Oq oltin ovulida biogumus tayyorlash boʻyicha seminar oʻtkazildi

2023-yil 3-dekabr kuni Amudaryo tumanining Oq oltin ovulida biogumus tayyorlash boʻyicha amalga oshiriladigan ishlarning borishi masalasida seminar boʻlib oʻtdi.

Seminarda Qoraqalpogʻiston Respublikasi Joʻqorgʻi Kengesi Raisi oʻrinbosari Rustam Saparboyev, tuman hokimi Sobir Xoʻjametov, tuman hokimining qishloq va suv xoʻjaligi masalalari boʻyicha oʻrinbosari Anvar Yoʻldoshev, tuman Obodonlashtirish, Veterinariya va chorvachilik boʻlimlari, Qipchoq davlat Oʻrmon xoʻjaligi rahbarlari, qishloq xoʻjaligi korxonalari masʼullari hamda fermer xoʻjaliklari raislari, tegishli soha vakillari ishtirok etdilar.

Biogumus – tabiiy tuproqqa yaqin boʻlgan oʻgʻit turi boʻlib, chirishga moyil chiqindilar – goʻng, xazonrezgi, somon, oʻsimlik uyumlarini Kaliforniya qizil chuvalchangi organizmidan oʻtkazish orqali olinadi.

U qoramtir rangda, quruq va suyuq holatda boʻladi. Uning tarkibidagi mikroorganizmlar tuproqning aerobik, anaerobik mikroelementlar bilan boyitilishiga sharoit yaratib beradi. Shuningdek, tuproqning mexanik zichligini ham meʼyoriga keltiradi.

Biogumus – urugʻlarning unib chiqishini sezilarli darajada tezlashtiradi, koʻchat oʻsishi va ildiz shakllanishini faol ravishda ragʻbatlantiradi, tuproqni boyitadi va ozuqa moddalarining soʻrilishini yaxshilaydi, kislotalilikni pasaytiradi va tuproqning tuzilishini yaxshilaydi. U oʻsimliklarning turli kasalliklarga qarshi immunitetini oshiradi va ulardan keyin tiklanishiga yordam beradi. Biogumus oʻsimlikning noqulay ekologik sharoitlarga qarshi chidamligini oshirib, gullashini ragʻbatlantiradi, mevalarning pishishini tezlashtiradi, ularning hosildorligi va sifatini oshiradi.

Seminarda tuman hokimi Sobir Xoʻjametov soʻzga chiqib, biogumus tuproqni mukammal darajada sogʻlomlashtirishini, boshqa har qanday organik moddalar bilan yaxshi birlashishini va hosilning sifatini yaxshilashga xizmat qilishini aytib oʻtdi.

Joriy yilda tuman boʻyicha jami 1 ming 110 tonna biogumus tayyorlash rejalashtirilgan. Shundan, tuman hokimligi 200 tonna, Qipchoq davlat Oʻrmon xoʻjaligi 200 tonna, Obodonlashtirish boshqarmasi 200 tonna hamda fermer xoʻjaliklari 510 tonna biogumus tayyorlashi reja qilingan.

Seminarda soʻzga chiqqan masʼullar oxirgi yillarda bu organik chiqindi qishloq xoʻjaligi sohasida va oziq-ovqat sanoatida keng koʻlamda qoʻllanilayotgani, uning tarkibidagi mikroorganizmlar tuproqning aerobik, anaerobik, mikroelementlar bilan boyitilishiga sharoit yaratib berishini hamda tuproqning mexanik zichligini ham meʼyoriga keltirishini taʼkidlab oʻtdilar.

Mutaxassislar tuproqqa biogumus solishning ham meʼyorlariga eʼtibor qaratish lozimligini alohida taʼkidlab oʻtdilar. Unumdorligi past boʻlgan tuproqni laboratoriya tahlillaridan oʻtkazib, mutaxassislarning tavsiyasi asosida belgilangan miqdorda biogumus solinadi. Biogumus solingan tuproqda yetishtirilayotgan ekin kasalliklarga chidamli boʻlishi va erta pishib yetilishi bilan ham ahamiyatlidir.

Buning bir necha usullari mavjud. Yerga urugʻ qadayotganda u bilan birga biogumus solish ham yaxshi samara beradi. Tuproqqa qaysi paytda, qancha miqdorda biogumus solish esa agrotexnolog mutaxassislarning tavsiyasi asosida amalga oshirilishi haqida seminar ishtirokchilariga soha mutaxassislari tomonidan batafsil maʼlumotlar berildi.

Tuman hokimligi Axborot xizmati