KASBIMIZ MAShAQQATLI, AMMO ShARAFLI

Xalq salomatligi yoʻlida, fidoyilik bilan mehnat qilayotgan tibbiyot xodimlari har qancha eʼzozga, eʼtirofga munosib. Bemorlarga shifo ulashib kelayotgan shifokor, hamshiralar  Qipchoq oilaviy shifokorlik  punktida  ham talaygina.

Mamlakatimizda aholi sogʻligʻini muhofaza qilishga davlat tomonidan berilayotgan eʼtibor, aholiga tibbiy xizmat koʻrsatish sifatini oshirish borasida amalga oshirilayotgan keng qamrovli ishlar  mazkur tibbiy muassasada ham oʻzining yaqqol ifodasini topmoqda.

Men oʻz qiziqishlarimga koʻra  Ellikqalʼadagi tibbiyot bilim yurtiga oʻqishga kirdim va 2003-yilda bitirib chiqdim. Qipchoq shaharchasidagi kasalxonaning terapiya boʻlimida mehnat faoliyatimni boshladim. Hozirgi kunda 1-sonli oilaviy poliklinikadagi tibbiy brigadada patronaj hamshirasi boʻlib ishlayman. Mening zimmamga Beshtom mahallasi hududida istiqomat qiluvchi 208 ta xonadondagi 1 ming 30 nafar  aholiga sifatli tibbiy xizmat koʻrsatishdek masʼuliyatli vazifa yuklangan. Bir yoshgacha boʻlgan 31 nafar bolajonlardan har oyda bir marta xabar olib, salomatligini nazorat qilish, vaznini oʻlchash,  ularni koʻkrak suti bilan ovqatlantirishni targʻib etish, 14 nafar nogironligi boʻlgan fuqarolarning sogʻligʻini muntazam nazorat qilib borish, zarur hollarda davolanishga tavsiyalar berib borishdan  tashqari,  aholi orasida sogʻlom turmush tarzi afzalliklarini  tushuntirib, sogʻlom yashashlariga erishish oson emas. Bundan tashqari, tugʻish yoshidagi ayollardan xabar olib turish, tugʻruq oraliqlarini toʻgʻri rejalashtirishga  oʻrgatish, hovli-joylarni ozoda, orasta saqlab, sanitariya-gigiyena qoidalari asosida hayot kechirishga  targʻib etish ham masʼuliyatli vazifa hisoblanadi. Bular bir qarashda juda murakkabdek tuyulsa-da, sidqidildan ishlagan odamga zavqli va sharafli. Xonadonlarga kirib borganimda  odamlarning ochiq chehra bilan qarshi olib, tavsiyalarimga quloq solishlari, amal qilishlari, nuroniy keksalarning sogʻligʻini tekshirib, shirin soʻzlar bilan tasalli berganimda koʻngillari koʻtarilib,  minnatdor boʻlishlari menga kuch–gʻayrat bagʻishlaydi. Xizmat hududimdagi har bir xonadon aʼzolari  koʻnglimga yaqin, qadrdon. Shu boisdan ham har kuni xizmat vazifamga xush kayfiyatda otlanaman.

  Yurtimizda noyabr oyining ikkinchi yakshanbasi  Tibbiyot xodimlari kuni sifatida nishonlanishi  bizning  sohamizga, mashaqqatli mehnatimizga  hurmat-ehtirom ramzidir. Barcha tibbiyot xodimlarini kasb bayramlari bilan qizgʻin qutlab, uzoq umr tilayman.

Mastura TOʻRABOYeVA, 1-sonli oilaviy poliklinika patronaj hamshirasi.