KOʻNGILLAR KOʻNGILLARDAN SUV IChGAN UChRAShUV

Barcha davrlarda ham yoshlar taʼlim-tarbiyasi, ularning hayotda oʻz oʻrinlarini topishi, jamiyatning faol aʼzosiga aylanishi uchun kurash eng ustuvor vazifalardan biri boʻlib kelgan. Bu borada aynan yoshlar bilan shugʻullanuvchi tashkilot – sobiq ittifoq davrida “Komsomol” qoʻmitasi, 1991-1996-yillarda mazkur tashkilot oʻrnida Oʻzbekiston Yoshlar ittifoqi faoliyat yuritgan edi.

1996-yilning aprel oyida esa mamlakatimizning birinchi Prezidenti Islom Karimov Farmoni bilan “Kamolot” jamgʻarmasi tuzildi, ushbu jamgʻarma 2001-yilda Yoshlar ijtimoiy harakatiga aylantirildi.

2017-yilda “Kamolot” Yoshlar ijtimoiy harakatiga nisbatan yoshlarning ishonchi soʻnib borayotgani taʼkidlanib, tashkilot nomini va faoliyatini tubdan oʻzgartirish vaqti kelgani, shu munosabat bilan “Kamolot” YoIH tugatilib, uning oʻrnida Oʻzbekiston yoshlar ittifoqi tuzilgani maʼlum qilindi.

Keyinchalik ushbu tashkilot Yoshlar ishlari agentligiga aylantirildi va uning zimmasiga yurtimiz yoshlarini bilimli, xalqaro maydonda raqobatbardosh, mehnatkash va vijdonli qilib tarbiyalash, kattalarga hurmat, zaiflarga gʻamxoʻr, yangicha qarashlarning magʻzini anglab, unga nisbatan oʻz pozitsiyasini toʻgʻri belgilay oladigan, oʻzbek madaniyatining eng yaxshi anʼanalarini hurmat qiladigan, eʼzozlaydigan yoshlar safini jipslashtirish, kengaytirish yuklandi.

Shuningdek, barkamol avlodni tarbiyalash butun davlatning, jamiyatning ishi, yoshlar tarbiyasi oiladan boshlab, fuqarolik jamiyatining barcha tashkilotlariga ustuvor vazifa qilib belgilandi.

Amudaryo tumanida qator yillar ushbu tashkilotlarda faoliyat yuritib, yoshlar hayotining nurli va mazmunli boʻlishiga, ularning jamiyat hayotidagi faol ishtirokini taʼminlashga hissa qoʻshgan bir guruh faxriy insonlar istiqomat qilishadi.

Yaqinda ular Mangʻit shahridagi “Istiqlol” toʻyxonasida toʻplanishib, dildan suhbat qurdilar. Ularning orasida tumanimizdagina emas respublikamizda, Xorazm vohasida ham taniqli soʻz ustasi, suxandon, mumtoz adabiyotimizning bilimdoni, Oʻzbekiston Yozuvchilar uyushmasi aʼzosi Tursunboy Abdullayev, turli rahbarlik lavozimlarida ishlab, nafaqaga chiqqan Yangiboy Rajabov, Ozod Tojimurodov, Gulasal Oʻrozimbetova, Gulchehra Otaboyeva, Sayyora Matkarimova, Farhod Matkarimov va boshqalar bor.

Doʻstlar davrasini Yangiboy Rajabov ochdi va barchani diydorlashuv onlari bilan qizgʻin qutladi, uzoq umr, baxt-saodat, oilaviy xotirjamlik tiladi. Shundan soʻng bir safda ishlab, hayotdan bevaqt koʻz yumgan ustozlar, doʻstlar xotirasiga Baxtiyor Jumabekov Qurʼon tilovat qildi.

Doʻstlar diydori... Uni alloma dunyoning barcha shodliklaridan ustun qoʻygani bejiz emas. Mazkur davrada ham nigohlar sogʻinchdan soʻyladi. Eng ezgu tilaklar izhor etilib, koʻngillar koʻngillardan suv ichdi, xotiralar tillarga koʻchib, hayotlarining eng qaynoq damlari – mehnat jarayonlari koʻz oldlarida qayta jonlandi.

Umr oʻtkinchi. Otilgan oʻk kabi oʻtgan umrni ham orqaga qaytarib boʻlmaydi. Biroq shu oʻtgan davrlarda el-yurt manfaati uchun xizmat qilsang, bosgan izlaringdan yorugʻ xotiralar qolsa, bu – baxt, albatta.

Mazkur diydorlashuv tadbiri ishtirokchilari – mehnat faxriylarining barchasi ana shunday baxtga musharraf boʻlgan insonlardir. Shu boisdan ham ular doimo bir-birini yoʻqlab turadilar, sogʻinadilar, bamaslahat bir davraga toʻplanib turadilar.

Diydorlashuvdan esa unutilmas taassurotlar oladilar.

Oygul RAJABOVA.