Xush kelding, Navroʻzim, obod yurtimga!

Oqshomlari osuda, osmoni musaffo, har bir tongi ezgu niyatlar bilan otadigan yurtimizga barchamiz orziqib kutgan Navroʻzi olam kirib keldi.

Ona zaminimiz yashil libosga burkanib, betakror goʻzalligini koʻz-koʻz qilayotgan, haqiqiy koʻklam nafasi ufurib turgan shu nurafshon kunlarda barcha vatandoshlarimiz eng qadimiy va asl milliy bayramimizni shodu hurramlikda qarshi olmoqdalar.

Navroʻz yangi kun chin maʼnoda butan tabiatning uygʻonishi, dehqonchilik ishlarining boshlanishi, ezgu niyatlar ila urugʻ sepilib, toʻkin-sochinlik boʻlishini tilab hursandchilik qilinadigan, tabiatga hamohang tarzda kishilar qalbida ham yangi niyatlar, kuch-gʻayrat, azmu shijoat joʻsh uradigan, bir-biroviga mehr-oqibat, sahovat, muhtoj odamlarga beminnat yordam koʻrsatish kabi asriy urf-odatlarimiz, qadriyatlarimiz yaqqol namoyon boʻladigan kun sifatida biz uchun juda qadrli bayramdir.

Shu boisdan bayram tantanalari ovul va mahallalarda, mehnat jamoalaridan, umutaʼlim va oʻrta maxsus kasb-hunar taʼlimi muassasalarida bir nechta kun oldin boshlanib ketdi.

19-mart kuni Mangʻit shahridagi Markaziy oʻyingohda "Har kunimiz Navroʻz boʻlsin” shiori ostida boʻlib oʻtgan bayram tadbirida ham yurtdoshlarimizning ildizlari olis oʻtmishimizga tutashuvchi eng qadimiy va hamisha navqiron, asl milliy bayramimiz Navroʻz sogʻinchi, quvonchi yaqqol aks etdi.

Tantanada dastlab ovul fuqarolar yigʻinlarida faoliyat yuritayotgan mirishkor dehqonlarimiz yetishtirgan qishloq xoʻjaligi mahsulotlari, ulardan tayyorlangan noz-neʼmatlarning koʻrgazmasi bilan boshlandi. Usta-hunarmandlarimiz yasagan buyumlar, naqqoshlik namunalari hech bir tomoshabinni befarq qoldirmadi.

Keksalarni eʼzozlash yili munosabati bilan tumanimizning barcha ovul va mahallalarida oʻtkazilgan "Mahallaning eng tinib-tinchimas keksalari” koʻrik tanlovi gʻoliblarining taqdirlanishi ulkan hayotiy tajribasi, oʻzining hayoti bilan bugungi avlod vakillariga namuna boʻlib kelayotgan nuroniy keksalarimizga hurmat-ehtirom ramzi boʻldi.

Qiygʻos gullagan oʻrik ramzi, qulf urib ochilgan turfa gullar, sharlar bilan bezatilgan maydon uzra "Bahor” valsi yangradi, bulbullar sayrogʻi yigʻilganlarning koʻngliga olam-olam quvonch hadya etdi. Barcha Navroʻz ayyomi tantanalarining boshlanishini shodu-hurramlik bilan qarshi oldi.

Tuman hokimi R.Yoʻldoshevning tumanimiz aholisiga Navroʻz bayrami qutlovini birinchi oʻrinbosari B.Ernazarov oʻqib eshittirdi.

Shundan soʻng tuman madaniyat va sport boʻlim tomonidan tayyorlangan "Assalom Navroʻz” deb nomlangan teatrlashtirilgan bayram tomoshalari boshlandi. Quyosh iliq nurlarini saxiylik bilan tomoshagohda ijro etilgan ona Vatanni, Navroʻzni, yasharish fasli koʻklamni, baxtiyor zamonamizni ulugʻlovchi kuy-qoʻshiqlar, raqslar barchaga manzur boʻldi.

Navbat kurash, arqon tortishish, qoʻchqor urushtirish kabi milliy oʻyinlarga berildi.

Bayram tomoshalari barcha tomoshabinlarga cheksiz quvonch baxsh etdi.

O.RAJABOVA.