ЎҚУВЧИ-ЁШЛАРГА ЯНГИ КИТОБЛАР ТАРҒИБ ЭТИЛДИ

Буюк маънавият тарғиботчиси, донишманд Муҳаммад Жабалрудий: “Китоб олимлар фикрининг паноҳгоҳи, доно кишилар бўстонининг чамани, оддий кишиларнинг томошагоҳидир. У кимсасиз кишиларга дил очувчи боғ, кўнгли шикасталарга раҳномадир. У ҳамма ерда барча кишилар билан ошно, дардли кимсалар дилига даводир”, деган эдилар.

Дарвоқе, китоб ўз сеҳр-у синоати билан инсоният ўқиш-ёзишни билган кунидан бошлаб ўзига мафтун этиб келади. Асрлар давомида ўзларининг мўъжизакор кашфиётлари билан ном қозонган буюк донишмандлар ҳам ўзларидаги беқиёс маънавий-маърифий қудратни китобдан олганлар. Шу боис, ақлли инсонлар ҳар қандай шароитда ҳам китобхонликни ўзлари учун асосий машғулот сифатида қабул қилганлар.

Ўзбекистон Республикаси Вазирлар Маҳкамасининг “2020-2025-йилларда китобхонлик маданиятини ривожлантириш ва қўллаб-қувватлаш миллий дастури асосида Ўзбекистон Республикаси аҳолисига кутубхона хизмати кўрсатишни янада такомиллаштириш тўғрисида”ги Қарори ижросини таъминлаш, ёшлар маънавиятини юксалтириш, улар ўртасида китобхонликни кенг тарғиб қилиш мақсадида Амударё туман Ахборот-кутубхона маркази ходимлари томонидан кенг қамровли маънавий-маърифий тарғибот тадбирлари ўтказилмоқда.

Марказ ходимлари томонидан Ихтисослаштирилган таълим муассасалари агентлиги тизимидаги Амударё туман Ихтисослаштирилган мактабида ўзбек адабиётининг атоқли намоёндаси Ўткир Ҳошимов ижодига бағишлаб ташкил қилинган тарғибот тадбири ҳам шулар жумласидандир.

Тадбирда Ўткир Ҳошимовнинг асарлари билан биргаликда кутубхонага янги олиб келинган адабиётлардан китоб кўргазмаси ташкил қилинди. Кутубхоначи Соҳиба Базарбоева тадбир иштирокчиларига ёзувчининг “Дунёнинг ишлари” китоби тақдимотини ўтказди. Тадбир давомида ёзувчининг ижоди ва асарлари юзасидан савол-жавоблар ташкил этилди.

Адибнинг асарларини катта қизиқиш билан ўқиб, бу асарлардан ўзлари учун ҳаётий хулосалар чиқарган китобхон ёшлар Ўзбекистон халқ ёзувчиси Ўткир Ҳошимов қаламига мансуб бошқа асарлари хусусида ҳам ўз фикрларини билдиришди. Хусусан, ёзувчининг “Ўзбеклар” китобига жамланган ҳаётий ҳикоялари, “Дунёнинг ишлари” китобидаги она образи ҳақида сўз юритиб, шарқ аёлларига хос эзгу фазилатларни ўзида мужассам этган ўзбек онасига чексиз эҳтиромларини изҳор этдилар.

Тадбир якунида кутубхона ходимлари ўқувчиларни кутубхонага аъзо қилиб, китоб ўқишга даъват қилдилар.

Ўз навбатида ўқувчи-ёшлар ҳам Амударё тумани Ахборот-кутубхона марказига бориб кутубхоначи опалари томонидан тақдимот этилган ёзувчи ва шоирларнинг асарлари билан яқиндан танишиш истагини билдирдилар.

Р.РАМАНОВА, Амударё туман Ахборот-кутубхона маркази ходими