DUBAY ShAHRIDA BOʻLIB OʻTADIGAN MENTAL ARIFMETIKA MUSOBAQASIDA AMUDARYoLIK YoSh MATEMATIKLAR HAM QATNAShIShADI
Amudaryo tumanidagi Maktabgacha va maktab taʼlimi boʻlimiga qarashli “Barkamol avlod” bolalar maktabining “Mental arifmetika” toʻgaragi aʼzolari 7-8-may kunlari Birlashgan Arab Amirligining Dubay shahrida boʻlib oʻtadigan butun dunyo miqyosidagi mental arifmetika musobaqasiga yoʻllanmani qoʻlga kiritdilar.
Toʻgarak aʼzolari oʻtgan yilning 15-iyul kuni Samarqand shahrida Intellektual trenerlar hamdoʻstligi NTM tomonidan yoshlar bilim samaradorligini oshirish, aqliy salohiyatlarini mustahkamlash, qobiliyatlarini namoyon qilishlari uchun zarur shart-sharoitlar yaratish, bilim darajasini aniqlash maqsadida oʻtkazilgan “Arifmetika-2023” viloyatlararo olimpiadasida ishtirok etib, oliy oʻrinlarni egallashgan va Toshkent shahriga yoʻllanmani qoʻlga kiritishgan edi.
2024-yil 6-yanvar kuni ushbu musobaqada gʻolib boʻlgan “Barkamol avlod” bolalar maktabi va 28-sonli maktabdagi “Mental arifmetika” toʻgaragining 24 nafar aʼzolari Toshkent shahridagi “SIRIUS” oʻquv markazi hamda Nizomiy nomidagi Toshkent davlat pedagogika universiteti hamkorligida mental arifmetika boʻyicha Xalqaro musobaqada qatnashishdi. Xalqaro musobaqada muvaffaqiyatli ishtirok etgan amudaryolik yosh matematiklardan 5 nafari oliy oʻrinni, 14 nafari 1-oʻrinni, 2 nafari 2-oʻrinni va 3 nafari 3-oʻrinni qoʻlga kiritishga muvaffaq boʻldilar. Ularga musobaqa tashkilotchilari tomonidan kubok, medal va diplomlar topshirildi. Shuningdek, toʻgarak rahbarlari Surayyo Toʻramurodova, Dilbar Yerimbetova, Fazilat Kamolovalar ham mental arifmetika boʻyicha respublika va xalqaro olimpiadalardagi faolligi, oʻquvchilarining natijali koʻrsatkichlari uchun diplom va medallar bilan taqdirlanishdi.
Oliy oʻrinni egallagan toʻgarak aʼzolari Mirjalol Jumabayev, Dilafroʻz Bahodirova, Rasulbek Qoʻchqorov, Aydos Yalgʻashov, Umida Mamatjonovalar 7-8-may kunlari Birlashgan Arab Amirligining Dubay shahrida boʻlib oʻtadigan butun dunyo miqyosidagi mental arifmetika musobaqasiga yoʻllanmani qoʻlga kiritgani nafaqat tuman “Barkamol avlod” bolalar maktabi oʻqituvchi va oʻquvchilari uchun, balki butun tumanimiz uchun katta yutuq boʻldi.
“Barkamol avlod” bolalar maktabining gʻoliblariga Dubay shahrida oʻtkaziladigan mental arifmetika musobaqasida ham omad yor boʻlishini, ularning muvaffaqiyatli ishtirok etib, oliy oʻrinlar egalari boʻlishlarini tilab qolamiz.
Muhayyo Artiqboyeva, “Barkamol avlod” bolalar maktabi direktori oʻrinbosari.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
