9 OY MOBAYNIDA DAVLAT XIZMATLARI MARKAZIDA TUMANIMIZ FUQAROLARIGA 54 MING 175 TA XIZMAT KOʻRSATILDI

Yurtimizda davlat xizmatlari markazi tomonidan dastlabki yillarda 30 turga yaqin xizmat koʻrsatilgan boʻlsa, hozirgi paytga kelib xizmatlar soni 300 turga yetkazildi. Markaz tomonidan yildan-yilga takomillashgan holda koʻrsatilayotgan xizmatlardan, ortiqcha ovoragarchiliklarga barham berilayotganidan aholi juda mamnun. Hozirgi kunda Davlat xizmatlari markazi orqali koʻrsatiladigan xizmatlar soni yana 1 taga koʻpaytirilib, aholiga belgilangan tartibda Oʻzbekiston Respublikasi xorijga chiqish biometrik pasportini berish ham yoʻlga qoʻyildi.

Amudaryo tumani Adliya boʻlimi Davlat xizmatlari markazi orqali hamda Yagona interaktiv davlat xizmatlari portali orqali ham aholiga bir joyda, tezkor, qulay, shaffof va sifatli xizmat koʻrsatish yoʻlga qoʻyilgan boʻlib, joriy yilning 9 oyi davomida jami 54 ming 175 ta davlat xizmati koʻrsatilgan. Ushbu davr mobaynida yuridik shaxslar 1 ming 800 tadan ortiq davlat xizmatlari, jismoniy shaxslar 52 mingdan ortiq davlat xizmatlaridan foydalangan.

Oʻtgan davr mobaynida Davlat xizmatlari markazida hamda Yagona interaktiv davlat xizmatlari portali orqali elektron raqamli imzo kalitlarini berish boʻyicha 12 ming 357ta, bolani davlat maktabgacha taʼlim muassasasiga joylashtirish uchun 6 ming 897ta, ruhiy kasalliklar boʻyicha dispanser hisobida turishi yoki turmasligi toʻgʻrisida maʼlumotnoma olish boʻyicha esa 2 ming 729ta xizmat koʻrsatildi.

Shuningdek, narkologiya kasalliklar boʻyicha dispanser hisobida turishi yoki turmasligi toʻgʻrisida maʼlumotnoma olish boʻyicha koʻrsatilgan xizmatlar 2 ming 735ta, kadastr pasportini shakllantirishga doir xizmatlar 4 ming 207ta, koʻchmas mulk obʼektlariga boʻlgan huquqlarni davlat roʻyxatidan oʻtkazish boʻyicha 3 ming 505ta, qurilish-montaj ishlari tugallangan obʼektdan foydalanish uchun ruxsatnoma berish va kadastr hujjatlarini rasmiylashtirishga doir koʻrsatilgan xizmatlar 3 ming 38tani tashkil qildi. Sudlanmaganlik yoki sudlanganlik toʻgʻrisida maʼlumotnomalarni olish uchun ariza yuborish xizmati 1 ming 876ta, keksalar va nogironligi boʻlgan shaxslarga sanatoriylarda davolanish uchun yoʻllanmalar berish boʻyicha koʻrsatilgan xizmatlar 1 ming 323 ta boʻldi.

“Bir million dasturchi” loyihasi doirasida oʻquv kurslarini muvaffaqiyatli tugatgan yoshlarga, shuningdek, IT-park rezidentining oʻquvchisi yoki bitiruvchisi boʻlgan yoshlarga kompyuter xarid qilish boʻyicha isteʼmol krediti foizlarini qoplab berishga doir 1 ming 260ta, mavzuli soʻrovlarni ijro etish boʻyicha 1 ming 120ta, nafaqa tayinlash uchun ariza berish 1 ming 75ta, avtomobil transportida yoʻlovchilarni va yuklarni xalqaro yoʻnalishlar boʻyicha tashishga litsenziya olish boʻyicha 460ta, mobil ID tizimidan roʻyxatdan oʻtkazishga doir 1 ming 844ta xizmatlar koʻrsatildi.

Undan tashqari, 159 nafar yuridik shaxslar, 662 nafar yakka tartibdagi tadbirkorlar davlat roʻyxatidan oʻtkazilgan. Shuningdek, 140 nafar yuridik shaxslar, 54 nafar yakka tartibdagi tadbirkorlarga esa qayta davlat roʻyxatidan oʻtkazish xizmati koʻrsatilgan.

Joriy yilning yanvar-sentyabr oylari mobaynida Davlat xizmatlari markazlari tomonidan tumandagi ovul va mahallalari fuqarolari sayyor tartibda 2 ming 845ta davlat xizmatlaridan foydalanishdi. Ushbu jarayonlarda fuqarolarga elektron davlat xizmatlaridan foydalanish boʻyicha koʻnikmalar, sohaga oid yangiliklar haqida batafsil maʼlumotlar berildi.

Davlat xizmatlari markazining Xitoy ovulidagi filialida ham hudud aholisiga muntazam ravishda davlat xizmatlarini koʻrsatish yoʻlga qoʻyilgan boʻlib, oʻtgan davr mobaynida 2 ming 313taga yaqin xizmat koʻrsatilgan.

Aholi bilan yaqindan muloqot qilish, shaffoflikni taʼminlash Davlat xizmatlari faoliyatini samarali yoʻlga qoʻyishda elektron hamkorlik qulaylik yaratmoqda. Yaqin kunlargacha fuqarolar hujjatbozlik ishlarida qiynalar, bitta hujjatni toʻgʻrilash uchun, idorama-idora ovora boʻlardi. Bir soʻz bilan aytganda, Davlat xizmatlari markazi aholining koriga yaraydigan, ogʻirini yengil qiladigan muassasaga aylandi.

S. Haytboyev, tuman Adliya boʻlimi DXM boʻlim boshligʻi.