КЎНГИЛЛАР КЎНГИЛЛАРДАН СУВ ИЧГАН УЧРАШУВ

Барча даврларда ҳам ёшлар таълим-тарбияси, уларнинг ҳаётда ўз ўринларини топиши, жамиятнинг фаол аъзосига айланиши учун кураш энг устувор вазифалардан бири бўлиб келган. Бу борада айнан ёшлар билан шуғулланувчи ташкилот – собиқ иттифоқ даврида “Комсомол” қўмитаси, 1991-1996 йилларда мазкур ташкилот ўрнида Ўзбекистон Ёшлар иттифоқи фаолият юритган эди.

1996 йилнинг апрель ойида эса мамлакатимизнинг биринчи Президенти Ислом Каримов Фармони билан “Камолот” жамғармаси тузилди, ушбу жамғарма 2001 йилда Ёшлар ижтимоий ҳаракатига айлантирилди.

2017 йилда “Камолот” Ёшлар ижтимоий ҳаракатига нисбатан ёшларнинг ишончи сўниб бораётгани таъкидланиб, ташкилот номини ва фаолиятини тубдан ўзгартириш вақти келгани, шу муносабат билан “Камолот” ЁИҲ тугатилиб, унинг ўрнида Ўзбекистон ёшлар иттифоқи тузилгани маълум қилинди.

Кейинчалик ушбу ташкилот Ёшлар ишлари агентлигига айлантирилди ва унинг зиммасига юртимиз ёшларини билимли, халқаро майдонда рақобатбардош, меҳнаткаш ва виждонли қилиб тарбиялаш, катталарга ҳурмат, заифларга ғамхўр, янгича қарашларнинг мағзини англаб, унга нисбатан ўз позициясини тўғри белгилай оладиган, ўзбек маданиятининг энг яхши анъаналарини ҳурмат қиладиган, эъзозлайдиган ёшлар сафини жипслаштириш, кенгайтириш юкланди.

Шунингдек, баркамол авлодни тарбиялаш бутун давлатнинг, жамиятнинг иши, ёшлар тарбияси оиладан бошлаб, фуқаролик жамиятининг барча ташкилотларига устувор вазифа қилиб белгиланди.

Амударё туманида қатор йиллар ушбу ташкилотларда фаолият юритиб, ёшлар ҳаётининг нурли ва мазмунли бўлишига, уларнинг жамият ҳаётидаги фаол иштирокини таъминлашга ҳисса қўшган бир гуруҳ фахрий инсонлар истиқомат қилишади.

Яқинда улар Манғит шаҳридаги “Истиқлол” тўйхонасида тўпланишиб, дилдан суҳбат қурдилар. Уларнинг орасида туманимиздагина эмас республикамизда, Хоразм воҳасида ҳам таниқли сўз устаси, сухандон, мумтоз адабиётимизнинг билимдони, Ўзбекистон Ёзувчилар уюшмаси аъзоси Турсунбой Абдуллаев, турли раҳбарлик лавозимларида ишлаб, нафақага чиққан Янгибой Ражабов, Озод Тожимуродов, Гуласал Ўрозимбетова, Гулчеҳра Отабоева, Сайёра Маткаримова, Фарҳод Маткаримов ва бошқалар бор.

Дўстлар даврасини Янгибой Ражабов очди ва барчани дийдорлашув онлари билан қизғин қутлади, узоқ умр, бахт-саодат, оилавий хотиржамлик тилади. Шундан сўнг бир сафда ишлаб, ҳаётдан бевақт кўз юмган устозлар, дўстлар хотирасига Бахтиёр Жумабеков Қуръон тиловат қилди.

Дўстлар дийдори... Уни аллома дунёнинг барча шодликларидан устун қўйгани бежиз эмас. Мазкур даврада ҳам нигоҳлар соғинчдан сўйлади. Энг эзгу тилаклар изҳор этилиб, кўнгиллар кўнгиллардан сув ичди, хотиралар тилларга кўчиб, ҳаётларининг энг қайноқ дамлари – меҳнат жараёнлари кўз олдларида қайта жонланди.

Умр ўткинчи. Отилган ўк каби ўтган умрни ҳам орқага қайтариб бўлмайди. Бироқ шу ўтган даврларда эл-юрт манфаати учун хизмат қилсанг, босган изларингдан ёруғ хотиралар қолса, бу – бахт, албатта.

Мазкур дийдорлашув тадбири иштирокчилари – меҳнат фахрийларининг барчаси ана шундай бахтга мушарраф бўлган инсонлардир. Шу боисдан ҳам улар доимо бир-бирини йўқлаб турадилар, соғинадилар, бамаслаҳат бир даврага тўпланиб турадилар.

Дийдорлашувдан эса унутилмас таассуротлар оладилар.

Ойгул РАЖАБОВА.