NOGIRONLIGI BOʻLGAN ShAXSLAR DOIMO DAVLATIMIZ EʼTIBORIDA
Mehnatga layoqatsiz va yolgʻiz keksalar, nogironligi boʻlgan shaxslar hamda aholining ijtimoiy jihatdan ehtiyojmand boshqa toifalarining huquqlari davlat himoyasidadir.
Konstitutsiyaning 57-moddasidan.
Oramizda shunday insonlar borki, ularning jismoniy imkoniyati cheklangan, lekin maʼnaviyati yuksak, ruhi esa juda kuchli va matonatli.
Har bir davlat oʻz fuqarolari manfaatlarini himoya qiladi. Ayniqsa, imkoniyati cheklangan, nogironligi bor fuqarolar hamisha eʼtiborda boʻlgan, qoʻllab-quvvatlangan.
Mazkur yoʻnalishda bosh Qomusimizning 57-moddasida - mehnatga layoqatsiz va yolgʻiz keksalar, nogironligi boʻlgan shaxslar hamda aholining ijtimoiy jihatdan ehtiyojmand boshqa toifalarining huquqlari davlat himoyasida ekanligi taʼkidlangan.
Aytish joizki, davlatimiz aholining ijtimoiy jihatdan ehtiyojmand toifalarining turmush sifatini oshirishga, jamiyat va davlat hayotida toʻlaqonli ishtirok etishi uchun ularga shart-sharoitlar yaratishga hamda ularning asosiy hayotiy ehtiyojlarini mustaqil ravishda taʼminlash imkoniyatlarini kengaytirishga qaratilgan choralarni amalga oshirib kelmoqda.
Davlat nogironligi boʻlgan shaxslarning ijtimoiy, iqtisodiy va madaniy sohalar obʼektlari va xizmatlaridan toʻlaqonli foydalanishi uchun shart-sharoitlar yaratmoqda, ularning ishga joylashishiga, taʼlim olishiga koʻmaklashmoqda, ularga zarur boʻlgan axborotni olish imkoniyatini taʼminlamoqda.
Mazkur modda bilan nogironligi boʻlgan shaxslarning huquqlarini taʼminlashning asosiy printsiplari belgilab berildi. Imkoniyati cheklangan shaxslarni ijtimoiy himoya qilish va ularning huquqlarini kafolatlashga oid qator masalalar Qonun darajasida belgilandi.
Shuningdek, nogironligi boʻlgan shaxslarning tenglik asosida barcha huquqlarini toʻliq amalga oshirishlarini ragʻbatlantirish, himoya qilish va taʼminlashga qaratilgani bilan ahamiyatlidir. U mavjud sharoitlardan foydalanish imkoniyati, shaxsiy harakatlanish, sogʻlikni saqlash, taʼlim, bandlik va siyosiy hayotda ishtirok etish hamda tenglik va kamsitmaslik kabi bir qator muhim masalalarni qamrab oladi.
Alohida qayd etish kerakki, Oʻzbekiston Nogironlar jamiyati Amudaryo tuman boʻlinmasi tomonidan tumanda istiqomat qiluvchi imkoniyati cheklangan, nogironligi bor boʻlgan insonlarga mehr-muruvvat koʻrsatish, ular hayotiga oid muammolar yechimini topishda koʻmaklashish maqsadida tez-tez xonadonlariga borib, holidan xabar olinmoqda.
Imkoniyati cheklangan, nogironligi bor bolajonlar oʻrtasida sport oʻyinlari, shashka-shaxmat boʻyicha doʻstona musobaqalar ham reja asosida oʻtkazib borilmoqda.
Shuningdek, saxovatpesha insonlar tomonidan kundalik oziq-ovqat mahsulotlari yordam paketlari tumanimizning barcha hududlaridagi imkoniyati cheklangan fuqarolarga, nogironligi boʻlgan bolajonlarga muntazam ravishda yetkazib berilmoqda.
Eng muhimi, Qonunning 6-moddasida nogironlik belgisiga koʻra, kamsitilishga yoʻl qoʻymaslik tamoyili aks ettirilgan. Unga koʻra, nogironligi boʻlgan shaxslarga nisbatan har qanday ajratib qoʻyish, istisno etish, chetlatish, cheklash yoki afzal koʻrish holatlari, shuningdek, nogironligi boʻlgan shaxslarning obʼektlar va xizmatlardan foydalanishi uchun shart-sharoitlar yaratishni rad etish taʼqiqlanadi. Bu davlatimizning insonparvarlik, bagʻrikenglik siyosatining amaldagi ifodasidir.
N.Xolboyeva,
Oʻzbekiston Nogironlar jamiyati Amudaryo tuman boʻlinmasi raisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
