79-sonli maktabda oʻqituvchilarning 4K modeli boʻyicha koʻnikmalarini shakllantirish maqsadida seminar boʻlib oʻtdi

Qoraqalpogʻiston Respublikasi Maktabgacha va maktab taʼlimi vazirligining 2023-yil 10-noyabr kungi buyrugʻiga asosan Qoraqalpogʻiston Respublikasidagi Pedagoglarni yangi metodikalarga oʻrgatish milliy markazi tomonidan taʼlim sifati yuqori boʻlmagan umumiy oʻrta taʼlim maktablariga manzilli metodik xizmat koʻrsatish boʻyicha bir qator ishlar amalga oshirilmoqda.

Shu yoʻnalishda 24-noyabr kuni Amudaryo tumani Maktabgacha va maktab taʼlimi boʻlimiga qarashli 79-sonli maktabda bir guruh tajribali metodistlar ishtirokida seminar boʻlib oʻtdi.

Unda Qoraqalpogʻiston Respublikasidagi Pedagoglarni yangi metodikalarga oʻrgatish milliy markazi Metodik xizmat koʻrsatish boʻlim boshligʻi Abatbay Kenesbayev, metodistlar, mazkur maktab oʻqituvchilari hamda tegishli soha vakillari ishtirok etdilar.

Seminarda Metodik xizmat koʻrsatish boʻlimi metodistlari Nargiza Matlatipova va Dilorom Aytmurotova yigʻilgan oʻqituvchilarga darslarida 4K modeli boʻyicha koʻnikmalarini shakllantirish maqsadida mahorat darslarini oʻtdilar.

 Aytish joizki, zamonaviy taʼlimni rivojlantirishda 4K modeli asosida hayotiy koʻnikmalarni darslarda unumli tashkil etishga Amudaryo tumanidagi maktablarda ham belgilangan reja asosida ishlar davom etmoqda.

79-sonli maktabda tashkil etilgan mazkur seminar jarayonida malakali mutaxassislar tomonidan ilgʻor tajribalar asosida yaratilgan oʻquv dasturlarini amaliyotga joriy etish va buning uchun har bir pedagogdan talab etiladigan kasbiy rivojlanish, yangi bilim va dunyoqarashga ega boʻlish borasida lozim boʻlgan bilim va metodik tavsiyalar berildi.

Shundan soʻng seminarning kun tartibiga qoʻyilgan pedagog kadrlar tarkibining sifati va ularni kasbiy rivojlantirishga doir masalalar yuzasidan soha vakillarining maʼruzasi tinglandi.

Seminar davomida maktabning ona tili va adabiyot fani oʻqituvchilari Mohigul Rajapova va Laylo Rajapboyeva, qoraqalpoq tili fani oʻqituvchisi Qirmizi Nurmanova, boshlangʻich taʼlim oʻqituvchisi Goʻzal Kamolovalar ochiq darslar oʻtdi.

Metodik xizmat koʻrsatish boʻlimi metodistlari tomonidan oʻtkazilgan ochiq darslar tahlil qilindi va oʻqituvchilarga darslar samaradorligini yanada oshirish yuzasidan tegishli tavsiyalar berildi.

Metodik xizmat koʻrsatish boʻlimi boshligʻi Abatbay Kenesbayev oʻz soʻzida maktab pedagogika jamoasining aksariyatini yoshlar tashkil qilishini va ularning shijoati, gʻayrati, faolligidan mamnun ekanligini aytib oʻtdi.

Maktab oʻqituvchilari oʻtkazilgan mahorat darslaridan tegishli xulosa chiqarib, dars jarayonida tavsiya etilgan metodlardan unumli foydalanib, taʼlim sifatini oshirishga intilishlarini aytishdi.

Seminar yakunida oʻquvchi-yoshlarga taʼlim-tarbiya berishda amalga oshirilish lozim boʻlgan ishlar ham tahlil qilindi va kelgusidagi vazifalar belgilab olindi.

Tuman hokimligi Axborot xizmati