1-SONLI MAKTABDA “ASSALOM, YaNGI YIL!” DEB NOMLANGAN BAYRAM TADBIRI OʻTKAZILDI

Vaqt yugurik, shiddatli. Hademay 2023-yil ham tarixga aylanadi. Oʻtayotgan har daqiqalar bizni yangi – 2024-yilga yaqinlashtirmoqda.

Yangi yil shukuhi bois yakunlanayotgan yil umrimizning bir boʻlagini olib ketayotganini ham his qilmaymiz. Boisi bu bayramni barchamiz intiqlik bilan kutamiz. Mazkur bayram bolaligimizdan moʻʼjizalar olib keluvchi, yangi quvonchlar, orzularga yetaklaydigan kun sifatida xotiramizda qolgan.

Bayram arafasida Mangʻit shahridagi 1-sonli maktabda oʻtkazilgan “Assalom, Yangi yil” deb nomlangan bayram tadbiri ham oʻquvchilarni cheksiz shodliklarga beladi.

Maktab faollar zalida boʻlib oʻtgan tadbirga maktab direktori, oʻrinbosarlari, oʻqituvchilar, oʻquvchilar, ota-onalar vakillari ishtirok etdilar.

Tadbirni maktab direktori Dilrabo Sherboyeva ochdi va barchani yaqinlashib kelayotgan bayram bilan qutladi. Shuningdek, maktab badiiy havaskorlari ijrosida ingliz tili fani oʻqituvchilari rahbarligida tayyorlangan musiqiy–madaniy tadbirni tomosha qilishga taklif etdi.

Bayramona bezatilgan maktab faollar zaliga yigʻilganlar mahobatli archa oldiga chiqib kelgan uch nafar boshlovchi oʻquvchilarni qarsaklar bilan kutib oldilar. Ular avvalo barchani ona tilimizda hamda rus, ingliz tillarida yangi yil bilan qutladilar. Shuningdek, yangi yil bayramining kelib chiqish tarixi, turli mamlakatlarda turlicha nishonlanishi haqida batafsil maʼlumotlar berib oʻtdilar.

Taʼkidlanganidek, Yangi yil turli mamlakatlarda, turli sanalarda, turli tarzda nishonlanadi. Xususan, Italiyada bu bayram 6-yanvardan boshlanadi va anʼanaga koʻra, shu kuni barcha eski narsalar derazadan koʻchaga uloqtiriladi. Kolumbiyada mazkur bayram masxaraboz-u ertaklar qahramonlari ishtirokidagi karnaval bilan boshlanadi. Papa Paskual (Qorbobo) shahar boʻylab sayr qilib, barchani bayram bilan qutlaydi. Yaponiyada esa Yangi yilda yaqinlarga sovgʻa sifatida belkurak taqdim etiladi. Bolalar esa albatta, yangi kiyim kiyishadi.

Ha, Yangi yilni nishonlash bilan bogʻliq urf-odatlar, anʼanalar turlicha. Lekin butun oila jam boʻlib, toʻkin dasturxon atrofida, bir-birovga eng yaxshi tilaklarni izhor etib, yangi yilni nishonlashga hech narsa teng kelmaydi. Bayram munosabati bilan umumtaʼlim, maktablarida oʻtkaziladigan tadbirlar, Qorbobo, Qorqiz tashrifi, shodon oʻyin kulgular bolajonlarga oʻchmas taassurotlar hadya etadi.

Ha, bu “Assalom, Yangi yil” deb nomlangan tadbirda ham yaqqol namoyon boʻldi. Maktab oʻquvchilarining tayyorlagan maxsus musiqiy dasturidan oʻrin olgan har bir qoʻshiq, raqs, ifodali oʻqilgan sheʼrlar tomoshabinlarga juda manzur boʻldi. Ayniqsa oʻquvchilar chorlovi bilan kirib kelgan Qorbobo va Qorqiz tashrifi oʻquvchilar shodligiga shodlik qoʻshdi, ular bilan joʻrovoz boʻlib kuylangan sheʼrlar, qoʻshiq, raqslar avji juda baland boʻldi. Shuningdek, oʻzbek adabiyotining taniqli vakili Said Ahmad asari asosida tayyorlangan sahna koʻrinishi oʻquvchilarning ijodiy qobiliyatini ham yuzaga chiqardi.

Tadbir barchada ulkan taassurotlar qoldirdi.

Oygul RAJABOVA.