FANLAR OLIMPIADASINING TUMAN BOSQIChI OʻTKAZILMOQDA
2023-yil 9-sentyabr kuni Oʻzbekiston Respublikasi Vazirlar Mahkamasining “Iqtidorli oʻquvchilar oʻrtasida fan olimpiadalarini oʻtkazish tizimini takomillashtirish hamda xorijiy tillarni oʻqitish boʻyicha eng yaxshi maktabni aniqlash tizimini joriy etish toʻgʻrisida”gi Qarori qabul qilingan edi. Qarorga koʻra, umumiy oʻrta taʼlim maktablari, akademik litsey va kasb-hunar maktablari oʻquvchilari oʻrtasida fan olimpiadalarini tashkil etish, oʻtkazish hamda xalqaro olimpiadalar ishtirokchilarini saralash va gʻoliblarni ragʻbatlantirish nazarda tutilgan.
17-oktyabr kuni Amudaryo tumanidagi 40-sonli maktab binosida tumandagi umumtaʼlim maktablari oʻquvchilari oʻrtasida fanlar olimpiadasining tuman bosqichi ochilish marosimi boʻlib oʻtdi. Unda olimpiadaning quyi bosqichlaridan muvaffaqiyatli oʻtgan 85ta maktab hamda 2ta kasb-hunar maktabining jami 2ming 600 nafar oʻquvchilari gʻoliblik uchun bellashdilar.
Umumtaʼlim maktablarida taʼlim olayotgan oʻquvchilarning bilimini baholashda fanlar olimpiadasi muhim oʻrin tutadi. Joriy yilda ham mazkur tadbirni yuksak tashkilotchilik asosida oʻtkazishga alohida eʼtibor qaratilmoqda.
Oʻquvchilar 16ta fan, jumladan tarix, geografiya, qozoq tili, qoraqalpoq tili, ingliz, frantsuz, nemis, kimyo, rus tili, biologiya, informatika, fizika, matematika, ona tili fanlaridan oʻz bilimlarini sinovdan oʻtkazdilar.
Mazkur fan olimpiadasining haqqoniy va adolatli oʻtishini taʼminlash maqsadida Qoraqalpogʻiston Respublikasi Maktabgacha va maktab taʼlimi vazirligi buyrugʻi asosida hududlarga masʼullar biriktirildi. Amudaryo tumaniga biriktirilgan Respublika metodika markazi metodistlari Minayxan Erjanova, Fazilat Zaripova hamda tuman Maktabgacha va maktab taʼlimi boʻlimining maʼsul xodimlari 200 nafarga yaqin hakamlar hayʼati aʼzolari bilan birgalikda fanlar olimpiadasining tuman bosqichini kuzatib, baholab bordilar.
Fanlar olimpiadasida taʼlim muassasalarida oʻquvchilar xavfsizligini taʼminlash, salomatligini muhofaza qilish maqsadida tegishli tashkilotlar bilan hamkorlikda barcha shart-sharoit yaratildi. Har bir auditoriyaga nazoratchilar biriktirildi.
Aytish joizki, bugungi kunda yurtboshimiz tomonidan yoshlarga keng imkoniyatlar yaratib berilmoqda. Ushbu yaratib berilayotgan imkoniyatlarga javoban yoshlarimiz ham turli sohalarda oʻzlarining faolliklarini koʻrsatib kelishmoqda.
Maʼlumot oʻrnida aytish kerakki, tumanimizda 85ta umumtaʼlim maktablari faoliyat koʻrsatmoqda. Ularda taʼlim olayotgan oʻquvchilar soni 38ming 476 nafarni tashkil qilib, 4 ming 64 nafar oʻqituvchilar yoshlarga taʼlim-tarbiya berib kelmoqda.
Respublika byudjetidan qoʻshimcha ajratiladigan mablagʻlar hisobidan 6ta umumtaʼlim maktabida 17,2 mlrd. soʻmlik qurilish taʼmirlash ishlari olib borildi. Koreya Respublikasining Eksimbank grantlari hisobidan 6ta umumtaʼlim maktabiga 96 dona, Vazirlar Mahkamasining 2021-yil 29-noyabrdagi Qarori asosida 17ta maktabga 176 dona zamonaviy kompyuter jamlanmalari yetkazib berildi. Yaratilayotgan bu kabi sharoitlar oʻquvchilarni ilm-fan sirlarini yanada chuqur oʻrganib, Vatanimiz taraqqiyotiga munosib hissa qoʻshadigan kadrlar boʻlib yetishishga daʼvat qilishi tabiiy.
5 kun davom etadigan fanlar olimpiadasining tuman bosqichi yakunlariga koʻra 144 nafar gʻoliblar va 2-3-oʻrinlar sohiblari aniqlanib, Qoraqalpogʻiston Respublikasi bosqichiga yoʻllanmani qoʻlga kiritadi hamda tuman Maktabgacha va maktab taʼlimi boʻlimi tomonidan esdalik sovgʻalari va diplom bilan taqdirlanadi.
Tuman hokimligi Axborot xizmati
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
