OʻQUVChI-YoShLARGA YaNGI KITOBLAR TARGʻIB ETILDI

Buyuk maʼnaviyat targʻibotchisi, donishmand Muhammad Jabalrudiy: “Kitob olimlar fikrining panohgohi, dono kishilar boʻstonining chamani, oddiy kishilarning tomoshagohidir. U kimsasiz kishilarga dil ochuvchi bogʻ, koʻngli shikastalarga rahnomadir. U hamma yerda barcha kishilar bilan oshno, dardli kimsalar diliga davodir”, degan edilar.

Darvoqe, kitob oʻz sehr-u sinoati bilan insoniyat oʻqish-yozishni bilgan kunidan boshlab oʻziga maftun etib keladi. Asrlar davomida oʻzlarining moʻʼjizakor kashfiyotlari bilan nom qozongan buyuk donishmandlar ham oʻzlaridagi beqiyos maʼnaviy-maʼrifiy qudratni kitobdan olganlar. Shu bois, aqlli insonlar har qanday sharoitda ham kitobxonlikni oʻzlari uchun asosiy mashgʻulot sifatida qabul qilganlar.

Oʻzbekiston Respublikasi Vazirlar Mahkamasining “2020-2025-yillarda kitobxonlik madaniyatini rivojlantirish va qoʻllab-quvvatlash milliy dasturi asosida Oʻzbekiston Respublikasi aholisiga kutubxona xizmati koʻrsatishni yanada takomillashtirish toʻgʻrisida”gi Qarori ijrosini taʼminlash, yoshlar maʼnaviyatini yuksaltirish, ular oʻrtasida kitobxonlikni keng targʻib qilish maqsadida Amudaryo tuman Axborot-kutubxona markazi xodimlari tomonidan keng qamrovli maʼnaviy-maʼrifiy targʻibot tadbirlari oʻtkazilmoqda.

Markaz xodimlari tomonidan Ixtisoslashtirilgan taʼlim muassasalari agentligi tizimidagi Amudaryo tuman Ixtisoslashtirilgan maktabida oʻzbek adabiyotining atoqli namoyondasi Oʻtkir Hoshimov ijodiga bagʻishlab tashkil qilingan targʻibot tadbiri ham shular jumlasidandir.

Tadbirda Oʻtkir Hoshimovning asarlari bilan birgalikda kutubxonaga yangi olib kelingan adabiyotlardan kitob koʻrgazmasi tashkil qilindi. Kutubxonachi Sohiba Bazarboyeva tadbir ishtirokchilariga yozuvchining “Dunyoning ishlari” kitobi taqdimotini oʻtkazdi. Tadbir davomida yozuvchining ijodi va asarlari yuzasidan savol-javoblar tashkil etildi.

Adibning asarlarini katta qiziqish bilan oʻqib, bu asarlardan oʻzlari uchun hayotiy xulosalar chiqargan kitobxon yoshlar Oʻzbekiston xalq yozuvchisi Oʻtkir Hoshimov qalamiga mansub boshqa asarlari xususida ham oʻz fikrlarini bildirishdi. Xususan, yozuvchining “Oʻzbeklar” kitobiga jamlangan hayotiy hikoyalari, “Dunyoning ishlari” kitobidagi ona obrazi haqida soʻz yuritib, sharq ayollariga xos ezgu fazilatlarni oʻzida mujassam etgan oʻzbek onasiga cheksiz ehtiromlarini izhor etdilar.

Tadbir yakunida kutubxona xodimlari oʻquvchilarni kutubxonaga aʼzo qilib, kitob oʻqishga daʼvat qildilar.

Oʻz navbatida oʻquvchi-yoshlar ham Amudaryo tumani Axborot-kutubxona markaziga borib kutubxonachi opalari tomonidan taqdimot etilgan yozuvchi va shoirlarning asarlari bilan yaqindan tanishish istagini bildirdilar.

R.RAMANOVA, Amudaryo tuman Axborot-kutubxona markazi xodimi