Axborotlashtirish va telekommunikatsiyalar sohasida nazorat inspektsiyasi rahbariyatining sayyor qabuli oʻtkazildi

Mamlakatimizda inson manfaatlari oliy qadriyat darajasiga koʻtarilgan. Bugun barcha davlat idoralari faoliyatida aholining murojaatlari bilan ishlash boʻyicha sifat jihatidan mutlaqo yangi tizim yaratildi. Joylarda oʻtayotgan sayyor qabullar aholining muammolarini hal etishda, shak-shubhasiz, kutilgan natijalarni bermoqda. Zero, davlatimiz rahbari taʼkidlaganidek, xalq davlat organlariga emas, balki davlat idoralari xalqimizga xizmat qilishi kerak.

Shu sababli ham bugungi kunda yurtimizda xalq bilan faol va ochiq muloqot olib borish, avvalo insonning huquq hamda manfaatlarini taʼminlash orqali xalqimizning farovon, baxtli hayot kechirishi uchun koʻplab saʼy-harakatlar amalga oshirilmoqda.

Jumladan, Respublikamiz boʻylab oʻtkazilayotgan sayyor qabullar jarayonida aholining muammolari oʻrganilib, koʻplab muammolar ijobiy hal etilishiga erishilmoqda.

Joriy yilning 12-oktyabr kuni Amudaryo tumanining Olmazor mahallasi hududida joylashgan 82-sonli maktab binosida Axborotlashtirish va telekommunikatsiyalar sohasida nazorat inspektsiyasi rahbariyatining jismoniy va yuridik shaxslarning bugungi kundagi sohaga oid muammolarini oʻrganish va ularni bartaraf etish maqsadida navbatdagi sayyor qabuli oʻtkazildi.

Sayyor qabulda Axborotlashtirish va telekommunikatsiya texnologiyalari xizmatlaridan foydalanishda isteʼmolchilar huquqlarini himoya qilish, sohadagi muammolar va ularni bartaraf etish olib borilayotgan ishlar toʻgʻrisida soʻz yuritildi.

Shuningdek tuman aholisiga zamonaviy telekommunikatsiya xizmatlaridan foydalanish imkoniyatlarini kengaytirish maqsadida telekommunikatsiya stantsiyalar soni 6taga, optik liniyali terminal uskunalari soni 10taga hamda ularning umumiy sigʻimi 18,3 ming raqamga yetkazilganligi qayd etildi.

Shu yoʻnalishda olib borilgan ishlar natijasida yil boshidan 274,7 kilometr masofada optik tolali aloqa liniyalari qurilib, umumiy uzunligi 1 ming 249 kilometrga, keng polosali portlar soni 6 ming 280taga oshirilib, ularning umumiy sigʻimi 15 mingtaga yetkazildi.

Telekommunikatsiya tarmoqlarini rivojlantirish bilan bir qatorda tumanda 240ta ijtimoiy soha obʼektlarida internet xizmatlariga ulanish imkoniyati yaratildi. Jumladan, Xalq taʼlimi boʻlimlarida 88ta, maktabgacha taʼlim tashkilotlarida 51ta, tibbiyot muassasalarida 15ta, mahalla va ovul binolari uchun 49ta hamda profilaktika inspektorlarining xizmat xonalariga 37ta optik tolali aloqa liniyalari oʻrnatildi.

Shuni taʼkidlash joizki, tumanda mobil aloqa qamrovini kengaytirish hamda sifatini yaxshilash maqsadida 11ta yangi va 18ta tayanch stantsiyalar keng polosali texnologiyalarga modernizatsiya qilindi.

Sayyor qabul ishtirokchilardan kelib tushgan murojaatlarning aksariyatiga qabul davomida masʼul rahbar va xodimlar tomonidan huquqiy maʼlumot berildi, qolgan murojaatlarni oʻrnatilgan tartibda oʻrganib chiqib, ijobiy hal qilish uchun nazoratga olindi.

Shu bilan birga, “Oʻzkomnazorat” tashkilotining uzluksiz ishlaydigan 1144 raqamli ishonch telefoni hamda telegramdagi “Aloqa nazorat” guruhi orqali ham murojaat yoʻllash imkoniyatlari yaratilganligi haqida aytib oʻtdi.

Tuman hokimligi Axborot xizmati