаги тақдимоти кўпчиликнинг асосий диққат марказида бўлди. Шунингдек, “Мен танлаган касб” ҳамда “Касблар занжири” тренинг машғулотларида қатнашчилар фаол иштирок этдилар.
Семинар-тренинг давомида иштирокчилар гуруҳларга бўлиниб, ўзаро беллашдилар. “Позитивлар” ва “Активлар” жамоалари аъзоларининг шартлар бўйича берган жавоблари ва ҳар бир машғулотдаги иштироки ҳакамлар ҳайъати томонидан баҳолаб борилди.
Машғулотлар қизиқарли ўтиши учун ролли ўйинлардан ҳам фойдаланилди. Шунингдек, машғулотлар давомида саккизта станция ташкил қилиниб, ҳар бир станцияда ҳар бир касбга урғу бериб ўтилди ва уларга таъриф, тавсиф берилди.
Ундан ташқари, “Жуфтингни топ”, “Ким чаққон” каби қизиқарли ўйин машғулотлари давомида ҳам психологлар ўз маҳоратини, чаққонлигини кўрсатишга ҳаракат қилишди.
Ҳакамлар иштирокчиларнинг ҳар бир ҳаракати, диққат-эътибори, тафаккури кенглигини эътиборга олиб, баҳолаб бордилар. Машғулотлар якунида “Позитивлар” жамоаси 46 балл, “Активлар” жамоаси эса 47 балл тўплади.
Ўтказилган семинарда амалиётчи психологлар ўқувчи-ёшларни касб-ҳунарга йўналтириш борасидаги ўз фикр-мулоҳазаларини, таклифларини билдириб, тажриба алмашдилар ва келгусидаги вазифаларни ҳам белгилаб олдилар.
О.Худойберганова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
