“MAFTUNA MED MANGʻIT” KLINIKASINING FIDOYI ShIKOFORI

Mangʻit shahri Navoiy nomli mahallasining tuman Tibbiyot birlashmasi joylashgan hududini tom maʼnoda shifokorlar shaharchasi deyish mumkin. Yildan-yilga xususiy shifokorlik obʼektlari qad rostlab, eng zamonaviy tibbiy tekshiruv va tashxis apparatlari bilan jihozlangan xususiy klinikalar, tibbiy maslahat markazlari xalqimizga beminnat xizmat koʻrsatayotganidan mijozlar mamnun. Ana shunday xususiy tibbiyot klinikalaridan biriga Ulugʻbek Abdurahmonov rahbarlik qiladi.

“Maftuna med Mangʻit” MChJ shaklidagi mazkur klinika oʻz faoliyatini boshlaganiga hali koʻp vaqt boʻlgani yoʻq. 2022-yilda oʻz faoliyatini boshlagan mazkur klinika zamonaviy UZI va EKG apparatlari bilan jihozlangan. Bundan ham muhimi, klinika bosh shifokori davolash ishlari boʻyicha koʻp yillik tajribaga ega oliy toifali shifokor Zulxumor Gaipova ultratovush tekshiruvi yoʻnalishi boʻyicha yuqori malaka va tajribaga ega. Qolaversa, bemorning holatini oʻrganish borasida oʻziga xos ish uslubiga ega mutaxassis sifatida tanilgan.

Asli Xitoy qishlogʻida, oddiy dehqon oilasida dunyoga kelgan Zulxumor oiladagi 10 nafar farzandning ikkinchisi edi. Butun umrini qishloq xoʻjaligi sohasiga bagʻishlagan oddiy traktorchi Jumaniyoz ota va kolxoz ishchisi Xoljon momoning 8 qiz, ikki oʻgʻil farzandi ichida Zulxumor oʻzining dadilligi, qatʼiyatliligi bilan opa-singillari va ukalaridan ajralib turardi. U bolaligidan yaqinlariga mehribon, sinchkov va qatʼiyatli, intiluvchanligi bilan ustozlarining eʼtiborini qozondi. Umumtaʼlim maktabini tugatib: “men shifokor boʻlaman”, deganida uning bu qaroridan birinchi quvongan ham, qoʻllab-quvvatlagan ham ota-onasi boʻldi.

- Shu qizimizning muomalasidan tabiblikka ixlosi maʼlum, - derdi otasi Jumaniyoz ota.

- Odamning yuziga qarab tan-jonining holatini biladi-ya, koʻz tegmasin, - deya ich-ichidan quvvatlardi onasi.

Farzandning ota-onasi nazariga tushib, ishonchiga sazovor boʻlishi uning kelajagini belgilaydi, deyishadi. Balki rostdir. Zuxumor ota-onasining oq fotihasini olib Andijon tibbiyot instituti talabasi boʻlganida, 1992-yilda mazkur tibbiyot institutini davolash ishi mutaxassisligi boʻyicha muvaffaqiyatli tugatganida, Jumaniyoz ota bilan Xoljon momo qizining shifokorlik diplomini koʻzlariga surib quvonganlarida ana shu mehribon insonlarining duolari uni qoʻllaganini yurak-yuragidan his qildi.

- Sen eling, yurting oldida qarzdorsan, bolam, - degandi oʻshanda Alloh rahmat qilsin onasi. – Axir davlat seni 16-yil davomida beminnat oʻqitdi, kasb-korli qildi. Endi sen ana shunga munosib xalqqa xizmat qilishing kerak.

Zulxumor 1992-1993-yillarda Nukus shahar yuqumli kasalliklar shifoxonasida internatura bosqichini oʻtaganida, keyinchalik 1993-2014-yillarda Amudaryo tumani markaziy shifoxonasining Tez tibbiy yordam boʻlimida navbatchi shifokor sifatida faoliyat olib borganida ham onasining “sen eling, yurting oldida qarzdorsan” – degan soʻzlarini aslo unutmadi. Faoliyatining har bir lahzasida shifo istab kelgan insonlarga chin dildan yordam berish, ularning dardlariga darmon boʻlishga intilib yashadi. 2014-yildan TTBning shoshilinch tibbiy yordam boʻlimida terapevt sifatida shifokorlik faoliyatini davom ettirgan Zulxumor Gaipova doimiy izlanishdan, tibbiyot sohasiga oid innovatsion loyihalar ustida ishlashdan toʻxtamadi. U boʻlimga davolanish uchun kelgan bemor holatini psixologik tahlil qilib, bemorga qoʻyilgan tashxisning toʻgʻriligiga ishonch hosil qilgandan keyingina muolaja choralarini belgiladi. Natijada Zulxumor Gaipova davolagan bemorlar tez shifo topib, u elga qoʻli yengil shifokor sifatida tanildi.

Zulxumor umr yoʻldoshi Ulugʻbek Abdurahmonov bilan maslahatlashib, tibbiyot sohasida tadbirkorlik faoliyatini boshlashga, mamlakatimizda tibbiyot sohasiga koʻrsatilayotgan eʼtibor va ragʻbatdan unumli foydalanish orqali xalqqa yanada samarali xizmat koʻrsatishga qaror qildi va umr yoʻldoshining qoʻllab-quvvatlashi, qolaversa, oʻz orzularini amalga oshirish niyatida 2022-yilda MChJ shaklidagi “Maftuna med Mangʻit” xususiy klinikasini ochishdi. 280 mln. soʻmlik oʻz mablagʻlari hisobidan zamonaviy tibbiy jihozlar sotib olib, tibbiy tashxislash faoliyatini yoʻlga qoʻydi.

Xususiy tibbiy klinika ochilishi munosabati bilan Zulxumor Gaipovaning oʻzidan tashqari 5 nafar oʻrta tibbiyot hamshiralarining doimiy ish bilan bandligi taʼminlandi. Klinikada 2022-yilda 260 nafar bemorga davolash-maslahat xizmatlari, koʻrsatilgan boʻlsa, 2023-yilning oʻtgan 10 oyi davomida 350 nafardan ziyod bemorga tibbiy xizmatlar koʻrsatildi. Shuningdek, klinikada 2023-yilda 130 nafar aholi vakillari chuqurlashtirilgan tibbiy koʻrikdan oʻtkazildi. Bundan tashqari, klinika hududida istiqomat qiluvchi, shuningdek, tumanning turli hududlaridan shifo istab kelgan bemorlarni tibbiy koʻrikdan oʻtkazish, kasalligi aniqlangan bemorlarga malakali tibbiy xizmat koʻrsatilib, statsionar va ambulator sharoitlarda sogʻlomlashtirish ishlari amalga oshirilayotganidan aholi mamnun.

Zulxumor Gaipova xususiy klinikada bosh shifokor lavozimida faoliyat yuritishdan tashqari, tuman TTBning shoshilinch tibbiy yordam boʻlimi terapevt shifokori sifatida bemorlar dardiga malham boʻlayotgan fidoyilardan. Oilada esa uning oʻz oʻrni, mavqei bor. Umr yoʻldoshi, taʼlim va fan xodimlari kasaba uyushmasi Amudaryo tuman boʻlinmasi Kengashi raisi Ulugʻbek Abdurahmonov bilan ikki qiz bir oʻgʻilni oʻqimishli insonlar qilib voyaga yetazishmoqda. Uchala farzandlari ham oliygoh talabalari, Umidaxon boʻlgʻusi shifokor, Maftuna QDU, Bunyodbek esa Samarqand Veterinariya institutining Nukus filiali talabasi. Oilaviy hayotini, farzandlari tarbiyasini havasga munosib tarzda yoʻlga qoʻygan, kasbiy faoliyati jarayonida oʻzining xushmuomalaligi, bilimdonligi bilan el-yurt hurmatini qozongan Zulxumor Gaipovaning turmush tarzi koʻplarga ibrat. Hamma narsaga vaqt topa olgan, ayniqsa, bemorlar muolajasi, ularning tuzalib ketishi uchun fidoyi mehnat qilishdan aslo charchamaydigan Zulxumor Gaipovani hamisha band holatda uchratasiz. U huzuriga shifo istab kelgan insonlarning har biri bilan erinmay suhbatlashadi, xastalikdan asoratsiz sogʻayib ketishlari uchun jon kuydiradi. Shu bois, “Maftuna med Mangʻit” klinikasi mijozlari bu fidoyi, elparvar shifokordan mamnun Xalq hurmatiga sazovor boʻlish esa shifokor uchun baxt.

Biz Zulxumor Gaipovani kasb bayrami bilan muborakbod etamiz va aslo qoʻlingiz dard koʻrmasin, el-yurtga shifo ulashishdek ezgu ishingiz bardavom boʻlsin, deymiz.

Robiya YOʻLDOShEVA.