NAVOIY NOMLI MAHALLA YoSh QIZLARI “BUVIJONLAR MAKTABI” AʼZOLARI SUHBATIDAN BAHRAMAND BOʻLDILAR

Keksalar – xonadonlarimiz koʻrki, yurtimiz fayzi. Ularning uzoq yillik hayotiy tajribalari oʻsib kelayotgan yosh avlod uchun haqiqiy ibrat maktabidir. Shuning uchun ham keksalari bor xonadonlarning fayz-u tarovati oʻzgacha, mahallalarda esa nuroniy onaxon va otaxonlar nafaqat oʻz farzandlari, nevara-chevaralari, balki qoʻni-qoʻshnilar, mahalladoshlarining ham farzandlariga alohida mehr-muhabbat bilan pand-u nasihatlar berishadi, hayotda toʻgʻri yoʻlni tanlashlari uchun jon kuydirishadi. Shu bois, xalqimiz “bir bolaga yetti mahalla ota va ona” tamoyilini turmush tarzining, qolaversa, milliy-maʼnaviy tarbiyaning bir qismiga aylantirishgan.

Amudaryo televideniyesi ijodkorlari tomonidan amalga oshirilayotgan “Yuksak maʼnaviyatli va axloqli yoshlar – kelajak poydevori” nomli davlat granti loyihasi doirasidagi tadbirlar ham yoshlar maʼnaviyatini yuksaltirish, ular ongida Vatanga muhabbat, milliy va umuminsoniy qadriyatlarga sadoqat ruhini shakllantirishga qaratilgani bilan muhim ahamiyat kasb etmoqda.

Joriy yilning 16-oktyabr sanasida Mangʻit shahrining Navoiy nomli mahallasida boʻlib oʻtgan “Onalar oʻgiti” tadbiri ham oʻzining mazmun-mohiyatiga koʻra, mahallalarda va taʼlim muassasalarida yosh qizlarni turmushga tayyorlash, ayrim nizoli oilalar oʻrtasidagi kelishmovchiliklarni bartaraf etishga qaratilgani bilan tadbir ishtirokchilariga manzur boʻldi.

Amudaryo televideniyesi, Navoiy nomli MFY masʼullari va 30-sonli umumtaʼlim maktabi maʼmuriyati hamkorligida oʻtkazilgan mazkur tadbirda MFY faollari “Buvijonlar maktabi” aʼzolari, nuroniy onaxonlar va mahallaning oʻsmir yoshidagi oʻquvchi-qizlari ishtirok etishdi.

“Onalar oʻgiti” tadbirini jurnalist Robiya Yoʻldosheva ochdi va Amudaryo televideniyesining “Yuksak maʼnaviyatli va axloqli yoshlar – kelajak poydevori” grant-loyihasi doirasidagi tadbirlarning maqsadi hamda undan kutilayotgan natijalar xususida batafsil toʻxtalib, bugungi shiddat bilan rivojlanayotgan davrda yoshlar tarbiyasi, ayniqsa, milliy-maʼnaviy tarbiya eng muhim, dolzarb masala ekanligini taʼkidladi. Bu borada har lahzada ogoh yashash, tarbiyaviy ishlarni qatʼiy intizom asosida yuritish har bir ongli insonning zimmasiga yuksak masʼuliyat yuklashini, nuroniy onaxonlarimizning oʻgit va nasihatlarini har bir yosh oʻziga hayotiy shior sifatida qabul qilishi zarurligini qayd etdi.

Shundan soʻng, Navoiy nomli mahalla xotin-qizlar faoli Gulbahor Xidirova oʻz faoliyati davomida mahallaning koʻpni koʻrgan, nuroniy onaxonlari bilan hamkorlikda amalga oshirayotgan ishlari xususida soʻz yuritib, mahallada yosh qizlarni katta hayotga, turmushga tayyorlashda, eng avvalo ularni kasb-korli, odobli va hayoli qilib voyaga yetkazayotgan ibratli oilalar bekalariga minnatdorchilik bildirdi.

– Mahallamiz Mangʻit shahrining oʻzagi, – dedi nuroniy onaxonlardan Oʻgʻiljon opa Normatova. – Chunki Mangʻit shahrining barcha mahallalari bizning Navoiy nomli mahalladan bir ildiz sifatida rivojlangan. Shuning uchun ham biz mahallamizning yanada obod va koʻrkam, boshqa mahallalarga namuna boʻlishi uchun barcha ishlarda hamjihatlikka intilamiz.

Darvoqe, ayni paytda mahallada 751ta xonadon tarkibidagi oilalarda 4500 nafar aholi istiqomat qilishadi. Hudud aholisining farzandlari taʼlim-tarbiya olayotgan 1-sonli va 30-sonli umumtaʼlim maktabiga mahalladoshlar alohida eʼtibor qaratishadi. Ayniqsa, yosh qizlarni turmushga tayyorlash, erta va qarindoshlar nikohining oldini olishga qaratilgan chora-tadbirlar, taʼlim muassasalari bilan hamkorlikdagi “Qiz bola – oilaning koʻrki”, “Yaxshi, oqila qiz – mahalla faxri” mavzularidagi davra suhbatlari, nuroniy onaxonlar ishtirokidagi uchrashuvlarga balogʻatga yetgan va oʻsmir qizlar, yosh kelinlar kengroq qamrab olinayotgani, oʻtkazilayotgan maʼnaviy-maʼrifiy suhbatlarning taʼsir doirasi ortib borayotganidan mahalladoshlar mamnun.

“Onalar oʻgiti” tadbiri davomida 30-sonli maktab direktorining maʼnaviy-maʼrifiy ishlar boʻyicha oʻrinbosari Dilnoza Fayzullayeva, nuroniy onaxonlardan Bogʻdagul opa Ahmedova, Oʻgʻiljon opa Normatova, Tozagul momo Otajonova, 1-sonli maktab oʻqituvchisi Gulchehra Qurbonboyeva, MFY xotin-qizlar faoli Gulbahor Xidirovalar qizlarni turmushga tayyorlash, ularni kasb-korli qilish, mahallada ajrashish yoqasiga borib qolgan oilalarni yarashtirish va ularni sogʻlom hayotga qaytarish yuzasidan qimmatli fikr-mulohazalarini bildirdilar.

Tadbir davomida yosh qizlar oʻzlarining ota-onalari, mahallaning nuroniy onaxonlari bergan pand-nasihatlar, ularning oʻgitlari oʻzlari uchun yorqin hayot sahifalarini ochishda katta ahamiyat kasb etishini, inson hayotga bir marta kelishi va ana shu buyuk neʼmatni Allohning ulugʻ inʼomi sifatida qabul qilib, chiroyli tarzda yashash zarurligini mamnuniyat bilan taʼkidladilar.

“Onalar oʻgiti” tadbiri ishtirokchilari boʻlgan qizlar koʻpni koʻrgan nuroniy onaxonlar, “Buvijonlar maktabi” aʼzolari bilan dildan, samimiy muloqot muhitini yaratgani uchun Amudaryo televideniyesi ijodkorlariga samimiy minnatdorchilik bildirdilar.

Robiya YOʻLDOShEVA