«YoSh KITOBXON» TANLOVINING TUMAN GʻOLIBLARI ANIQLANDI

Oʻzbekiston Respublikasi Yoshlar ishlari agentligi tomonidan mutasaddi vazirlik va idoralar hamkorligida anʼnaviy tarzda oʻtkazilib kelinayotgan “Yosh kitobxon” tanlovi tobora keng qamrov kasb etmoqda. 3ta yosh toifasida, 5 bosqichda oʻtkaziladigan mazkur maʼnaviy-maʼrifiy tadbir doirasida ayni paytga qadar 3,6 million nafardan ortiq yoshlar ishtirok etishib, ulardan 14 nafari tanlovning mutlaq gʻoliblari boʻlishdi va Prezident sovgʻasi – “Spark” avtomobillari bilan mukofotlandilar.

Yoshlar maʼnaviyatini yuksaltirish, ular oʻrtasida kitobxonlikni keng targʻib qilish, 5ta muhim tashabbus doirasidagi tadbirlarga yoshlarni keng jalb qilish orqali ularning intellektual salohiyatini yuksaltirishga qaratilgan mazkur tanlov yil sayin koʻproq yoshlarni jalb qilmoqda.

Diyorimizdan yetishib chiqqan buyuk alloma, adib va mutafakkirlarimizning boy maʼnaviy merosini, umumbashariy tsivilazatsiyaga, madaniyat, dunyoviy va diniy ilm-fan taraqqiyotiga ulkan hissa qoʻshgan ulugʻ ajdodlarimizning noyob asarlarini asrab-avaylash, kelgusi avlodlarga bezavol yetkazish, ularning nodir merosini, ibratli hayoti va ijtimoiy faoliyatini har tomonlama chuqur oʻrganish va targʻib etish, yoshlarimizni oʻzlikni anglash, umuminsoniy qadriyatlarga hurmat ruhida tarbiyalash maqsadida Respublika miqyosida tashkillashtirilayotgan “Yosh kitobxon” koʻrik-tanlovi har yili yuksak iqtidor egalari boʻlgan bilimdon yoshlarni kashf etmoqda.

Amudaryo tumanida ham har yili “Yosh kitobxon” tanlovi yuksak uyushqoqlik bilan, koʻtarinki ruhda oʻtkaziladi. Tanlov ishtirokchilari orasida Prezident sovgʻasi – “Spark” avtomobili sovrindorlarining ham borligi amudaryolik yoshlarning intillektual salohiyati yuksakligidan dalolatdir.

Joriy yilning 27-oktyabr sanasida boʻlib oʻtgan “Yosh kitobxon” tanlovining Amudaryo tuman bosqichi ham maʼnaviyatga oshno, axloqan yetuk, bilimdon yoshlar safi tobora oshib borayotganining amaliy isboti sifatida eʼtirof etildi. Unda 3ta yosh toifasidagi, yaʼni, 10-14, 15-19, 20-30 yosh toifalaridagi tanlovning hududiy bosqichlari gʻoliblari boʻlgan 36 nafar kitobxon yoshlar ishtirok etdilar.

Mangʻit shahrining Oybek nomli mahallasida oʻtkazilgan tanlovning adolatli va shaffof oʻtkazilishini taʼminlash maqsadida Yoshlar ishlari agentligi Amudaryo tuman boʻlimi hamda Respublika Maʼnaviyat va maʼrifat markazining tuman boʻlimi masʼullari rahbarligida nufuzli hakamlar hayʼati tomonidan tanlov Nizomiga muvofiq kitobxonlar bilimi odilona baholab borildi.

Tanlov Nizomiga koʻra, ishtirokchilar 4ta savolga tezkor javob berishlari talab etildi va savollar bilet tanlash orqali tanlab olindi, javob berish uchun esa 2 daqiqa vaqt ajratildi. Ishtirokchilarning bilimdonlik saviyasi 100 ballgacha boʻlgan baholash tizimi orqali baholab borildi.

Hayajonli daqiqalarga boy, qiziqarli savol-javoblar asosida oʻtkazilgan “Yosh kitobxon” tanlovining Amudaryo tuman bosqichi yakunlariga koʻra, 10-14 yoshli kitobxonlar orasida Charosxon Safarboyeva, 15-19 yosh toifasida Sveta Xudoyorova, 15-19 yosh toifasida Omongul Joʻlliboyevalar yuqori ball toʻplab, “Yosh kitobxon” tanlovining Qoraqalpogʻiston Respublikasi bosqichiga yoʻllanma oldilar.

Tanlov gʻoliblari tashkilotchilar tomonidan munosib ragʻbatlantirildilar.

Robiya YOʻLDOShEVA.